Í lið með Eiði.

Þetta er svo sem ekki stórt atriði en sögnin að telja og orðið talsins eru óþörf tískufyrirbrigði. 

Dæmi: Í stað þess að segja: Akureyringar eru um sautján þúsund er bætt við orðinu talsins, sem er alveg óþarft.

Enn verri er þrálát notkun sagnarinnar að telja þegar tölur eru nefndar.

Þá lítur Akureyrarfréttin svona út: Akureyri telur sautján þúsund manns sem er alger málleysa.

Við, sem fáumst við gamanmál leyfum oft púkanum í okkur að leika sér svolítið og getur hálkæringurinn orðið býsna mikill þegar menn vega hver annan í góðsemi eins og Grímur Thomsen orðaði það.

Fyrir mörgum árum fór Flosi Ólafsson frá Akureyri eftir að hafa dvalið þar um hríð og var ekki ánægður með allt hvað Akureyrardvöl sína snerti.

 

Þá gerði hann þessar tvær vísur: 

 

Frá Akureyri ég býst nú brott  / 

á bitrum vetrardegi köldum.   /  

Á Akueyri er allmargt gott   /

en ekkert þó af mannavöldum.

 

Aðra vísu gerði hann sem hann fór með í einum af spurningaþáttunum "Hvað heldurðu?"  

 

Á Akureyri um það bil   /

ekki neins ég sakna.   /

Jú, þar er fagurt þangað til   /

þorpsbúarnir vakna.  /

 

Ég gisti á Akureyri tvær nætur á dögunum og var svo óheppinn að fyrri nóttina varð mér ekki svefnsamt lengi vel vegna drykkjuláta og hávaða og flýði úr húsinu.

Þá sá ég færi á að loka þeim kersknis- sólarhring sem Flosi hafði fjallað um að hálfu leyti:

 

Á Akureyri um það bil   / 

ást mín fer að dofna.   /

Þar er ólíft þangað til   / 

þorpsbúarnir sofna.   /  

 

Hefði jafnvel getað haft vísuna svona vegna hugsanlegrar orsakar þess að hávaðanum linnti í lokin:  

 

Um Akureyri um það bil   /

ég ósofinn mun þreyja.  /

Þar er ólíft þangað til    /

þorpsbúarnir "deyja".   / 

 

Þess má geta að maður gekk undir manns hönd að bæta mér þetta ónæði upp og einnig bentu Akureyringarnir, sem allt vildu fyrir mig gera, á að fólkið, sem hélt fyrir mér vöku hefði verið aðkomufólk en ekki Akureyringar.  

Minnti það mig að vísu á fréttina í Degi hér um árið þess efnis að hundur hefði bitið mann illa á Akureyri, en fréttin endaði síðan á setningunni: "Þess skal getið að um aðkomuhund var að ræða." 

Til að jafna nú þessi mál vil ég geta þess að Akureyringar og Akureyri eru mikið eftirlæti mitt og að þar á ég ýmsa af mínum allra bestu og tryggustu vinum.

Síðastliðin sumur hef ég haft þar bækistöð í tengslum við kvikmyndagerð mína á Norður- og Norðausturlandi og mér líður alltaf vel þar.  

Auk þess svaraði ég á sínum tíma vísu Flosa með svipaðri vísu um Reykjavík og Reykvíkinga og hef gert texta um Akureyri á borð við "Nótt á Akureyri" og "Halló, Akureyri."

Ætti enginn að velkjast um góðan hug minn til norðanmanna þótt það geti komið fyrir að brugðið sé á leik til gamans.  

Fórnarlömb skjálftans 1.115 talsins

Athugasemdir

[Rafn Haraldur Sigurðsson (IP-tala skráð) 14.10.2009 kl. 15:06]

skemmtileg færsla hjá þér. 

Þeir eru þá hættir að tala um aðkomumann að sunnan. Nú eru það bara aðkomufólk. Aumingja Akureyringarnir að fá allt þetta aðkomufólk og aðkomuhunda.

kveðja Rafn.

[Ómar Ragnarsson, 14.10.2009 kl. 15:13]

Á síðustu áratugum hef ég fundið fyrir gríðarmikillli breytingu í þá átt að munurinn á sunnanmönnum og norðanmönnum minnkar hröðum skrefum.

Mér finnst sjónar (heyrnarsviptir) að því hve hinn skýri og harði norðlenski framburður er á miklu undanhaldi.

Hvað samgöngu- og flugvallarmál snertir þá hef ég margoft bent á að vegna þess hve flugvellirnir í Reykjavík og á Akureyri eru vel staðsettir, er Akureyri í svipaðri aðstöðu gagnvart höfuðborginni og Borgarnes, Akranes, Hveragerði, Selfoss, Hella og Suðurnes.

Í raun eru þetta allt hlutar af sama atvinnu- og þjónustusvæði sem eiga það sameiginlegt að það er innan við klukkustundar ferð frá þeim inn að miðju þjónustunnar á höfuðborgarsvæðinu, sem nú liggur á krossgötum þess við Elliðaár og í næsta nágrenni.

Færsla Reykjavíkurflugvallar í burtu frá borginni jafngildir því að henda 17 þúsund manna hverfi í borginni út í hafsauga.

[Sigurður Þorsteinsson, 14.10.2009 kl. 19:36]

Óborganlegt. Einn vinur minn hafði búið á Akureyri í rúm 40 ár, sagði mér að hann teldist alltaf með ,,hinum" á Akureyri. ,,Við" hópurinn var fæddur á Akureyri og það munaði 7 árum að hann teldist þar. ,,Því fylgja önnur mannréttindi", fékk ég sem útskýringu.