Þjált og gott orð: "Flugáhafnarmeðlimir"?

Orðið áhafnarmeðlimur er eitt hvimleiðasta orðið sem ég þekki. Menn eru sagðir vera áhafnarmeðlimir á skipum þótt við eigum helmingi styttra prýðisorð yfir það hugtak, skipverjar.

Notkun þessa orð nær nýjum hæðum, eða eigum við að segja lægðum í frétt af yfirvofandi verkfalli hjá Finnair þar sem sést eitthvert lengsta orð, sem um getur. 

Þetta dýrlega orð er: "flugáhafnarmeðlimur." Sjö atkvæði -19 stafir.

Orðið "skipverji" þjónaði okkur Íslendingum mjög vel um áratugaskeið þangað til hið ógnarlanga orð áhafnarmeðlimur varð að tískuorði.

Hliðstætt væri að nota orðið "flugverji", - í fleirtölu "flugverjar" um samsvarandi starfsmenn um borð í flugvél.

Opinberlega nota Flugmálastjórn og aðrir, sem tengjst flugi, orðið "flugliðar". 

Það tekur kannski smá tíma að venjast þessu stutta, hnitmiðaða og þjála orði, "flugliðar" en getur varla verið erfiðara en að venjast orðinu "flugáhafnarmeðlimir." 

Berum saman orðalag tengdrar fréttar eins og það er nú og eins og það gæti orðið. 

Óbreytt: 

"...vegna yfirvofandi verkfalls flugáhafnarmeðlima..."

Breytt: 

"...vegna yfirvofandi verkfallls flugliða..."

Niðurstaða: Þrátt fyrir að orðið flugáhafnarmeðlimur sé ógnarlangt og flókið eru yfirgnæfandi líkur fyrir því að það verði notað áfram sem og orðið áhafnarmeðlimur. 

Engin rök virðast geta haggað því að svona nútíma kansellístíll þyki fínn og viðeigandi. 

Hið merkilega er, að sjálft "kannsellíið" , Flugmálastjórn Íslands, notar orðið "flugliðar", en fjölmiðlarnir hins vegar orðið "flugáhafnameðlimir."

 

Finnair aflýsir flugferðum

Athugasemdir

[Guðmundur Bjarnason (IP-tala skráð) 30.11.2010 kl. 14:25]

Hvað með flugliða?

[Ómar Ragnarsson, 30.11.2010 kl. 14:33]

Hárrétt, Guðmundur, og furðulegt að mér skyldi yfirsjást þetta orð, sem er notað í öllum gögnum um þetta. Þetta er svo góð athugasemd að ég verð að breyta upphaflega textanum í bloggpistlinum. Þakka þér kærlega fyrir.

[Karl (IP-tala skráð) 30.11.2010 kl. 15:46]

Þetta hlýtur að opna á þá spurningu hvort þarna sé átt við flugmenn eða flugfreyjur í þessu tilfelli?

Hvers vegna? Vegna þess að flugliðar eru flugmenn en flugfreyjur og flugþjónar eru flugverjar. Þarna liggur munurinn.

[Jón Logi (IP-tala skráð) 1.12.2010 kl. 10:33]

Air crew, cabin crew, ground crew, og svo mætti lengi telja. Flugmaður, flugfreyja, flugþjónn,flugstjóri, er þá ekki flugliði samheiti. Flugverji býður reyndar upp á það sama, en er þá ekki flugfreyjan orðin að flugverju ??

Þá ættu líka að vera til skipverjur. Vann einu sinni með einni og held að hún hafi verið kvenkyns ;)