Meira að segja Lilja ergir Trump.

Það er athyglisverð frétt, sem þessi bloggpistill er tengdur við.

Lilja Alfreðsdóttir leggur fram skýrslu um efnahagslegar afleiðingar  loftslagsbreytinga á norðurslóðum á fundi þingmanna NATO sem hefði verið samþykkt einróma ef fulltrúi langvoldugasta ríkisins hefði ekki lagst á móti henni. 

Greinilegt er að Donald Trump er svo mikið í mun að ekki verði haggað við því, sem hann hefur lýst sem því að að "gera Ameríku mikla á ný" að leitað sé uppi hvert tilefni til þess að afneita loftslagsbreytingum og afleiðingum þeirra. 

Sem þýðir einfaldlegra að Kaninn ríghaldi áfram í hina klassíku ábyrgðarlausu ofnýtingu hverra þeirra auðlinda sem hægt er að seilast í til þess að þjóna þeirri skammtímagræðgi sem er að verða helsta ógn við komandi kynslóðir.  

Skýrsla Lilju samþykkt hjá NATO

Stóri vandinn: Tvær stórar andstæðar fylkingar.

Stærsti vandinn varðandi átök um sjálfstæði Katalóníu er sá, að íbúar Katalíníu skiptast í tvær algerlega andstæðar fylkingar, stál í stál.

Þessar fylkingar virtust nokkuð jafnstórar þegar kosið var um sjálfstæði í ráðgefandi þjóðaratkvæði.   

Þarna er um að ræða dæmi um þann vanda sem getur orðið og hefur orðið við svona aðstæður. 

Afleiðingarnar hafa sums staðar orðið slæmar, svo sem á Norður-Írlandi á seinni hluta síðustu aldar. 

Í Færeyjum urðu ekki slík átök þótt þar væru fylkingar næstum jafnstórar, en fullt sjálfstæði fengu Færeyingar ekki. 

Blóðug borgarastyrjöld geysaði á Spáni 1936-39 og sárin eru ekki gróin. Harkalegar aðgerðir lögreglu um daginn ýfðu þessi ráð upp og vonandi kemur ekki til þess að til vopnaðra átaka komi. 

Það verður afar erfitt að ná samkomulagi á milli deiluaðila en sá kostur, að borgarastyrjöld brjótist út, ætti ekki að vera í boði. 

 

Þjóðhátíðarstemning á mótmælunum

Mesta súrnun í milljónir ára.

Nú á sér stað mesta og hraðasta súrnun sjávar í milljónir ára. Í Ástralíu eru methitaárin frá þessari öld orðin að meðalárum og ný methitaár taka við. 

Á mbl.is er frétt um von á meira en 50 stiga hita þar í landi. 

Það er varla hægt að segja að haustið sé enn komið hjá okkur, þótt skammt sé í kuldann sem hraðminnkandi Grænlandsjökull gefur.  

Ekkert af þessu og ótal öðru virðist hagga þeim sem ekki vilja viðurkenna neitt af þessu, kenna fölsuðum mælingum um og fullyrða að ofangreint sé allt lygi. 

Hvers vegna? 

Vegna hins árþúsundaára gamla fyrirbrigðis að ríkir eiginhagsmunir eru sama eðlis og ollu hinu fornkveðna að asni klyfjaður gulli kemst yfir hvaða borgarmúr sem er. 

Virkar fljótast.

Barnsfæðingum fer ört fækkandi og nálgast kreppuárin fyrir 80 árum. Húsnæðisverð hefur rokið upp og húsnæðisekla er mikil. 

Of mörg börn búa við fátækt og það misrétti sem stafar af því. 

Á sama tíma fjölgar eldra fólkinu mikið. 

Ýmislegt kemur til greina til þess að bæta ástandið en líklega virkar ekkert eins fljótt og að hækka barnabætur og það ríflega, þess vegna um helming. 

Það tekur tíma að auka húsnæði og það er flókið mál að koma þar inn með framlög. 

Stórfækkandi barnsfæðingar og öldrun þjóðarinnar mun hefna sín þegar fram í sækir af augljósum ástæðum. 

