Gengur grátlega hægt.

Metanvæðing íslenska bílaflotans gengur grátlega hægt. Þetta er sú breyting á orkunotkun fyrir bílaflotann sem gefur mikinnn ávinning umhverfislega séð, orkugjafinn er innlendur og þetta liggur langbeinast við, því að eftir sem áður geta metanbreyttir bílar gengið á bensíni og því er sú mótbára, að ekki sé hægt að vera frjáls að því að aka eins langt og þurfa þykir, ekki fyrir hendi.

Á metanbreyttum bíl eru bæði bensíngeymir og metangeymir og þegar metanið þrýtur er einfaldlega skipt yfir á metanið. Þegar metanstöð er komin á Akureyri verður það stórt stökk framávið. 

Það er ágætt millistig yfir í aðra nýja orkugjafa að knýja sjöttung bílaflotans með metani, en miðað við þá tiltölulega örfáu bíla sem komnir eru í umferð, gengur þetta grátlega hægt. 

Metan gæti knúið 30.000 bíla

Eyddi tölvutæknin ástæðunni?

Ósýnilegt blek kann að hafa orðið mikilvægt í afmörkuðum tilfellum fyrir tæpri öld og því ástæða fyrir þá, sem bjuggu yfir vitneskju til að búa það til, að láta leynd hvíla yfir formúlunni fyrir gerð þess.

Og kannski væri þetta enn svona, ef tæknin hefði staðið í stað allan þennan tíma. 1976 hafði lítið breyst í þeim efnum en á síðustu áratugum hefur tölvutæknin og allt sem henni viðkemur áreiðanlega breytt þessu og það að "fótósjoppa" aðeins eitt af þeim brögðum sem notuð eru á okkar tímum til að falsa staðreyndir eða brengla þær. 

CIA birtir gömul leyniskjöl

Að verða líka 10 árum eldri.

Það er svolítið öfugsnúið að tala um að konur geti orðið tíu árum yngri á tíu vikum. Í fyrsta lagi er þetta ekki hægt í raun þó að þetta sé orðað svona. Auk þessi er skrýtið af hverju það eru bara konur, sem eiga að reyna þetta.

Með því er verið að leggja ofuráherslu á æskudýrkun kvenna og ríghalda í óraunhæfa líkamlega æsku í stað þess að orða þetta þannig, að verið sé með tíu vikna átaki að koma þátttakendum í þessu átaki í jafngott jákvætt andlegt og líkamlegt ástand og eins og það var tíu árum fyrr. 

Þótt konur séu komnar á miðjan aldur geta þær verið enn meira heillandi en nokkru sinni fyrr, þrátt fyrir nokkrar hrukkur og önnur merki um að aldurinn sé að færast yfir. 

Slík þroskamerki finnst mér jákvæð en ekki neikvæð og aðalatriðið fólgið í því að lengja líf sitt um tíu ár með heilbrigðara líferni og jákvæðri hugsun.

Ég myndi því breyta spurningunni: "Langar þig til að verða 10 árum yngri" í: "Langar þig til að verða tíu árum yngri og lifa tíu árum lengur?" 

Langar þig að verða 10 árum yngri?

Finnska leiðin.

Þegar Finnar lentu í miklum þrengingum við fall Sovétríkjanna sem tók frá þeim gríðarlegan útflutning þangað, fóru þeir þá leið er þeir gengu í ESB að leggja áherslu á uppbyggingu menntakerfis og þekkingariðnaðar landsins og nýttu stuðnin ESB fyrst og fremst til þess.

Portúgalar voru hins vegar spenntastir fyrir uppbyggingu samgöngumannvirkja og verktakaiðnaðar með tilheyrandi fjölgun starfa við það. 

Þessa sér stað í mörgum góðum og nýjum vegum í Portúgal en hins vegar er þjóðinn enn að mörgu leyti svo mikið á eftir öðrum Evrópuþjóðum hvað snertir menntunarstig og því sem því tengist, svo sem tölvueign og slíku, að Portúgal er enn við þröskuld þess að teljast þróunarland á ýmsum sviðum. 

