Oftrú á tæknina.

GPS-tæknin er dásamleg en hefur líka sínar dökku hliðar, ekki aðeins á jörðu niðri, eins og dæmið með manninn á Grjóthálsi sýnir, heldur lika á sjó og í lofti. 

Í þeim tveimur flugvélum sem ég flýg eru GPS-tæki, sem í nánast öllum tilfellum sýna rétta staðsetningu eftir því sem ég fæ komist næst.

Þó hef ég staðið tækin í báðum flugvélunum að því að sýna skakka staðsetningu og ekki stystu leið þegar beðið hefur verið um hana.

Ég veit að margir hinna yngri flugmanna treysta algerlega á GPS-tækin og það þykir mér varasöm þróun.

Tækin geta bilað og þeim getur skjátlast. Vegna tilkomu þeirra slævist áhuginn á að þekkja landið og rata um það án tækja, - það er bara mannlegt.  

Sjálfur notað ég þau aðeins endrum og sinnum, svona mest til gamans og til að skoða hvort þau séu í lagi, því að þau geta veitt hjálp ef í nauðir rekur og staðfest það sem maður heldur sjálfur að sé hið rétta.

Ég skal nefna dæmi.  

Ég varð eitt sinn samferða flugmanni sem flaug frá Austurlandi til Reykjavíkur og vildi eingöngu fara eftir GPS-tækinu. Ég sá fljótlega að hann flaug ekki skemmstu leið heldur of sunnarlega.

Hann átti erfitt með að trúa þessu, vegna þess að ég sagði þetta bara en sýndi honum það ekki á korti.

Ef ég hefði ekki verið um borð hefði hann líkast til samt komist til Reykjavíkur en flogið mun lengri leið og haldið að það væri stysta leiðin.

Þegar við vorum komnir hálfa leið samþykkti hann að ég hefði rétt fyrir mér en átti greinilega erfitt með að sætta sig við að GPS-tækinu skjöplaðist.

En það var ekki fyrr en ég tók upp kort og sýndi honum svart á hvítu hver stysta leiðin væri og hvar við vorum í raun.  

Þetta var greinilega áfall fyrir hann því að hefði hann flogið eftir tækinu hefði hann haldið að það væri að segja honum rétt til. 

Hann áttaði sig á því að hann hafði ævinlega verið að fljúga eftir tæki, sem ekki var óskeikult, og treyst því næstum í blindni. 

   

Var sendur á ófæran fjallveg

Athugasemdir

[Garmína (IP-tala skráð) 24.11.2009 kl. 15:45]

Fyrirsögn "fréttarinnar" þykir mér nokk skopleg, "Var sendur á ófæran fjallveg"  Eru þessar græjur nú farnar að senda mann hist og her.  Ég held ég slökvi á mínum Garmínum, áður en  þær senda mig í vandræði ;-)

Garmína

[Tryggvi (IP-tala skráð) 24.11.2009 kl. 16:39]

Atvikið í fréttinni hefur ekkert með áræðanleika gps tækninnar að gera heldur er um galla í kortagerðinni að ræða. Flest gps tæki nota kort keypt af vegagerðinni eða landmælingum og það er ekki hægt að treysta á að þau séu uppfærð í rauntíma.

Ég hef persónulega lent í vandræðum þegar ég var farþegi í rútu og gps tækið sendi okkur undir brú sem var of lág fyrir rútuna. 

Ég er líka nokkuð viss um að GPS sé ekki notað í atvinnuflugi til þess að reikna út flugleiðir. Held meira að segja að það sé bannað. Reyndar er talið að Galileo muni leysa þau vandamál og þá geta flugvélar algerlega flogið eftir staðsetningarbúnaðnum, Það á þó eftri að koma í ljós

[Hilmar Hafsteinsson (IP-tala skráð) 24.11.2009 kl. 17:23]

Sæll Ómar.

Þrátt fyrir að tæknin sé dyntótt getum við væntanlega verið sammála um að trúa á mátt tónlistarinnar.

www.spilarinn.net er glænýr gagnvirkur tónlistarvefur sem býður uppá ótæmandi tónlistarflutning, val á tónlistarflokkum, tónlistarárum, textum og tónlistarupplýsingum. Allt þetta og meira til algjörlega ókeypis!

Það tók þjóðina tugi ára að byggja þjóðarbókhlöðu. Nú hefur sannkölluð þjóðartónlistarhlaða opnað gátt sína fyrir landsmenn. Hvernig væri að kíkja inn? www.spilarinn.net

[Ómar Ragnarsson, 24.11.2009 kl. 22:49]

Það er rétt að það var vegna rangrar mötunar ("garbage in - garbage out") sem atvikið á Grjóthálsi gerðist.

