Loftmengun getur verið heilsufars- og peningamál?

Íslensk rannsókn á loftmengun bendir til að hjartsláttartruflanir, gáttaflökt og gáttatif, geti orsakast af hækkun á styrk köfnunarefnisdíoxíðs í andrúmsloftinu.  

Meðal afleiðinga af gáttaflökti getur verið heilablóðfall, og ljóst er að þessar afleiðingar eru ekki aðeins stórt heilsufarsmál, heldur eru slík áföll afar dýr fyrir viðkomandi og þjóðfélagið, svo að haldið sé til haga þeim mælikvarða, sem svo margir telja mikilsverðan, hvað þetta kostar í peningum. 

Þetta rennir viðbótarstoðum undir gildi þess að minnka loftmengun, til dæmis með aukinni notkun farartækja, sem gefa engan útblástur frá sér eins og þau tvö, sem eru á myndinni hér við hliðina. 

 

Getur haft áhrif á gáttatif og -flökt

Full ástæða að vara við virkjanaæðinu.

Það blésu nýir vindar um Orkuveitu Reykjavíkur þegar Bjarni Bjarnason tók þar við forstjórastöðu. Húsið sjálft var lýsandi dæmi um yfirlæti, mont og jafnvel hroka. 

Líka orðið ónýtt og staðan ófremdarástand á flesta lund. 

Bjarni og samstarfsfólk hans tók til hendi og sneri dæminu við.  

Á síðustu misserum hefur ríkt sannkallað virkjana- og framkvæmdaæði hér á landi.  

Fyrirætlunum um stórfelldar framkvæmdir við risa háspennulínur hafa verið réttlættar með því að með því sé verið að tryggja afhendingaröryggi til almennings. 

Mölbrotnar, gamlar og úreltar innanhéraðslínur hafa verið notaðar sem ástæður til þess að fara út í hrikalegar stóriðjulínur, sem flestar breyta engu um dreifilínurnar í héraði.  

Bjarni hefur sýnt fram á að tugmilljarða framkvæmdir í risa háspennulínum fyrir stóriðjuna muni einfaldlega hækka verðið á raforku, sem alltof mikið er framleitt af, gagnstætt því sem haldið er fram í virkjanaáróðrinum.

Sá áróður hefur einnig snúist um nauðsyn þess að framleiða raforku fyrir samgöngukerfið, svo sem bílaflotann, sem skorti orku. 

Bjarni hefur bent á, að rafvæðing alls samgönguflotans þurfi 3,5 % af raforku landsins, en hins vegar séu 7,5% vannýtt orka.   

En virkjanaæðið hefur hingað til bara sótt í sig veðrið með fyrirætlunum um vatnsaflsvirkjanir, jafnvel í hundraða tali og orkuaukningu um fjórðung á landsvísu, og hugmyndir um vindorkuvirkjanir sem myndu tvöfalda raforkuframleiðsluna. 

Þar að auki sé álverið í Straumsvík að nálgast hámarks líftíma slíkra verksmiðja og því verði menn að vera viðbúnir því að því verði lokað. 

 

 

Varar við offjárfestingu

Af hverju er landeldi ekki víðar?

Í umræðunni um sjókvíaeldi hér á landi hafa talsmenn þess eindregið hafnað því að önnur aðferð við laxeldi komi til greina. 

Andófsfólk gegn sjókvíaeldinu hefur sagt að það sé ekki andvígt landeldi, enda sé það miklu öruggari aðferð gagnvart umhverfisáhrifum fiskeldis heldur en sjókvíaeldi. 

Nú hefur Samherji ákveðið að standa fyrir landeldi í Helguvík og í því sambandi hlýtur að vera gagnlegt að farið sé yfir rök með og á móti landeldinu til upplýsingar fyrir þjóðina, sem hefur umráð yfir landinu og auðlindum þess. 

Staðurinn, Helguvík, er sláandi. Þar stendur grind fyrirhugaðs kerskála álvers þar sem metfjöldi íslenskra ráðamanna tóku fyrstu skóflustungurnar á útmánuðum 2008. 

2013 var mynduð ríkisstjórn sem ákvað einróma á fyrsta vinnudegi sínum að þar skyldi rísa risavaxið álver sem hefði kostað stórvirkjanir og framkvæmdir í hátt á annan tug sveitarfélaga allt upp á miðhálendið og austur að Skeiðarársandi. 

Landeldisstöð Samherja „raunhæf lausn“

Kosningar vinnast ekki í skoðanakönnunum.

Þegar kosningar nálgast vex umræða um skoðanakannanir og gagnsemi þeirra. Þær geta verið ágæt vísbending um stöðu mála, en geta líka haft þann galla að ef ákveðinn munur sé stöðugur og langvarandi allt fram að kjördegi, kunni það að skekkja aöstöðu keppinautanna. 

Donald Trump hefur gætt þess vandlega að hamra á því, að rangt verði haft við í póstkosningum og að kosningarnar sjálfar verði ómarktækar og ógildar. 

Þetta hefur aldrei áður verið notað í baráttu fyrir forsetakosningar í Bandríkjunum og engar sannanir hafa verið bornar fram um það, að póstkosningar í heila öld hafi verið svindl. 

En þess þarf greinilega ekki að mati Trump. Vegna kórónaveirunnar verður sú breyting á póstkosningunu í þetta sinn, að kjósendur munu nota þær mun meira en nokkru sinni, og á þessum mismun hefur hann hamrað í því skyni að fá kosningarnar ógiltar ef hann bíður lægri hlut. 

Jafnframt má búast við að hann gefi frat í skoðanakannanir ef á þarf að halda með þeim viðurkenndu rökum að kosningar vinnist ekki í skoðanakönnunum. 

Um það atriði bera ýmsar kosningar vitni, svo sem hinn óvænti sigur Trumans yfir Dewey 1948. 

Trump hefur heldur ekki dregið neina dul á mikilvægi þess að tryggja sér yfirgnæfandi meirihluta dómara í Hæstarétti með nýjustu skipun dómara í hann. 

Með þeim yfirlýsingum sínum leitast hann við að binda hendur "sinna" dómara þrátt fyrir yfirlýsingar Harris um skilyrðislausa óhlutdrægni sína. 

Trump nýttist vel sú aðferð 2016 að láta kosningabaráttuna snúast um sig einan hvern einasta dag og ráða þannig umræðuefninu. 

Það hefur dugað honum best að sprengja nógu margar kosningabombur stanslaust hingað til og því freistandi að halda því áfram.  

En einn hluti þess líka er að vera ólíkindatól og viðhalda ákveðinni spennu og athygli með því.  

 

Biden með 17 prósentustiga forskot á Trump