Það er ekki tilviljun að Finnar spjara sig um þessar mundir en Portúgalir eru á heljarþröm og þráuðust lengi við að viðurkenna ástandið. Finnska leiðin hefur reynst betur og engin furða að Finnar séu ekki spenntir fyrir því að leggja í púkk með öðrum ESB-þjóðum til að bjarga Portúgölum út úr þrengingum þeirra. 

Öllum undir 25 ára tryggð skólavist

Málið er ekki einfalt.

Hver sá, sem kjörinn er til trúnaðarstarfa verður að hafa í huga vlja þeirra sem kusu hann.

Nýlegt dæmi um þetta er sá hluti yfirlýsingar Salvarar Nordal þegar hún þáði að taka sæti í Stjórnlagaráði, að miklu hefði ráðið vilji þeirra sem  kusu hana til þess starfs.

Sama verð ég að segja um mína afstöðu. Ég fékk þau ákveðnu viðbrögð eftir á frá mörgum af þeim ca 24 þúsund kjósendum sem settu mitt nafn á kjörseðil að þeim líkaði ekki að vilji þeirra yrði hundsaður. 

 Meginatriðið er þó ávallt sannfæring og samviska þess sem kosinn er.

Í stjórnarsamstarfi tveggja flokka getur hvorugur aðilinn ætlast til þess að stefna síns flokks gildi í einu og öllu og að því leyti er það óbilgjarnt ef krafist er að stefna VG ríki á öllum sviðum stjórnarsamstarfsins og að samþykktir landsfundar flokksins eigi að gilda skilyrðislaust í allri stefnu og störfum ríkisstjórnarinnar. 

Á hinn bóginn geta menn verið óánægðir með þau býti sem hvor flokkur um sig hefur út úr samstarfinu og við sjáum að það sveiflast sitt á hvað í hinum ýmsu málum. Í slíkum efnum sýnist ákvæði stjórnarsáttmálans eiga að vera það sem aðilar standi við en óánægjan getur samt orðið nógu mikil til að valda erfiðleikum í stjórnarsamstarfinu. 

Þannig hefur andstaða Jóns Bjarnasonar og fylgismanna hans tafið fyrir sameiningu ráðuneyta, sem þó var atriði í stjórnarsáttmálanum en á hinn bóginn vitnar Samfylkingarfólk í það atriði stjórnarsáttmálans að ljúka aðildarumsókn að ESB og láta þjóðina síðan skera úr um niðurstöðuna í þjóðaratkvæðagreiðslu. 

Ásmundur Einar Daðason var valinn sem frambjóðandi VG í Norðvesturkjördæmi af ákveðnum fjölda fylgismanna VG í kjördæminu. 

Ég er ekki kunnugur því hve margir þeirra voru á Akranesi og að hve miklu leyti hann telur sig þurfa að taka tillit til ályktana einstakra félagasamtaka innan VG í kjördæminu. 

Hann hlýtur einnig að taka tillit til þess að "órólega deildin" svonefnda verður ekki bundin við einstök kjördæmi heldur er vafalaust um að ræða klofning á landsvísu. 

 Sé svo telur hann vafalítið að hann sé fulltrúi óánægjuradda innan VG á landsvísu og geti að því leyti varið það fyrir þeim hluta flokksins að hann segi sig úr þingflokki hans. 

Málið er ekki einfalt við svona aðstæður og samkvæmt eiði þeim sem þingmenn sverja í samræmi við ákvæði og anda stjórnarskrár verður það ávallt sannfæring og samviska viðkomandi þingmanns, sem verður að ráða. 

Skora á Ásmund Einar að segja af sér

Með illu skal illt út reka?

"Með illu skal illt út reka" segir máltækið og er þá átt við það, að ef ekki  duga nein vettlingatök geti neyð orðið til þess að grípa verði til afgerandi ráða, þ. e. oft verði að gera fleira en gott þykir.