Fyndið er að sjá skrif manna, sem vilja fækka barnsfæðingum til þess "að apara útgjöld" en líka að loka landinu fyrir innflytjendum til frambúðar. 

Hver á þá að vinna öll störfin á þeim tíma sem atvinnuleysi er ekkert og það er hrópað á vinnandi hendur?

Barnabætur hafa verið stórhækkaðar áður og það gefist vel. 

Þannig hækkaði Viðreisnarstjórnin barnabætur mjög og í fyrsta sinn var borgað með öllum börnum, en þau fyrstu hjá hjónum ekki skilin eftir eins og verið hafði áður. 

Vill tvöfalda barnabætur

Úrslitin valda usla hjá andstæðingunum.

Með tapi fyrir Finnum dró ský fyrir sólu hjá því gullaldarliði, sem Íslendingar hafa eignast í knattspyrnu. Króatar og Tyrkir virtust vera með pálmann í höndunum. 

En síðan komu glæsilegur sigur á Króötum og enn magnaðri sigur á útvelli á Tyrkjum. 

Á sama tíma sýndi jafntefli Finna við Króata, að sigur þeirra á okkur hafði ekki verið einber tilviljun. 

Þetta hefur gerbraytt stöðunni í riðlinum og valdið miklum usla hjá þjóðunum, sem virtust hafa allt í hendi sér nokkrum leikjum áður til að stimpla það inn að þær væru með bestu liðin. 

Þegar litið er yfir feril íslenska liðsins fram að þessu, kemur í ljós að það hefur ekki tyllt sér á toppinn að ástæðulausu, heldur skilur hina öflugu andstæðinga eftir í sárum. 

Þjálfari Króata rekinn og aðstandendur tyrkneska landsins biðjast afsökunar á frammistöðu sinni. 

Fyrir þúsund árum fóru íslenskir víkingar bæði í vesturveg og austurveg og gerðu strandhögg, fór allt vestur undir það svæði, þar sem nú er New York og austur í Kænugarð. 

Sigurför knattspyrnulandsliðsins nú minnir á forna frægðartíma. 

Króatar reka þjálfarann fyrir lokaleikinn

Alþýðuflokkurinn 1979 - Björt framtíð 2017?

Alþýðuflokkurinn vann stærsta sigur sinn á vegferðinni 1916-1999 í kosningunum 1978, fékk 22% atkvæða og komst í þriggja flokka ríkisstjórn. 

Flokkurinn vann sigur sinn á grundvelli róttækrar umbótastefnu sem snerist að miklu leyti í kringum Vilmund Gylfason. 

Eftir umbrotasamt stjórnarsamstarf veturinn 1978 - 1979 sem endaði með því að Ólafur Jóhannesson hjó á hnútinn með svoefndum Ólafslögum vorið 1979, virtist ríkisstjórnin sigla lygnan sjó um sumarið. 

En þeð reyndist aðeins vera lognið á undan storminu, því að septemberkvöld eitt sprengdi félag Alþýðuflokkskvenna stjórnina óvænt á afar likan hátt og Björt framtíð gerði nú. 

Í kjölfarið voru haldnar kosningar í desemmber og þá tapaði flokkurinn miklu fylgi og lenti utan ríkisstjórnar í fjögur ár. 

Líkindin á milli þessara tveggja upphlaupa eru sláand þegar skoðaðar eru fylgistölur flokkanna núna, rúmum þremur vikum fyrir kosningar. 

Hvorki Viðreisn né Björt framtíð koma manni inn samkvæmt þessum tölum og eru ekki einu sinni nærri því. 

Nú er Jón Gnarr, einn af stofnendum Bjartrar framtíðar, stokkinn frá borði úr flokknum, en gefur frammistöðu hans í ríkisstjórn þó góð orð. 

Þetta er í stíl við sérstöðu Jóns, sem er óvenjulegur stjórnmálamaður sem hefur markað spor í íslensk stjórnmál og gefið nýjan og nauðsynlegan lit í litróf þeirra.  

