39 m/sek á Sauðanesvita, 37 við Sauðárflugvöll.

Mestu hviður sem hafa sést á veðurstöðvum landsins í kvöld eru 39 m/sek á Sauðanesvita vestan við Siglufjörð og á veðurstöð á Brúaröræfum, sem 3km frá Sauðárflugvelli.

Þetta eru snörpustu hviðurnar þar í vetur, en lítil hætta á skemmdum, því að snjór er orðinn það mikill á þessum árstíma, að hann heldur yfirleitt öllu niðri, eins og meðfylgjandi mynd sýnir, en hún er reyndar tekin í apríl 2013 af flughlaðinu á miðjum velli, og er rauði bletturinn "flugstöðin", Ford Econoline húsbíll árgerð 1978.

Báðir þessir vindhraðar eru yfir mörkum fárviðris.

Hviður geta farið upp í 50 metra

"Jón Arason og synir hans." Halló?!!

Ólafur Sigurðsson fréttamaður hafði gaman af að segja þá sögu af föður sínum, sem var vígslubiskup í Skálholti, að hann hefði hvað eftir annað lent í vandræðum með að kynna staðinn og sögu hans fyrir erlendum gestum.

Ástæðan var sú, að sögulegt gildi merkustu minja þessa mikla sögustaðar féllu í skuggann fyrir einni setningu, sem hinum erlendu menn fannst það furðulegasta og raunar merkilegasta á staðnum var áletrun þar sem greint var frá því að þar hvíldi í gröf síðasti kaþólski biskupinn fyrir siðaskipti, "Jón Arason og synir hans."

Halló! Kaþólskur biskup og synir hans! 

Fylgdi sögunni að Sigurður vígslubiskup þurfti að hafa sig allan við að útskýra, hvernig þetta hefði verið hægt.

Í nánu sambandi við gifta konu

Ku Klux Klan vildi verja "hinn engilsaxneska uppruna Bandaríkjamanna."

Það er ekki nýtt að einkennisklæddir félagsmenn samtaka, sem andæfa innflutningi á fólki, taki að sér að vernda heimamenn fyrir innflytjendum eins og nú er að gerast í Noregi og Finnlandi.

Þetta gerði Ku Klux Klan í Bandaríkjunum og taldi þetta verndarhlutverk sitt nauðsynlegt til að vernda hinn engilsaxneska mótmælendatrúaruppruna Bandaríkjamanna.

Stefnuskrá Ku Klux Klan kvað á um að viðhalda siðrænum kristnum gildum í þjóðfélaginu og hreinsa það af óæskilegum framgangi kaþólskara, Gyðinga og annarra trúarbragða, sem ekki féllu undir kristna mótmælendatrú.

Hermenn Óðins með strandhögg í Noregi

Því meira sem við vitum, því betur sjáum við hvað það er lítið.

"...enginn stöðvar tímans þunga nið..." er sungið í laginu "Sjá dagar koma."

Tíminn er næstum við því óskiljanlega stórt fyrirbæri, - hann byrjaði aldrei og hann mun aldrei taka enda.

Þekkt eru orð eins af fremstu vísindamönnum síðustu aldar þess efnis, að því meira, sem hann uppgötvaði og lærði um, því minna fyndist honum hann vita þegar hugsað væri til þess, hve lítil, já nánast örsmá þessi ógnarþekking hans væri, miðað við allt það sem mönnum væri hulið og þeir vissu ekki.

Og það er eins og því stærri og mikilfenglegri sem hver uppgötvun sé, því enn stærri og mikilfenglegra séu þau viðfangsefni sem í ljós kemur að fást þurfi við í framhaldinu.

Uppgötvunin „magnað afrek“

"Bílvelta varð" þrisvar.

Bíll valt undir Ingólfsfjalli í morgun. Í örstuttri frétt af þessu á mbl.is tekst blaðamanninum að tönnlast á orðinu "bílvelta" þrisvar, þar af tvisvar með því að segja "bílvelta varð" sem inniheldur tvöfalt fleiri atkvæði en ef sagt væri "bíll valt."

Næsta skref í þessu einkenni orðalenginganna sem fylgir nafnorðasýkinni í þessari frétt gæti falist í svona frétt um aðeins stærra ímyndað slys:

 

Hraðakstur varð við Sandskeið í morgun þegar hvassviðri varð og hliðarskrið varð þegar stjórnleysi varð hjá bílstjóranum svo að útafakstur varð og bílvelta varð og stóráverkar urðu.

Útkallsakstur varð hjá lögreglu og sjúkraflutningur varð þegar þyrluútkall og innlögn urðu á Borgarsjúkrahús þar sem uppskurður varð.

Eftiratvikumlíðan varð hjá sjúklingnum.  

 

Á mannamáli:

 

Bill skrikaði til í hraðakstri í hálku og hvassviðri á Sandskeiði í morgun, lenti útaf veginum og valt. Bílstjórninn slasaðist talsvert.

