Trump ryður nýja braut hvað eftir annað til þess að verða endurkosinn.

Donald Trump heldur áfram að ryðja nýjar braut í ýmsum atriðum síðustu vikurnar og stimpla sig á spjöld sögunnar sem lang merkasta og mikilhæfasta forseta landsins. 

Fyrir tveimur mánuðum taldi hann sig hafa sem yfirmaður Bandaríkjahers heimild til að senda alríkisherinn inn í einstök ríki til þess að taka fram fyrir hendur á ríkisstjórum, sem honum mislíkaði við og afnema óþarfa hömlur og varnaraðgerðir við kórónaveirunni. 

Og samhliða þessu gerði hann nokkuð, sem enginn annar forseti hefur gert, eða vita menn til þess að annar forseti hafi opinberlega hvatt fólk til sem mestu mótmælaaðgerðum gegn ráðamönnum einstakra ríkja í Bandaríkjunum eins og hann gerði varðandi takmarkanir og aðhaldsaðgerðir?   Margir virtust fara að þessum tilmælum, og virtist hvítt fólk þar áberandi en lögreglan aðhafðist lítið. 

Ekki eru liðnar nema nokkrar vikur þangað til sami forsetinn kemur aftur fram á einstæðan hátt, en alveg gerólíkan;  hótar að senda þungvopnaðan alríkisher gegn mótmælendum, þar sem mun stærri hluti er hörundsdökkt fólk en í fyrra skiptið. 

Trump er líkast til einnig fyrsti forsetinn í sögu Bandaríkjanna sem telur sér ekki skylt að leita til þingsins varðandi beitingu hervalds erlendis, þar með talið að fara í stríð. Hvar lýsti Roosevelt forseti til dæmis yfir stríði við Japan eftir árás Japana á Pearl Harbour? Jú, á fundi Bandaríkjaþings þar sem stríðsyfirlýsingin var samþykkt. Nú hótar Trump því í raun að fara fyrstur forseta framhjá þinginu í þessu efni. 

Og sterkara tákn um sterkan leiðtoga er vart að finna. 

Trump skilgreinir mótmælendur almennt sem "aðkomuglæpafólk", og þar með er hann að upplýsa um ígildi erlendrar ógnar hryðjuverkamanna, sem Bandaríkjaher muni heyja stríð við undir hans styrku stjórn "laga og réttar". 

Ekki í fyrsta skipti sem mat hans er þannig. Hann taldir að þúsundir flóttafólks á hungurgöngu þúsund kílómetra fyrir sunnan Bandaríkin í fyrra væri hryðjuverkamenn Íslamska ríksins. 

Þetta er allt í samhengi hjá sameinigartákni þjóðarinnar, sem sér þá stöðu vænsta fyrir sig í næstu kosningum, að þá sé hann orðinn eins konar herstjóri í varnarstríði gegn innrás óvina þjóðarinnar, það er, óvina hans sjálfs. 

Leiðin í forsetastólinn sýnist kannski einna greiðust, þegar þjóðin fylgir leiðtoga voldugasta hers heims í stríði við innrásarher innanlands og óvinaríkið Kína á erlendum vettvangi, sem hann fullyrðir að hafi hrundið af stað alheimsstríði kórónaveirunnar í þeim eina tilgangi að koma í veg fyrir kjör hans, hins mikla leiðtoga, sem stendur í ströngu við að bjarga meira en milljón Bandaríkjamanna frá bráðum bana í hinni kínversku drepsótt, sem var send honum til höfuðs.  

 


mbl.is Svona mismunar kerfið svörtum Bandaríkjamönnum
Tilkynna um óviðeigandi tengingu við frétt

Einu sinni var boðuð trú á þá björgun að kasta sér út úr farartækjum.

Rétt er að taka það skýrt fram að þessi pistill er eingöngu skrifaður um gildi öryggisbelta í bifreiðum og til að rifja upp fróðlegar rökræður um gildi bílbelta allar götur frá því að þau komu til sögunnar hér á landi fyrir tæpri hálfri öld. 

Saga þeirra rökræðna er lærdómsrík svo að helstu staðreyndir öryggismála í bílum falli ekki í gleymsku og dá. 

Þegar reynt var að koma á skyldu fólks til að vera í bílbeltum á sínum tíma, var reynt að fræða um dýrmæta erlenda reynslu af notkun þeirra hjá nokkur þúsund sinnum mannfleiri þjóðum í hinum ólíkustu löndum með bæði síkjum og vatnsföllum eins og Holland eða snarbröttu og enn hrikalegra fjalllendi en Ísland. 

En hér á landi var landlægt það viðhorf að vegna "séríslenskra aðstæðna" væri það fyrir öllu, að geta "bjargað sér" með því að kasta sér út. 

Þetta gekk svo langt, að við urðum á eftir öðrum þjóðum í þessu öryggismáli og meira að segja var í fyrstu veitt undanþága frá beltisskyldu, ef ekið væri í brattlendi, svo að þeir, sem í bílum væru gætu kastað sér út ef þeir lentu utan vegar. 