Ofþyngd er ekkert gamanmál, heldur um að ræða eitt stærsta heilbrigðisvandamál heimsins.

Þegar hún er komin á hátt stig verður ástandið oft þannig, að engin leið er að sleppa billega úr klóm hennar nema að velja á milli tveggja kosta: Að láta ástandið versna með þeim slæmu afleiðingum, sem af því hlýst, - eöa - grípa til þeirra ráða, sem duga og láta sig hafa óþægindin og erfiðleikana, sem ganga verður í gegnum.

Móðir mín heitin kenndi mér ágætt orðtak, sem stundum er hollt að hafa í huga, þegar staðið er frammi fyrir svona vandamáli, þ. e. "að láta sér leitt ljúf þykja."

Þetta er heimspeki Pollyönnu eða hugsun dægurlagatextanna "Pretend" og "Smile".

Þegar um enga góða kosti er að ræða verður að sætta sig við það leiða val að velja þann kost sem er illskástur.

Uppákomurnar í þáttum Loga og Einars þjóna vafalaust tvíþættum tilgangi: 1. Að vekja athygli á þáttunum og umræðu um þá.  2: Að vera ekki að fegra viðfangsefnið á óraunsæjan hátt.

Hvort tveggja er fyllilega verjandi að mínum dómi og framtakið þarft, einkum hjá Einari Bárðarsyni sem verður að bera þann þunga kross, sem hann er smám saman að hafa mikið fyrir að létta.

 

Skiljanlegt í ljósi sögunnar.

Það er skiljanlegt að Finnum svíði það að þurfa að vera í hópi þeirra þjóða sem hlaupa undir bagga með þjóðum, sem hafa klúðrað fjármálum sínum.

Líklega er leitun að þjóð sem hefur sýnt annan eins styrk og og einbeitni í að bjarga málum sínum myndarlega af eigin rammleik og Finnar hafa gert þegar syrt hefur í álinn.

Þeir voru skyldaðir til að borga svimandi háar stríðsskaðabætur eftir heimsstyrjöldina og gerðu það af slíkum glæsileik að hliðstæður finnast varla.

Aðeins sjö árum eftir lok seinni heimsstyrjaldarinnar héldu þeir glæsilega Ólympíuleika í Helsinki.

Þegar Sovétríkin hrundu stóðu þeir frammi fyrir einhverju mesta útflutnings- og utanríkisverslunarhruni sem dæmi eru um en tóku á því af aldeilis einstæðri hreysti, - jafnvel um of, því að við það skapaðist óþarflega mikil neyð á velferðarsviði þeirra á tímabili.

Finnar eru greinilega mikil baráttuþjóð og taka því ekki sem gefnu að halda uppi sjálfstæðu og öflugu velferðarþjóðfélagi. Þeir hafa vanist því að þurfa að berjast fyrir hlutunum og vera að því leyti "Sannir Finnar".

Finnar tala um byltingu

Þegar kviknaði í húsinu okkar.

Gamlar bernskuminningar lifna við að fá um það skeyti að allar stöðvar hafi sent bíla til að fást við eldsvoða á Laugavegi 81.

Þegar ég var fimm ára var fjölskyldan nýflutt í splunkunýtt hús að Stórholti 33. Einn daginn brá svo við að eldtungur stóðu upp úr reykháf hússins og var auðvitað hringt á slökkviliðið sem kom með hraði.

Þetta var ekkert grín, því að í risi hússins voru fjögur lítil súðarherbergi með þurrum og eldfimum texskilrúmum, sem gátu fuðrað upp á augabragði ef eldur komst í þau.

Slökkviliðsmenn þustu því upp í risið til að stöðva eldinn þar, ef hann væri að breiðast þar út.

Í ljós kom að eldurinn var bundinn við reykháfinn einan og hafði kviknað vegna þess að gleymst hafði að rífa timburmótin innan úr honum.