 

X-M mælist með meira en X-B

Stanslaus vöxtur og bakslag, hröð úrelding og bið eftir enn nýrra.

Krafa og einkenni okkar tíma er krafan eftir stanslausum og endalausum vexti flestra fyrirbæra og sífelldum endurbótum og breytingum á hvers kyns varningi, tækjum og tólum. 

Hvað alls konar rafeindatæki snertir, svo sem myndavélar, tölvur og síma, hefur þróunin verið svo hröð, að stundum hvarflar jafnvel að fólki, að neita sér um að kaupa endurbætt tæki eins og síma, vegna þess að tækið eða tólið verði orðið úrelt eftir það skamman tíma, að það borgi sig að bíða. 

Krafan um nýjungar er ekki ný af nálinni. Gott dæmi um hana var þróun bandarískra bíla um miðja síðustu öld þegar svo var komið, að breytingarnar gátu orðið algerar árlega, eins og til dæmis Chevrolet 1957, 58 og 59, þegar öllum bílnum nema vél- og drifbúnaði, var breytt gagngert árlega. 

Krafan um að vera í forystu í útliti náði hámarki 1957 þegar allar fjórar gerðirnar sem Chrysler-verksmiðjunar framleiddu, gengust undir gagngerar breytingar, allt frá undirvagni og upp úr undir slagorðunum "Suddenly it´s 1960!"  "Forward look!" 

Þetta svínvirkaði en hönnuðurinn, Virgil Exner sá ekki bakslagið fyrir þegar bílar verksmiðjanna þóttu allt í einu orðnir gamaldags í útliti árið 1960. 

Í örvæntingarfullri viðleitni til þess að breyta útlitinu aftur nógu mikið komu fram einhverjir ljótustu og hallærislegustu Chrysler-bílar sögunnar, og Exner var rekinn.  

iPhone 8 fær dræmar móttökur

Tifandi tímasprengja líka í Geirangursfirði.

Fjallið Mannen í Mæri og Raumsdal er ekki eina fjallið, sem getur hrunið hvenær sem er og er því nokkurs konar tifandi tímasprengja. 

Fjallið Me-Akernes við Geirangursfjörð á Sunnmæri er annað fjall sem gliðnandi sprunga liggur í gegnum, og eru sprungan og fjallið vöktuð með mestu og bestu mælitækjum, sem fáanleg eru til þess að hægt verði að aðvara íbúa í ferðamannabænum Geirangri við botn fjarðarins. 

Reiknað er með að allt flóðbylgja geti risið ef Me-Akernes hrynur og ætt inn fjörðinn og náð upp í allt að 150 metra hæð í hlíðinni, sem liggur kringum fjarðarbotninn, þar sem brattur vegur liggur í ótal kröppum beygjum niður fjallshlíðina. 

Geirangursfjörður er af sumum talinn einn af fimm flottustu ferðamannastöðum Norðurlanda og eftir að hafa komið þangað get ég tekið undir það.  

Norðmenn bíða hamfara

Gat verið að Íslendingar styddu MAD (GAGA) þjóða mest?

Þúsundir kjarnorkuvopna í eigu Bandaríkjamanna og Rússa byggjast á kenningunni MAD, Mutual Assured Destruction. 

Forsenda hennar er að kjarnorkuveldin treysti hvert öðru til þess að þau muni beita kjarnorkuvopnum til fulls ef eitthvað beri út af varðandi þau. 

Með öðrum orðum, gagnkvæm vissa um getu og vilja til gereyðingar. Meir að segja margfaldrar gereyðingar og þar með jafnvel gereyðingar alls lífs á jörðinni. 

Ef þessi vissa er ekki fyrir hendi, eyðir það fælingarmætti kjarnorkuvopnanna. 

Bandaríkjamenn fullvissa Rússa um að þeir muni beita hinum bandarísku kjarnavopnum til fulls ef Rússar geri árás og að Rússlandi verði gereytt minnsta kosti fimm sinnum. 

