Horfa til framtíðar? Nei, það má alls ekki.

Álfyrirtæki eru nú með orku Íslands í gíslingu. Íslendingar eru búnir að gera lista yfir þá sem hafa sýnt áhuga á orkunni á Norðausturlandi og á þeim lista trónir Alcoa efst á blaði.

Aðrir, sem kynnu að hafa áhuga sjá strax að þetta þýðir að engin orka yrði afgangs handa neinum eftir að  Alcoa hefur eyrnamerkt sé alla orku landshlutans og meira til.

Á þennan hátt hefur stóriðjan í raun hefur tekið orku landins í gíslingu og allt beinist að því að koma álverunum á koppinn og fórna því jafnvel til að álfyrirtækin reisi og eigi orkuverin. 

Lengra nær hugsunin ekki. "Ég, núna!" "Take the money and run!" Svipað er að gerast á suðvesturhorninu. Það er hugsað til næsta stöðugleikasáttmála og kjarasamninga eða til næstu kosninga. 

Michael Porter bendir á mannauðinn og þekkinguna sem enn meiri auðlegð en megavöttin en Íslendingar leggja kollhúfur.

Orkumálastjóri bendir á að í vegna þess að eðli jarðvarmaorkunnar er allt annað en vatnsorkunnar og að það krefjist rólegrar, yfirvegaðrar og öruggrar nýtingar jarðvarmans í stað þess að setja strax niður á blað orkumagn sem engin trygging er fyrir að náist. 

Af þessum sökum sé skynsamlegast og gróðavænlegast þegar litið sé til framtíðar að kaupendurnir séu margir og ekki of stórir og kominn jafnt og þétt í samræmi við þá orku sem sannanlega er í hendi.

Nú er hins vegar uppi þveröfug stefna.

Að horfa til framtíðar á Íslandi?  Nei, það má alls ekki. 

 

Horfið til framtíðar

Athugasemdir

[Haraldur Baldursson, 1.11.2010 kl. 15:46]

Sérðu þá fyrir þér að nýta megi orkuna, en að hverfa frá stórnotendunum ? Eitthvað í áttina að því sem Gísli Hjálmtýsson kom fram með í athyglisverðum hugmyndum 14.febrúar í Silfri Egils (http://dagskra.ruv.is/sjonvarpid/4472552/2010/02/14/1/ ég óttast að tengillinn virki ekki) um að loka Ísal og selja orkuna sem þangað fer til smærri aðila á hærra verði.

[albert (IP-tala skráð) 1.11.2010 kl. 15:52]

Ómar, ef allar þessar áætlanir ganga fram, verður búið að virkja alla orku íslendinga á meðan ég lifi.
Mig langar til að velta upp þeirrri spurningu, hvað eiga kynslóðirnar sem koma á eftir mér að ná í orku?

[Heiður (IP-tala skráð) 1.11.2010 kl. 16:52]

 Nákvæmlega,"Take the money and run!"

engar hugsjónir, engin framtíðarsýn, bara gengdarlaus græðgi og

 skammtímasjónarmið sem ráða sem verður okkur mjög dýrkeypt !

[Þorsteinn Úlfar Björnsson (IP-tala skráð) 1.11.2010 kl. 18:05]

Hvar er siðferðið? Auðmýktin? Aginn?

[Ómar Ragnarsson, 1.11.2010 kl. 19:57]

Fyrir tíu árum kom hingað til lands bandarískur blaðamaður, sem hefur sérhæft sig á langri starfsævi í að fjalla um orkumál fyrir bandarísk stórblöð.

Eftir að hafa hitt íslenska ráðamenn kom hann til mín upp í Sjónvarp og ræddi við mig. 

Hann hafði komið áður til Íslands og þekkti vel til, mátaði mig til dæmis í því hver væri merkilegasti foss landsins.

Það  taldi hann Barnafossa vera, ekki vegna stærðar heldur vegna þess að á áratuga ferðum hans um allar heimsálfur hefði hann aldrei séð svona fossa fyrr. 

"Það er ekki stærðin sem skiptir mestu máli, heldur hversu einstakt fyrirbærið er" sagði hann. 

Hann kvaðst ekki búast við að koma til Íslands aftur, því að hann vildi muna landið eins  og það hefði verið en ekki eins og það myndi verða. 

Á þessum tíma var Norsk Hydro að draga sig út fyrir austan en íslenskir ráðamenn vildu samt reyna áfram við að virkja Jökulsá í Fljótsdal og sökkva Eyjabökkum. 

Sá bandaríski sagði: "Ég spái því að innan tveggja ára muni bandarískur álrisi taka við keflinu og virkja margfalt stærra. Og ekki bara það, ég spái því eftir að hafa heyrt hljóðið í íslenskum ráðamönnum að ekki muni líða margir áratugir þar til hver einasti hver og hver einasta spræna á Íslandi verði virkjuð."

Síðan kvaddi þessi bölsýni spámaður mig og ég undraðist spá hans. Ég undrast hana ekki lengur. 

[Sigurður Haraldsson, 1.11.2010 kl. 23:02]

Sæll við verðum að berjast gegn þessu ofríki álrisana!