Á þessum árum voru hús kynt með kolum og eldurinn úr kolamiðstöðinni í kjallaranum hefði læst sig upp í timburmótin í reykháfnum!

Ég man vel hvað þetta var mikið uppistand í heimilislífinu og hvað þetta þótti neyðarlegt í alveg spánnýju húsi. Ennfremur hvað það var skrýtið að mikill mannfjöldi safnaðist saman við húsið okkar til að fylgjast með "eldsvoðanum".

Móðir mín gantaðist með það eftirá að henni fannst skrýtið hvað slökkviliðsmönnumum var starsýnt á hana og var að velta því fyrir sér, hvort þeir væru virkilega að veita konum athygli frekar en að vinna störf sín.

Þegar hún leit í spegil eftir að mestu lætin voru að baki, áttaði hún sig á því hvers kyns var.

Þegar hún hafði farið að kanna ástandið við upphaf "eldsvoðans" varð andilt hennar þakið sótblettum svo að hún varð útlits eins og trúður!

Valdið sprettur upp úr olíunni.

Bismarck sagði á sínum tíma að valdið og þar með árangurinn sprytti fram úr byssuhlaupunum. Þessu trúðu Þjóðverjar á bæði skiptin sem þeir fóru í heimsstyrjöld og lærðu dýrkeypta lexíu.

Öll valdapólitík heimsins í bráðum heila öld hefur byggst á yfirráðum yfir auðlindum jarðar, beint og óbeint. Og þar hefur olían leikið æ stærra hlutverk og nú er svo komið að allt stendur og fellur með henni. 

Mér finnst reyndar Donald Trump vera meira aðhlátursefni en sú utanríkisstefna, sem Bandaríkin reka nú gagnvart Arabalöndunum, sem búa yfir mestöllum olíulindum jarðarinnar. 

Það er stefna í anda George Bush eldra, sem vissi, að valdið sprettur upp úr olíulindunum en ekki fram úr byssuhlaupunum eins og Trump heldur fram. 

Hættan á að missa málin úr böndum í Líbíu er fólgin í því hve viðkvæmt það er fyrir nýlenduveldin vestrænu (þau reka nýja nýlendustefnu í stað hinnar gömlu) að beita of áberandi hernaðarmætti í einu af Arabalöndunum. 

Sams konar tilfinning bærist vafalaust í arabískum hjörtum gagnvart vestrænum hernaði á arabískri gund og myndi bærast í hjörtum Evrópu- og Ameríkumanna ef arabiskum hernaðarmætti væri beitt í Evrópu eða Norður-Ameríku. 

Bandaríkin verða að taka tilliti til þessa og því finnst mér hin byssuglaða mikilmennskustefna Donalds Trumps grátbrosleg, - ekki varfærin stefna Obama. 

Bandaríkin aðhlátursefni heimsins

Allt norður til Íslendingabyggða.

Við Íslendingar erum blessunarlega lausir við það fyrirbæri sem kallað er skýstrokkar. Strokkarnir, sem nú fara hamförum í Bandaríkjunum eru að vísu í syðri ríkjunum en þeir geta geysað allt norður til Íslendingabyggða í Norður-Dakota og valdið þar miklum usla.

Fyrir rúmum áratug fór einn slíkur yfir byggðina í Mountain í Norður-Dakota og lagði þar hús í rúst, sem Íslendingar áttu heima í og ég ræddi við fólkið skömmu síðar og sá verksummerki. 

Einnig fór mikill skýstrókur yfir Salt Lake City einum degi áður en ég kom þangað og var erfitt að trúa því hve mikill eyðingarmáttur getur verið í svona skýstrokk þegar horft er á afleiðingarnar. 

Við Íslendingar eigum nóg með eldgos, jarðskjálfta og fleira og megum þakka fyrir að skýstrokkar ná ekki slíku afli hér og erlendis. 

45 látnir eftir hvirfilbylji