Munaði 10 vörðum skotum í fyrri hálfleik.

Fyrri hálfleikur í leik Íslands og Tékklands í dag verður líklega í minnum hafður að endemum. 

Fyrsta þriðjung hans skoruðu Tékkar mark á hverri mínútu og hefðu með sama áframhaldi skorað 60 mörk í leiknum! 

Í hálfleik hafði tékkneski markvörðurinn varið 17 skot ef ég man rétt en hinum megin á vellinum var samsvarandi tala 10 mörkum lægri. Sá Tékkneski var þegar í fyrri hálfleik með svipaðar tölur í vörðum skotum og samanlagt í öllum leikjum liðsins fram að því! 

Ísland virðist nú vera orðinn óskaandstæðingur markvarðanna á mótinu, því að þeir eru menn leiksins í hvert sinn. 

Það þýðir ekki einungis að þetta séu góður markverðir heldur hitt að þeir fá auðveldari skot að verja en í öðrum leikjum. 

Það hefur löngum loðað við íslenska landsliðið á stórmótum að þurfa endilega að fara erfiðustu leiðina til að komast áfram. 

En sjaldan hefur sú leið orðið eins erfið og nú og í þetta sinn getur komið sér illa að hafa ekki krækt sér í bæði stigin í leiknum gegn heims- og Evrópumeisturum Frakka fyrir tveimur dögum, þar sem engu var líkara en að það væri allt annað lið inni á vellinum en nú. 

Þetta minnir á það þegar Íslendingar, alveg með óþekkt lið, unnu sjálft silfurlið Svía á HM 1964 með því að nýta sér "leynivopnið" Ingólf Óskarsson, en tapa síðan óvænt næst á eftir fyrir Ungverjum. 

Risatap gegn Tékkum

Athugasemdir

[Þorsteinn Briem, 22.1.2015 kl. 20:27]

Aldrei að treysta íslenska handboltalandsliðinu.

Þegar búist er við að liðið vinni tapar það leiknum og öfugt.

[Gunnar Th. Gunnarsson, 22.1.2015 kl. 20:28]

Aron á að hætta. Gott hjá Einari Erni þegar hann spurði um skýringar og Aron svaraði hvað klikkaði. Þá sagði Einar: "Þetta eru staðreyndir, en hver er skýringin?"

Aron hafði engin svör. Hann nær ekki stemmara í liðið (nema á móti Frökkum)

Burt með Aron

[Haukur Kristinsson (IP-tala skráð) 22.1.2015 kl. 20:34]

Þetta var ekki nógu gott hjá strákunum okkar. Kannski ætti þjálfarinn að nota aðra taktik svo betri árangur náist. Sjá myndband.

https://www.youtube.com/watch?v=SIesUrDytT8

[Jóhann (IP-tala skráð) 22.1.2015 kl. 22:06]

Það er eitt að telja fram gamalkunnug sannindi um hlutverk markvörslu.

Þetta var einfaldlega andlegt hrun.

Aron Kristjánsson er enginn leiðtogi, því miður. Ekkert charisma...

[Gunnar Th. Gunnarsson, 22.1.2015 kl. 22:59]

Að falla út í umspili í fyrra sumar gegn miðlungs liði átti að vera næg viðvörun.

[Ómar Bjarki Kristjánsson, 23.1.2015 kl. 00:16]

 Jaá, ástæðan fyrir því að sá tékkneski varði svona mikið var aðallega vegna þess hve tékkneska vörnin neyddi oft íslensku sóknarmennina í slæma skotstöðu.

Það var ekkert í gangi í sókninni hjá Íslandi.  Allt of mikið sótt inná miðsvæðið þar sem hávaxin vörn blokkar flest.

Það er eins og Siggi Sveins sagði, að það er enginn í liðinu sem getur skorað af 9 metrunum.   Lið verða að geta það.  Haft það sem hluta af vopnabúrinu.

Þeir voru barasta ekkert að skora fyrir utan þeir íslendingarnir.  Tékkar gátu því bakkað bara aftur á nánast 6 metrana og lokað á allt línu og hornaspil léttilega.

Það er náttúrulega ljóst að liðið missti mikið þegar Óli Stef hætti að spila í Landsliðinu.   Hann var bara svo mikill prímusmótor hann Óli.   Það snerust allar aðgerðir svo ikið um hann.  Þar var upphafið, bæði í vörn og sókn.

Má segja að alveg sé eðlilegt að brotthvarf Óla skilji eftir skarð um tíma.

[Ómar Ragnarsson, 23.1.2015 kl. 15:33]

Tékkarnir ógnuðu utan af vellinum og voru með mjög hraðar færslur fram og til baka á sama tíma sem Íslendingar voru með mun meiri færslu til hliðanna.