Þessi íslenska kenning var þrert á allar slysarannsóknir erlendis og kostaði nokkur mannslíf hér heima. 

Raunar er það enn svo, að á hverju ári tapast nokkur mannslíf að meðaltali við það að vegna þess að bílbelti eru ekki notuð, kastast fólk stjórnlaust út úr bílum og lendir undir þeim eða lemstrast við að lenda harkalega. 

Bílarnir sjálfir eru hannaðir þannig að þeir leggist sem minnst saman og myndi þannig varnarvegg allan hringinn í kringum bílstjóra og farþega, sem bílbeltin haldi kyrrum á meðan.  

Eitt atriði vill nefnilega oft gleymast varðandi bílbeltin, en það er það öryggisatriði, að bílstjórinn hreyfist sem minnst í sæti sínu og viðhaldi þannig stöðu sinni og getur til að stjórna bílnum. 

Hér í gamla daga, þegar farið var í keppni í ralli, var notað fjögurra punkta belti, sem hélt manni rígföstum við bílstjórasætið og kom í veg fyrir að maður missti tökin á stýri og stjórntækjum við að slengjast til og frá ef bíllinn lenti í loftköstum. 

Eftir þriggja daga keppni fannst fyrir mikilli óöryggiskennd við það að setjast undir stýri í bíl með aðeins þriggja punkta belti. 


mbl.is Lenti undir framhjóli veghefils og lést
Tilkynna um óviðeigandi tengingu við frétt

Einu sinni voru það Edison, Ford, Salk og fleiri. Núna Musk.

Sú var tíðin fyrir rúmri öld, að nöfn eins og Thomas Alfa Edison og Henry Ford voru tákn um uppfinningamenn, frumkvöðla og eldhuga, sem ruddu braut nýrri tækni og nýrri hugsun. 

Jafnframt aðdáun á þessum mönnum var ekki örgrannt um, að miðað við það, hve skammt tæknin var á veg komin á þeirra tíð, miðað við síðari tíma, yrði ólíklegt að svipuð einstaklingsafrek yrðu unnin síðar. 

Síðan kom þó Salk með bóluefni við mænuveiki, en það var á öðru tæknisviði. 

En á okkar tímum hefur þó legið í loftinu, að tími raðafreka og uppfinninga eins og gerðust hjá Edison væri liðinn, það væri búið að finna upp flest, sem mögulegt væri. 

Elon Musk er hins vegar maður, sem blæs á allt slíkt. Óteljandi eru hrakspárnar um það sem hann hefur þegar afrekað. 

Framleiðendur eldsneytisknúinna bíla töldu sig hafa kæft niður alla viðleitni til að framleiða bíla, sem gengju fyrir öðrum orkugjöfum en jarðefnaeldsneyti. Það var gert í krafti fjármagns og áhrifa, til dæmis með því að kaupa þá hreinlega upp sem voguðu sér að finna upp og framleiða rafknúna bíla. 

En þeim sást yfir þær framfarir, sem urðu á öðru sviði, sem sé í gerð farsíma og snjallsíma. 

Þar voru fundnar upp örlitlar lithium-rafhlöður, sem gerbyltu farsímunum. 

Elon Musk greip þessa nýju tækni og gekk í gegnum eld og brennistein hindrana til þess að koma á framleiðslu Tesla rafbílanna, þar sem þessum litlu rafhlöðum var raðað hugvitssamlega um rafbílana, jafnvel sem partur af burðarvirki. 

Byltingin er hugsanlega ekki á enda, því að enn hillir undir framfarir í gerð rafhlaðna, og ekki er enn hægt að afskrifa vetnisvæðingu. 

Spár um gjaldþrot Tesla og Musk hafa verið stanslausar á sama tíma og Tesla er orðið dýrmætasta vörumerki heims. 

Helstu bílaframleiðendur heims hafa stokkið á vagninn og keppast nú um að verða fyrstir með bestu bílana. 

Nú er Musk kominn á flug út í geiminn, nokkuð, sem engan hefði órað fyrir fyrir nokkrum árum, því ekki vantaði áskorarnir og erfiðleikana á því sviði. 

Og auðvitað er geimferðin hvað snertir hagkvæmni og tæknilega framför sigur og tímamótaviðburður.  

Edison, Ford, Salk og fleiri slíkir vörpuðu ljóma á getu og mikilleik Bandaríkjanna, hins mikla landnemasamfélags ólíkra þjóða og kynþátta. 

Elon Musk varpar nú, þrátt fyrir erfiðleika og hindranir, svipuðum ljóma á hinar björtu hliðar þessa ríkis, og hinir fornu eldhugar gerðu. 

En þjóð Lincolns, Roosevelts og Martins Luther Kings þarf jafnt nú, sem á fyrri tíð, á að halda eldhugum, sem geta komið á friði innan þessa litskrúðuga mannfélags.   


mbl.is Mikill sigur fyrir Musk
Tilkynna um óviðeigandi tengingu við frétt

Bloggfærslur 2. júní 2020

Innskráning

Ath. Vinsamlegast kveikið á Javascript til að hefja innskráningu.

Hafðu samband