Og Rússar fullvissa Bandaríkjamenn um það að þeir muni beita hinum rússnesku kjarnavopnum til fulls ef Bandaríkjamenn gera árás og að Bandaríkjunum verið gereytt minnsta kosti fimm sinnum. 

Þess vegna munaði hársbreidd að það skylli á algert gereyðingarstríð árið 1983 þegar bilun varð í tölvustýrðu aðvörunarkerfi Rússa. 

Þetta er augljóslega lang hrikalegasta geggjun, sem nokkurn tíma hefur verið í gangi í sögu mannkynsins.

Og viti menn, gat verið að Íslendingar berðust gegn því starfi sem ICAN vann til að færa þeim friðarverðlaun Nóbels? 

Íslendingar eru sem sagt MAD flestum þjóðum fremur og þess vegna vel við hæfi að á þessari bloggsíðu skuli íslensk þýðing á MAD hafa verið kynnt og rædd:

GAGA, Gagnkvæm Altryggð Gereyðing Allra. 

Já, það er ekki að spyrja að getu íslenskunnar til þess að orða alla hluti betur en flest önnur tungumál. 

Við getum líka verið stoltir af því? 

ICAN fá friðarverðlaun Nóbels

Minnir á ástandið 1940-47, 1960-67 og 2002-2008. Feit sjö ár.

Á árunum 1940-47 varð mesti harmleikur Evrópu að stærsta fjárhagslega lukkupotti sem íslenska þjóðin hafði dottið í. 

Á þennan lukkupott skyggði hlutfallslega mikið mannfall á íslenskum skipum sem var óbætanlegt fyrir aðstandenduur þeirra, en fyrir almenning var þetta eindæma uppgripatími vegna hinnar gríðarlegu vinnu og framkvæmda fyrir herlið, sem á tímabili var álíka fjölmennt og allir íbúar Reykjavíkur. 

Íbúum Reykjavíkur fjölgaði tvöfalt á árunum 1930 til 1950. 

Þegar stríðinu lauk 1945 gátu Íslendingar gengið að geysilegum gjaldeyrisforða, sem hafði safnast upp erlendis vegna gróðærisins og var honum eytt hraustlega á aðeins tveimur árum. 

Á þessum tíma varð kaupmáttur launa í himinhæðum miðað við það sem áður hafði verið. 

En 1947 kom bakslagið, svo harkalegt að Bandaríkjastjórn varð að bjarga málum með hlutfallslega stærstu Marshallaðstoð sem nokkurt stríðshrjáð ríki fékk. 

En í allri umræðu um kjaramál var meginstefið að miða við kaupmáttinn og laun 1946-47 og afleiðingin varð sú, að umræðan varð næsta óraunhæf eftir að ekki einasta var engin innistæða fyrir áframhaldandi kaupmætti, heldur þvert á móti vaxandi skuldir. 

Eina ráðið var að standa fyrir stórfelldri skömmtun á nauðsynjum og stöðvun á innflutningi margra vara sem stóð alveg fram til skamms innflutningstímabils 1955. 

Íslendingar duttu að vísu í smá lukkupott í síldarævintýrinu á sjöunda áratugnum og stórauknum þorskveiðum, en allt fram til gróðærisins uppblásna 2002-2008 voru ekki fleiri lukkupottar til að detta í. 

Lukkupottarnir 1940-47 og 2002-2008 hefndu sín báðir vegna þess að þjóðin fór í bæði skiptin á eitt allsherjar gróðafyllerí. 

Nú hafa ýmis atriði lagast á eitt að skapa lukkupott, sem hófst þegar sprenging í ferðaþjónustu dundi yfir og fór að hafa vaxandi áhrif árið 2012. 

Stríðslukkupotturinn varði í sjö ár og bankabólu lukkupotturinn og lánafylleríið varði í sex ár. 

Á næsta ári mun ferðaþjónustulukkupotturinn hafa varið í sex. 

Í sögu mannkyns og náttúru eru feitu árin oft sjö og mögru árin sjö. 

Stóra spurningin er hvort feitu árin endist lengur en sjö ár að þessu sinni. 

Ísland hafi dottið í lukkupottinn