Bannað er að fljúga eftir GPS í blindflugi en mér er vel kunnugt um það hvað margir sjónflugsmenn eru búnir að gera sig háða GPS-inu. 

Nefni aðeins eitt dæmi: 

Kvikmyndatökumaður, sem ég þekki, fór á mínum vegum með öðrum flugmanni til að taka mynd af Hágöngulóni. 

Það skipti engu þótt farþeginn segði honum að það væri við vesturjaðar Vatnajökuls skammt fyrir sunnan Tungnafellsjökul heldur var ekki hægt að leggja af stað fyrr en búið var að finna GPS-punkt staðarins. 

Þegar flogið var austur eftir Mosfellsheiði sá kvikmyndatökumaðurinn að í hinu fagra veðri sem var þennan dag var alveg upplagt að taka aðeins krók á leiðina og fara yfir sendistöðina á Skálafelli. 

"Skálafell? Hvar er það spurði flugmaðurinn. "Ertu með GPS-punkt á það?" 

Ég veit að þetta er óvenju magnað dæmi en það er auðvitað bara mannlegt að leggja ofurást á tæki sem beinir manni svona fyrirhafnarlítið á leiðarenda, enda hvort eð er flogið í sjónflugi. 

[Garmína (IP-tala skráð) 25.11.2009 kl. 16:55]

Nei, það er ekki bannað að nota GPS í flugleiðsögu, GPS tæki eru t.d. notuð til að uppfæra önnur flugleiðsögutæki, þau tæki þurfa bara að hafa til þess vottun.

En Ómar, ég get toppað þessa Skálafells sögu þína. Fyrir nokkru kom ungur maður fljugandi frá Reykjavík til Akureyrar, erindið var að aka bíl til Reykjavíkur, þessi ágjæti maður villtist á leiðini frá Akureyrarflugvelli út á Akureyri.  Honum var snúið við í Ljósavatnsskarði.

Kveðja.

[Ómar Ragnarsson, 25.11.2009 kl. 23:36]

Ég get toppað sögu þína. Ungur maður var að taka þann hluta verklegs prófs sem fólst í því að fljúga samkvæmt áætlun frá Reykjavík til Ísafjarðar, þaðan til Sauðárkróks og síðan til Reykjavíkur.

Þremur klukkustundum eftir brottför frá Reykjavík kemur flugvél inn í umferðarhring við Akureyrarflugvöll án þess að láta af sér vita og gerir allt vitlaust við flugvöllinn, vegna þess að veður var gott og mikil umferð.

Hann svarar ekki kalli, lendir og rennir vélinni upp að flugstöðinni án nokkurs leyfis.

Þá fyrst heyrist hann kalla í turninn. Flugumferðarstjórinn spyr öskuvondur af hverju hann hafi sett allt á annan endann og látið vita af sér fyrr.

Svarið var dásamlegt: "Ég hélt ég væri að lenda á Sauðárkróki."

"Farið það og veri!" kallaði flugumferðarstjórinn. Og af hverju kallarðu fyrst núna í mig?"

Enn dásamlegra svar kom þá frá flugmanninum: "Það var af því að þá fyrst sá ég að ég hlyti að vera á Akureyri, því að það stendur letrað með risaletri á flugstöðina nafnið "Akureyri!"

[Ómar Ragnarsson, 25.11.2009 kl. 23:39]

Leiðrétting: Vantar orðið "ekki" í setninguna sem flugumferðarstjórinn sagði fyrst: "....á annan endann og EKKI látið vita af sér fyrr.

Á GPS-tækjum í þeim flugvélum sem ég flýg stendur letrað: "Ekki leyfilegt að nota tækið í blindflugi."

[Garmína (IP-tala skráð) 26.11.2009 kl. 19:18]

Já... þessi saga er góð, og ég get staðfest að hún er sönn !! 

Henni tengt, þá bæði kom ég og fór til og frá Akureyrarflugvelli, meðan maðurinn hringsólaði yfir Akureyri og gargaði í sífellu "Sauðárkrókur Sauðárkrókur" En náttúrulega á rangri tíðni, það heyrði engin til hanns!!

En hvernig er það hægt, að vera kominn að einkaflugprófi og þekkja ekki mun á Sauðárkrók í Skagafirði og Akureyri við Eyjafjörð ?!?!?!

Það er fjandakornið ótrúlegt hvað fólk er illa áttað á þessu litla lalndi okkar, og það innfæddir Íslendingar.

 Bestu kveðjur....