Erfitt mat.

Ég hef áður rakið hér á blogginu hvað ýmsar niðurstöður alþjóðlegra kannana geta verið hæpnar ef forsendurnar eru rangar.

Þannig var spilling talin minnst hér í slíkri könnun þegar hún var augljóslega afar mikil og þetta heiðurssæti bara eitt dæmið um þá einstæðu firringu sem hér ríkti á árum Græðgisbólunnar. 

Ísland var talið með eitthvert besta ástand í umhverfismálum á sama tíma og stefnt var að framkvæmdum með mestu mögulegu neikvæðum umhverfisspjöllum sem hugsast gátu og auk þess komust Íslendingar upp með það að skila auðu í dálkinn "ástand jarðvegs og gróðurs", sem sé NA, upplýsingar ekki fyrir hendi. 

Var þó Ólafur Arnalds búinn að fá umhverfisverðlaun Norðurlandaráðs einmitt fyrir rannsóknir sínar á því sviði. Ísland setti NA í dálkinn sem og ýmsar aðrar þjóðir þar sem allt var líka í steik í jarðvegsmálum, svo sem Úkraina og nokkur lönd í austanverðri Evrópu. 

Í kringum aldamótin sýndist á yfirborðinu að talsvert frelsi ríkti hér í dagblaðaútgáfu þar sem Mogginn og DV kepptu um hylli lesenda. En í raun var það svo skömmu áður en Fréttablaðið var sett á fót að hægri menn og Sjálfstæðisflokkurinn næstum því einokuðu þennan markað með því að ráða yfir báðum þessum dagblöðum, Mogganum og DV.

Davíð lét sér þetta vel líka þangað til skyndilega var komin upp ný staða þar sem Mogginn og Fréttablaðið voru í höndum þeirra tveggja andstæðu valdablokka, sem þá börðust um völd og áhrif.

Þá þótti honum nauðsynlegt að setja á fjölmiðlalög sem augljóslega miðuðu að því að klekkja á þeim sem þá ógnuðu hinu gamla veldi Kolkrabbans. 

Í raun hafa orðið miklar sviptingar á fjölmiðlasviðinu síðan hið gamla og 60 ára gamla kyrrstöðuástand Morgunblaðsins-Vísis-Tímans-Þjóðviljans-Alþýðublaðsins var fast í sessi. 

Sveiflurnar hafa í meginatriðum orðið þrjár:  Fyrst nær alger einokun Davíðsmanna um aldamótin, síðan hörð keppni milli Fréttablaðsins og Morgunblaðsins og nú síðast sú staðreynd að keppni þessara blaða er komin að miklu leyti í sama far og hin harðpólitíska keppni gömlu flokksblaðanna á sinni tíð. 

Það þýðir að fólk verður nú að lesa Morgunblaðið og Fréttablaðið með svipuðum augum og gömlu flokksblöðin voru lesin á öldinni sem leið, og taka ýmsu í þeim með fyrirvara með tillitii til þess að Mogginn og Fréttablaðið eru nú í eigu tveggja hópa sem berjast um völd, áhrif og fjármagn á Íslandi. 

Annars vegar sægreifarnir og leifar Kolkrabbans, en hins vegar fjármálagreifarnir.

Bloggið, Fésbókin og Netið sjá um það að þessi valdabarátta er þrátt fyrir allt með ákveðið aðhald og takmörkun á því hve langt er hægt að ganga í því að nota fjölmiðla blygðunarlaust í valdabaráttu.

Mat á frelsi fjölmiðla og samanburður milli landa er erfitt verkefni.  

Hve mikið er frelsi Morgunblaðsins gagnvart eigendum sínum og ritstjóra, sem þekkir ekkert annað en valdabaráttu, sem eru hans ær og kýr? 

Hve mikið er frelsi 365 miðlanna gagnvart eigendum sínum sem eiga í grjótharði baráttu við að viðhalda sínu eftir hremmingar Hrunsins?

Frelsi fjölmiðla mest hér

Athugasemdir

[Þorsteinn Briem, 20.10.2010 kl. 12:07]

Matthías Johannessen var í stjórn Heimdallar, félags ungra sjálfstæðismanna í Reykjavík, 1954-1956, Styrmir Gunnarsson var formaður félagsins 1963-1966 og Ólafur Þ. Stephensen 1987-1989.

[Aðalsteinn Agnarsson, 20.10.2010 kl. 13:08]

Íslendingar segjast stunda sjálfbærar veiðar!

ÞORSKUR+KARFI+UFSI+ÝSA = 300.000 TONN!!  GRÁTLEGA LÍTIÐ!!!

  LOÐNU, SÍLDAR OG KOLMUNASTOFN = HRUN!!

Þetta er gjaldið sem lendir á þjóðinni, svo útrásar víkingarnir geti ryksugað

 og lagt í rúst fiskimiðinn með sínum ofur skipum!!

Þessar tölur segja okkur, að fiskimiðin eru nýtt á rangan hátt, notuðu

Íslendingar minni skip, og hættu að nota dregin veiðarfæri, þá færu

fiskimiðin að gefa þjóðinni margfalt meiri afla!!

Frjálsar handfæra veiðar leysa atvinnuvanda Íslendinga, óvíða getur

fólk haft betri tekjur, en á litlum handfæra bát.

[Þorsteinn Briem, 20.10.2010 kl. 13:32]

SKOÐANAKANNANIR.

"24. October 2005

Least corruption in Iceland

Iceland ranks #1 of 159 countries included in the Transparency International Corruption Perceptions Index 2005. Iceland's CPI 2005 score of 9.7 and CPI 2004 score of 9.5 is the top score overall."

News - Least corruption in Iceland

[Þorvaldur Sigurðsson (IP-tala skráð) 21.10.2010 kl. 11:30]

„Frjálsar handfæra veiðar leysa atvinnuvanda Íslendinga, óvíða getur

fólk haft betri tekjur, en á litlum handfæra bát.“

Aðalsteinn, þér er væntanlega alvara með þetta.  Fræddu mig þá á því hvernig miðaldra bankastarfsmenn kvenkyns eiga að fara að því að róa á handfærabáti.  Hversu marga daga á ári er raunhæft að slíkar sæki árlega?  Hvar eiga þær að fá bátinn?  Kosta slíkir bátar ekki neitt?  Er enginn rekstrarkostnaður á slíkum báti?  Hver eru leyfis og skoðunargjöld á svoleiðis útgerð?  hafnargjöld?  Hverjir ættu að sjá um uppskipun?  verkun?  Af hverju löptu allir trillukallar sem ég þekkti í mínu ungdæmi dauðann úr skel og biðu bara eftir því að komast á togara? Trúirðu virkilega sjálfur því sem þú segir?

[Þorsteinn Briem, 21.10.2010 kl. 12:59]

Árvakur rekinn með 667 milljóna króna tapi