Röng stefna í 30 ár.

Vestfirðingar súpa enn seyðið af rangri stefnu í samgöngumálum í 30 ár. Allir aðrir landshlutar eru með flugvelli sem hægt er að nota að degi sem nóttu. Og heilsársvegir liggja til allra annarra landshluta.

Vestfirðir eru á sama stigi og aðrir landshlutar voru fyrir meira en hálfri öld. 

Upphaf þessa var sú ranga ákvörðun um 1980 að leggja áherslu á hinn óralanga Djúpveg austur á Strandir og þaðan suður í stað þess að leggja áherslu á leiðina um Dali og Gilsfjörð. 

Við þetta færðist öll áhersla frá suður- og suðvesturhluta Vestjarða. 

Íbúar Þingeyrar sem ætla akandi til Reykjavíkur hafa þurft að vetrarlagi að aka fyrst í áttina frá Reykjavík og síðan hvað eftir annað í áttina frá Reykjavík á leið út eftir öllum fjörðunum við Ísafjarðardjúp, þvælast síðan austur á Strandir og suður um Hrútafjörð. 

Við það eitt að fara Arnkötludal styttist leiðin um hvorki meira né minna en 40 kílómetra og væri talsvert styttri en það ef farið væri vestur fyrir. 

Næst var sú ranga forgangsröðun, sem hefur tafið gerð jarðganga og heilsársvegar milli norður- og suðursvæðisins á meðan gerð hafa verið jarðgöng annars staðar á landinu þar sem voru þegar komnir heilsársvegir og nútíma flugsamgöngur. 

Nú er mikið fjaðrafok réttilega yfir töf á gerð nýs vegar á 24 kílómetra kafla við norðanverðan Breiðafjörð. 

Það var fyrirsjáanlegt fyrir löngu að þarna þyrfti að ganga frá undirbúningi á skaplegan og yfirvegaðan hátt samkvæmt gildandi lögum en það var samt ekki gert. 

Þegar menn drattast loks til að koma þessu af stað er sökinni velt á þá sem þurfa að láta þetta mál ganga eftir eðlilegum reglum í stað þess að spyrja: Af hverju var ekki búið að hefja þennan undirbúning fyrir löngu? 

Heilsársvegur milli norður- og suðursvæðis gerbreytir möguleikum til nútíma flugsamgangna við Vestfirði því að þá verður hægt að fljúga til Vestfjarða jafnt að nóttu sem degi svo framarlega sem gerð verður gangskör að því að koma upp slíkum flugvelli, annað hvort með því að bæta Patreksfjarðarflugvöll eða gera snotran flugvöll við Brjánslæk eða Haga. 

Raunar er Bíldudalsflugvöllur stórgóð bót á samgöngum fyrir Ísfirðinga ef þangað liggur heilsársvegur því að sá flugvöllur er oft opinn þótt allir aðrir flugvellir á norðanverðu landinu séu lokaðir í norðanhríð. 

Það er allt á sömu bókina lært. Ég skil til dæmis ekki hvers vegna brautin á Patreksfirði hefur verið stytt og þar með til dæmis komið í veg fyrir að sæmilega stórar flugvélar geti lent þar. 

Á sínum tíma voru færð að því ágæt rök hvernig hægt væri að koma leiðinni milli Þorskafjarðar og Kollafjarðar í gott horf án þess að rista upp eftir endilöngu og stórskemma Teigskóg, stærsta birkiskóg Vestfjarða og mikilsverðan hluta í því verðmæta lífríki og náttúrufari sem er aðall Breiðafjarðar. 

Menn kusu hins vegar að fara strax ofan þær í skotgrafir með þetta mál að stilla því þannig upp að ekkert annað kæmi til greina en að fórna Teigsskógi.

 

Heilsársvegur milli norður- og suðursvæðis

Athugasemdir

[Sævar Helgason, 28.11.2009 kl. 23:00]

"Á sínum tíma voru færð að því ágæt rök hvernig hægt væri að koma leiðinni milli Þorskafjarðar og Kollafjarðar í gott horf án þess að rista upp eftir endilöngu og stórskemma Teigskóg, stærsta birkiskóg Vestfjarða og mikilsverðan hluta í því verðmæta lífríki og náttúrufari sem er aðall Breiðafjarðar. 

Menn kusu hins vegar að fara strax ofan þær í skotgrafir með þetta mál að stilla því þannig upp að ekkert annað kæmi til greina en að fórna Teigsskógi."

Já, þetta er ömurlegt dæmi um þvergirðingshátt  . Á þessum stað er allt annað betra en rústun Teigsskógar .   

[Axel Jóhann Hallgrímsson, 28.11.2009 kl. 23:18]

Vestfirðingar virðast alltaf hafa verið afgangsstærð í samgöngumálum. Ég kom fyrst á Vestfirði 1973. 

Það liðu svo 20 ár áður en ég fór þarna um aftur. Það sem vakti athygli mína var að vegirnir höfðu nánast ekkert breyst á þessum tíma ef frá eru taldir fáeinir kílómetrar af einbreiðu malbiki. 

Þessi einbreiða malbiksstefna Vegagerðarinnar var til bölvunar því hún frestaði enn frekar vitrænum úrbótum.

Enn sitja Vestfirðingar á hakanum.

[Offari, 28.11.2009 kl. 23:40]

Þingmenn hér þrjóskir og tregir

þvergrirðngsháttur þeim kær.

Ófærir vestfirskir vegir

virðist sem fortíð sé nær.