Kunnugleg fyrirbæri.

Ég hlustaði á ýmislegt kunnuglegt í viðtalinu í Kastljósinu í kvöld við hinn magnaða og merka kvikmyndagerðarmann Helga Felixson sem stórkostlegt er að vita að skuli hafa ráðist í að gera myndina "Guð blessi Ísland."  

Skal þá fyrst telja lýsingu Bjarna Ármannssonar á því hvernig stjarnfræðilegar peningaupphæðir, þar sem til dæmis einn maður er með fjáröflun fyrir sig sjálfan í gangi, sem er allt að milljón sinnum hærri en þær upphæðir sem venjulegt fólk er að velta á milli handa sér mánaðarlega, - hvernig þessar fjárhæðir verða bara að tölum eða táknmyndum í huga hans.

Ég minnist orða forystumanns orkuöflunar í Þingeyjarsýslum vorið 2007 þegar hann fullyrti að hægt væri leikandi að virkja 1000 megavött þar eða sem svaraði orku fyrir tvö risaálver við Húsavík.  

Honum veittist létt að stækka 30 megavöttin, sem talin voru vonarpeningur í Gjástykki, um helming nú á dögunum og fara í viðtali inn á magnaðasta eldfjallasvæði veraldar til virkjunar Fremri-Náma, nokkuð sem ekkert hefur verið rætt um fram að þessu.

Ekki málið, - það verður bara borað og virkjað eins og þarf til að seðja álrisann.  

Þessir menn eru orðnir firrtir af ofbirtu í leik sínum með tölur og mega ekki til þess hugsa að dæmin þeirra séu skoðuð fyrirfram, heldur skal skjóta fyrst og spyrja svo.

Þeim er skítsama þótt barnabörn okkur þurfi að sæta því að stærstu hluti orkunnar sem á að dæla upp með öllum tiltækum ráðum verði uppurin þegar þau taka við landinu af okkur.

Mesta orkubruðl veraldar sem felst í álbræðslu er bara orðið að leik að tölum og táknmyndum en fræg náttúruverðmæti, unaðsstundir þeirra og heiður þjóðar sem varðveitir þau fyrir mannkyn allt eru ekki metin neins.  

Viðtalið vakti líka upp gamlar minningar frá vetrinum 2002-2003 þegar ráðandi öfl í þjóðfélaginu neyttu allra bragða til að hræða mig frá því að gera myndina "Á meðan land byggist."

Þar var ekki um að ræða að koma í veg fyrir einstök myndskeið heldur alla myndina og þar á undan hafði staðið yfir fjögurra ára herferð gegn því að ég fengist yfirleitt við fréttamennsku eða þáttagerð.  

Það tókst að hræða alla hugsanlega viðmælendur á vísindasviðinu nema einn frá því að koma í viðtöl í myndinni og alla hugsanlega kostunar- eða styrktaraðila nema tvo frá því að styrkja myndina.

Þeir styrkir námu örfáum prósentum af kostnaðinu við hana. 

Ég ætla horfa á myndskeiðið af Jóni Ásgeiri, sem hann vissi ekki að væri tekið af sér,  á ný þegar ég sé myndina í heild, áður en ég legg dóm á það út af fyrir sig hvort birting þess hafi átt rétt á sér eða ekki.

Í prinsippinu er ég andvígur því að sýna myndskeið sem viðkomindi veit ekki um að séu tekin upp.

Þó getur þetta farið eftir aðstæðum, til dæmis þegar viðkomandi er á almannafæri, til dæmis í umferðinni eða þegar um er að ræða svipað atriði og í tölvupóstmáli Jónínu Ben þar sem almannahagsmunir vógu þyngst að mati dómstóla.   

  

Vill að viðtölum verði eytt

Athugasemdir

[Hildur Helga Sigurðardóttir, 30.9.2009 kl. 02:06]

Sammála Ómar.

[Gunnar Th. Gunnarsson, 30.9.2009 kl. 02:40]

Þú talar alltaf um að verið sé að blóðmjólka orkuna úr iðrum jarðar, án þess að færa nein rök fyrir því.

Vísndamenn orkufyrortækjanna er algjörlega meðvitaðir um að ekki er sama hvernig að orkunýtingunni er staðið, m.t.t. sjálfbærni. En það hentar ekki þínum málstað að geta þess.

Varðandi fréttamennsku þína á sínum tíma; allir sáu og heyrðu sem vildu, að þú notaðir myndir og mál sem augljóslega upplýstu allt um þínar skoðanir, enda "komstu úr skápnum" hvað það varðar, síðar.

[Gunnar Th. Gunnarsson, 30.9.2009 kl. 02:44]

Meira að segja tónlistin var sniðin við myndkeiðin, eftir óróðursformúlum.

[Ómar Ragnarsson, 30.9.2009 kl. 11:52]

Jæja, Gunnar minn. "tónlistin sniðin við myndskeiðin eftir áróðursformúlu."

Líka lagið og textinn "Afl fyrir Austurland?" og lagið við ljóð Einars Ben um virkjun Dettifoss?

Þessi lög voru spiluð voru þegar ferðast var um Kárahnjúkasvæðið til þess að skapa mótvægi við lagið "Sólarupprás í Hjalladal."

Skoðaðu textana við þessi lög.

Ég hef áður nefnt eftirtalin nöfn vísindamanna og kunnáttumanna, sem hafa best rannsakað afkastagetu jarðvarmasvæða til framtíðar og æskileg vinnubrögð við nýtingu þeirra:

Guðmundur Pálmason, Bragi Árnason, Sveinbjörn Björnsson, Stefán Arnórsson, Jóhannes Zoega.

Þegar þú kynnir þér verk þessara manna sérðu vel rökin sem ég færi fyrir máli mínu.