200 tonn.

Ég hef unnið nógu lengi á fjölmiðlum til að taka eftir því að ekki er alveg sama hvernig fyrirsagnirnar eru.

Þannig eru 200.000 lítrar af olíu miklu meira magn af olíu en 200 tonn, þegar svona há og löng tala birtist á prenti. Samt tákna þessar tölur nákvæmlega sama magnið.

Ég tel reyndar að í fréttinni af olíubrunanum á Reyðarfirði hefði átt að nota mælieininguna tonn vegna þess að hún gefur betri mynd varðandi samanburð. 

Enginn myndi segja að skip komi að landi með 200.000 kíló af fiski og það er mun erfiðara að ná utan um þá tölu í huglægu mati en 200 tonn af fiski. 

200.000 lítrar af olíu

Athugasemdir

[Bjarne Örn Hansen (IP-tala skráð) 19.12.2010 kl. 14:10]

Olía er kring 730 kg á hvern rúmmeter.  Þannig er 200þ lítrar um 145 tonn að þyngd.

[Rauða Ljónið, 19.12.2010 kl. 15:13]

Þetta voru um 14.5 tonn af olíu.

[Eiður Ragnarsson, 19.12.2010 kl. 15:26]

Þetta voru 120 tonn af olíu sem voru á afriðlinum í það heila.

[Kristján Sigurðsson (IP-tala skráð) 19.12.2010 kl. 15:43]

Það er æskilegt að fara rétt með staðreyndir bæði í texta og leiðrettingum en þar feilið þið báðir. Annar ruglar saman lítrum og kílóum en sá sem leiðréttir reiknar út frá rúmþyngd sem er fjarri sanni.

Rúmþyngd spennaolíu er um 885-kg hvern rúmmetra við 20°C og breytist lítið við breytingu hitastigs.

[Sigurjón Þórsson (IP-tala skráð) 19.12.2010 kl. 16:26]

@Bjarne Örn Hansen:

Kristján Sigurðsson hefur rétt fyrir sér.

Engu að síður þá gleyma (einstaka) fjölmiðlamenn sér stundum og halda að eldsneyti sé jafn eðlisþungt og vatn.

Hér eru nokkrar staðreyndir um hitastig eldsneytistegunda til notkunar í landi og á sjó (við ca 15°C hita):

Bensín: ca 730 kg/rúmm.

Gasolía: ca 830-840 kg/rúmm.

Flotaolía / skipagasolía / Marine Gasoil: ca. 840-850 kg/rúmm.

Flotadísilolía / kaupskipaolía / Marine Diesel Oil: 860-870 kg/rúmm.

Svartolía: Allar tegundir á bilinu 900-950 kg/rúmm.

Hef þessar tölur þó ekki á pappír heldur hef ég þetta eftir störf á 3. ár í olíuflutningageiranum.

[Ómar Ragnarsson, 19.12.2010 kl. 21:46]

Þetta þýðir að þarna var um að ræða 178 tonn, sem er það nálægt 200 tonnum að í hinu stóra samhengi skiptir það ekki höfuðmáli.

Þótt ég sé flugmaður og reikni að sjálfsögðu í hvert sinn í þungareikningum með eðlisþyngd bensíns finnst mér hvað almenning varðar aðalatriðin skipta mestu máli vegna þess að í huga almennings er nokkurn veginn bein samsvörun á milli rúmmálsins lítra og þyngdar vatnsins sem í lítranum er, þ. e. eitt kíló. 

[Helgi (IP-tala skráð) 19.12.2010 kl. 23:32]

Og því má minnast á það að alþjóðleg viðmið um eðlismassa þotuolíu segja til um það að þotuolía sé 785-840kg/rúmm. við 15°C :)

[Jón Logi (IP-tala skráð) 19.12.2010 kl. 23:42]

Var að steypa kerti um daginn, og komst að því að feitin sú nær vart 70% af eðlisþyngd vatns, - nær 65%. 2 kg af vaxi = ca 3 lítrar af kertum ;) 200 rúmmetrar af spennaolíu = 177 tonn, og 200 tonn = 226 rúmmetrar.

[lalli (IP-tala skráð) 20.12.2010 kl. 07:16]

Ég held að fólk miði við lítrafjölda þegar það talar um eldsneyti.  Ég vona að þú segir ekki við afgreiðslumanninn á bensínstöðinni að þú ætlir að fá 25 kg af bensíni þegar þú tekur bensín á bílinn.