Lögregla kom á vettvang og hinn slasaði var fluttur með sjúkrabíl á Borgarsjúkrahúsið þar sem hann var skorinn upp og er líðan hans eftir atvikum.

Í seinni textanum eru sex sagnir, sem nafnorðasýkin hefur útrýmt í feitletraða textanum á undan og komnar inn tólf málalengingar, sem myndaðar eru á sama hátt og "bílvelta varð."   

Bílvelta undir Ingólfsfjalli

Heggur sá er hlífa skyldi?

Allir þeir útlendingar sem ég hef hitt á langri ævi hafa verið hrifnir af íslensku nafnahefðinni, sem byggist ekki aðeins á því að fornafnið er aðalnafnið, heldur líka því að ættarnöfn eru frekar fátíð, fólk kennt við föður og leyfilegt að kenna sig við hvort tveggja, föður eða móður, bæði eða annað að ósk.

Til lítils hefur verið barist af dugnaði og eldmóði fyrir því að íslenskt knattspyrnulandslið komist í fyrsta sinn á stórmót, ef guggna á á því að viðhalda þessari hefð á búningum landsliðsmanna.

Rétt eins og frægir erlendir leikmenn hafa fengið að skrá nöfn eins og Pele á búninga sína, á KSÍ að krefjast þess að eiginnöfn íslensku leikmannanna verði á treyjum þeirra á EM.

Íslendingar hafa vakið athygli á ýmsum sviðum varðandi forystu í mannréttindum og skora verður á KSÍ að standa nú í lappirnar og nýta þetta fína tækifæri til að kynna mannanafnahefð okkar á áberandi hátt.

Lyppist stjórn KSÍ niður í þessu máli og samsinni erlendu valdi, gildir hið fornkveðna um hana að heggur sá er hlífa skyldi.   

Vilja eiginnöfn á landsliðstreyjur

Stefna Pútíns: Hingað og ekki lengra.

Á fundi leiðtoga Bandamanna í Seinni heimsstyrjöldinni skiptu Stalín, Roosevelt og Churchill Evrópu upp í áhrifasvæði.

Sú skipting leiddi af sér tilvist járntjaldsins og óbreytt áhrifasvæði í næstum hálfa öld, hvernig sem allt veltist.

Stalín lyfti ekki litla fingri til að styðja kommúnista í Gríkklandi 1946 og Vesturveldin aðhöfðust ekki þegar Rússar réðust inn í Ungverjaland 1956 og Tékkóslóvakíu 1968 og bældu niður uppreisnir í Austur-Þýskalandi 17. júní 1953 og í Póllandi í lok áttunda áratugarins.

Gilti engu um það ógnarstjórn Stalíns eða kúgunaralræði eftirmanna hans.   

Pútín telur að Vesturveldin undir forystu George Bush eldri og Helmuth Kohl, hafi gengið á bak orða sinna varðandi skiptingu Austur-Evrópu eftir fall Sovétríkjanna og hvað sem menn segja um utanríkisstefnu Pútíns er ljóst, að varðandi skiptinguna í áhrifasvæði við vestur- og suðurlandamæri Rússlands, er stefna hans nú :  Nú er nóg komið, - hingað og ekki lengra.

Í Kalda stríðinu voru Egyptaland, Sýrland og Líbía á áhrifasvæði Sovétríkjanna en Ísrael, Sádi-Arabía og Jórdanía lengst af á áhrifasvæði Bandaríkjanna.

Eftir innrás Bandaríkjamanna í Írak 2003 telja Kanar það land greinilega vera á sínu áhrifasvæði, og eftir sátt Sadats við Begin einnig Egyptaland.

Með stuðningi við svonefnt "Arabískt vor" eygðu Bandaríkjamenn möguleika á að vinna Líbíu og Sýrland á sitt band.

Pútín stóð frammi fyrir því að síðasta trygga vígi Rússa í Miðausturlöndum, Sýrland, félli.

Þetta gerðist á svipuðum tíma og Úkraína virtist á fullri ferð inn í ESB, og augljóst er á gerðum Pútíns á Krímskaga og síðar í Sýrlandi, að stefna hans er:  Nú er nóg komið, - hingað og ekki lengra.

Menn geta haft misjafnlegar skoðanir á Pútín og Assad, stjórnarháttum þeirra og gerðum, en miðað við það hvernig áhrifasvæðum var skipt mest allan síðari hluta 20. aldar, er skiljanlegt að þeim finnist svipað eigi að gilda nú, og að Bandaríkjamenn eigi ekkert með það að raska frekar en orðið er áhrifasvæðum í Miðausturlöndum.  

Harðar ásakanir gengu á víxl

Fyrr má nú vera forréttindatæki.

Það líður ekki sá dagur að allir verða vitni að endalausri farsímanotkun í umferðinni og aldrei hefði mig órað fyrir því þegar ég gerðist einn fyrsti notandi þessa tækis hér á landi, að þetta yrði að þvílíku forréttindatæki, sem það er orðið.

