Dæmi um hagstætt veðurfar.

Fyrirsögnin "þæfingur á Klettshálsi" er dæmi um það, hvað veðurfar hefur í raun verið hagstætt á landinu síðustu mánuði ársins, ekkert síður en aðra hluta þess.

Í því árferði sem miðað er við í samanburði, á árunum 1960-95, hefði það þótt frétt að það væri ekki fyrr en undir árslok sem færð versnaði á  fjallvegum á norðanverðu landinu. 

Aðeins tvisvar hefur snjóað að einhverju marki í allt haust, og þá aðeins á norðanverðu landinu. 

Syðra hefur í raun verið einmuna tíð og að sumu leyti jafnvel of góð, því að lítil úrkoma hefur gert það að verkum að Rauðavatn hefur nær horfið, lækkað hefur stórlega í Kleifarvatni og áin Kaldá fyrir sunnan Hafnarfjörð, sem runnið hefur öldum saman rétt við Kaldársel, hefur ekki sést. Er mikill sjónarsviptir að Kaldá, sem er einhvert merkilegasta vatnsfall landsins og efni í sérstakan bloggpistil.

Þæfingur á Klettshálsi

Athugasemdir

[Gunnar Th. Gunnarsson, 21.12.2010 kl. 09:36]

Lækkun vatnsborðs í Kleifarvatni og Rauðavatni er ekki vegna úrkomuskorts. Þekki ekki Kaldá.

Það hefur verið að lækka í Rauðavatni í mörg ár. Ég las það einhversstaðar að skýringin gæti legið í byggingaframkvæmdum í nágrenninu, þ.e. að grunnvatnsstaðan hefði breyst á svæðinu vegna þessa.

Kleifarvatn hefur lækkað vegna jarðhræringa. (sprungur)

[Sveinn Atli Gunnarsson, 21.12.2010 kl. 09:46]

Það var einmitt talað um það í fréttum um daginn að núverandi lækkun Kleifarvatns væri vegna úrkomuleysis, þú hefur kannski misst af því Gunnar. Ég þekki ekki hin dæmin, nema að ég sé Rauðavatn reglulega og það er ansi lágt í því núna.

[Gunnar Th. Gunnarsson, 21.12.2010 kl. 10:32]

Það var einmitt talað um í fréttum um daginn að núverandi lækkun Kleifarvatns væri vegna jarðhræringa. Fréttir af þessu hafa birst reglulega frá árinu 2000.

Þessi er frá árinu 2001:

"Vatnsborð Kleifarvatns hefur ekki verið lægra í heila öld. Þurrkatíð nægir ekki til að útskýra lækkun vatnsborðsins og er talið líklegt að sprungur á vatnsbotninum hafi opnast í jarðskjálftanum sem urðu á Suðurlandi á síðasta ári og vatn runnið þar niður."

Ég get því miður ekki fundið nýjustu fréttina um Kleifarvatn, en man ekki betur en hún hljómi eins og ALLAR aðrar fréttir um málið, sl. 10 ár

[Gunnar Th. Gunnarsson, 21.12.2010 kl. 10:35]

... enda hefur úrkoma ekkert verið minni undanfarin ár en venjulega, er það?

[Trausti Jónsson, 21.12.2010 kl. 10:46]

Úrkoma hefur verið með allra minnsta móti á Suðvestur- og Vesturlandi á þessu ári. Ég held að aðeins fjórum sinnum áður hafi verið ámóta þurrt í Stykkishólmi. Úrkomumælingar byrjuðu þar 1856. Ég mun vonandi gera að einhverju leyti grein fyrir þessu á bloggi mínu fljótlega.

[Gunnar Th. Gunnarsson, 21.12.2010 kl. 10:53]

Takk fyrir þetta, Trausti.  

[Sveinn Atli Gunnarsson, 21.12.2010 kl. 10:53]

Hérna Gunnar minn er nýleg frétt frá 16. desember 2010, þar kemur m.a. fram:

Vatnsborð Kleifarvatns hefur lækkað um 2,6 metra frá því í fyrravor. Hverir sem áður voru undir vatni eru nú komnir á þurrt land. Þurrkar er helsta ástæða þess hve hratt hefur lækkað í vatninu.

Heimild, Kleifarvatn að hverfa

[Sveinn Atli Gunnarsson, 21.12.2010 kl. 10:54]

Takk fyrir þessar upplýsingar Trausti.

[Gunnar Th. Gunnarsson, 21.12.2010 kl. 10:57]

Fann nýjustu fréttina og skýringin sögð vera þurrkar. Sjá http://www.ruv.is/frett/kleifarvatn-ad-hverfa

[Ómar Ragnarsson, 21.12.2010 kl. 11:41]

Ég hef þekkt Kaldá og komið að henni á hverju ári, yfirleitt oft á ári, síðastliðin 63 ár. Hún hefur aldrei áður verið svona.

Að vísu verður að taka með í þann reikning að mun meira vatn er tekið við Kaldárbotna nú en var fyrrum, en samt sker þetta ár sig alveg úr síðustu árum.