Sögurnar eru óteljandi. Frænka mín ein axlarbrotnaði illa við það að bílstjóri, sem var að senda skilaboð, ók á fullri ferð aftann á bíl hennar þar sem hún stöövaði hann við rautt ljós á gatnamótum.

Hún er enn, ári síðar, hvergi nærri búinn að jafna sig, og gerir það kannski aldrei, varð að fara í sérstaka aðgerð og láta rífa allt upp rúmum mánuði eftir brotið.

Síðast í fyrradag, í þéttri föstudagsumferð,  ók ég á eftir nokkrum bílum hér og þar, þar sem bílstjórarnir virtust vera með lítilli meðvitund um akstur sinn, fóru seint og illa af stað á ljósum, gáfu ekki stefnuljós og voru til trafala á annan hátt.

Þegar betur var aðgætt voru þessi bílstjórar allir á kafi í símanotkun.

Það er kominn tími til þjóðarátaks í bættri símanotkunn, við þurfum að líta í eigin barm og setja okkur almennar siðareglur, sem eru einfaldlega nauðsynlegar og skynsamlegar.

1. Það viðfangsefni, beint viðtal við manneskju, akstur eða annað, sem verið er að fást við þegar síminn hringir eða gefur merki um skilaboð, verður að hafa forgang. Það er frekja og dónaskapur þegar hringjandi og svarandi ryðjast inn í beint samtal eða krefjandi verkefni.

2. Það er yfirleitt hægt að sjá á símanum eftir á úr hvaða númeri er hringt og gera ráðstafanir til að svara því þegar um hægist, til dæmis með því einfaldlega að stöðva bílinn, eða ljúka erindinu við þann sem verið er að tala við beint eða afgreiða. Þeir sem hringja úr leyninúmerum verða sjálfir að taka afleiðingunum af því ef það verður til þess að ekki er hægt að sjá eftir á, hver hringdi.

Farsímanotkun í akstri er líklega orðin jafn alvarleg ógn við umferðaröryggi og ölvun. Farsímanotkunin er lúmskari vegna þess að ölvun má oftast sannreyna eftir á, en erfiðara er um vik varðandi farsímanotkunina.

Nú rétt í þann mund sem verið er að skrifa þennan pistil er sagt í fréttum frá því að rokkhljómsveit og umboðsmaður hennar, alls fimm menn, hafi farist við það að bíl þeirra var ekið í gegnum vegatálma við skipaskurð og hrapaði meira en 20 metra fall ofan í skurðinn.

Ekkert er enn vitað um ástæður slyssins, en miðað við svo margt annað, sem er á seyði í umferðinni ætti ekki að útiloka farsímanotkun þegar slysið verður rannsakað.

 

„Lagði símann frá sér einu sinni“

Högni og Glowie ógleymanleg. Á disk með þetta!

Útfærsla Högna Egilssonar og Glowie á laginu "All out of luck" var það sem stóð upp úr í Söngvakeppnisþættinum í kvöld.

Sýndi ekki aðeins hvað lagið er gott heldur líka hvernig sannir listamenn geta lyft góðu lagi og texta enn hærra með snilldartúlkun og efnistökum.

Mann langaði strax til að fá að heyra og sjá þetta aftur og gamalkunnug orð komu upp í hugann:

Á disk með þetta!

Eftir þetta seinna kvöld hefur nagandi efi um gengi okkar í Júróvision 2016, sem settist að eftir fyrra kvöldið, minnkað.

Upplesin glærusýning í söngvakeppninni?

"Heimsendaspámenn" höfðu áhrif á einum vettvangi.

Þeir eru mjög margir sem stimpla alla þá, sem hafa eitthvað við lifnaðarháttu okkar að athuga, sem "heimsendaspámenn" og þessir menn andmæla í einu og öllu að neinu þurfi að breyta varðandi umgengnina við jörðina, náttúru hennar og auðlindir.

Á forsendum slíkra allsherjar andmæla var andæft gegn því fyrir um fjórum áratugum að neitt væri athugavert við það að hið verjandi óson væri að eyðast af mannavöldum.

Fráleitt væri að neitt væri athugavert við notkun úðabrúsa, svo að dæmi séu tekin um umræðurnar.

Einn af slökkviliðsstjórum landsins sagði í viðtali við mig fráleitt að draga úr notkun halogens, enda væru mörg mannslíf í veði í brunum varðandi notkun þess í slökkvitækjum.

Ekki bólaði á því í hugsun hans að margfalt fleiri mannslíf væru í veði ef ósonlaginu yrði eytt.  

Þrátt fyrir þetta var gripið til ráðstafana, sem drógu úr hættunni á slíkri allsherjar eyðingu ósonsins, en hafa þó ekki komið nægilega í veg fyrir minnkun þess.

Óvenjulágt óson yfir Íslandi