Hefði betur verið keypt hraðskreiðari ferja í upphafi ?

Mér skilst að í upphafi þess viðfangsefnis að koma á betri samgöngum við Vestmannaeyjar hafi sú hugmynd komið upp að kaupa mun hraðskreiðari ferju til siglinga til lands, allt að tvöfalt hraðskreiðari en Herjólf.

Sú hugmynd hafi í snatri verið slegin út af borðinu, jarðgöngin þar á eftir og loks sæst á Landeyjahöfn, sem er og verður ónothæf allt að því hálft árið.

Ein af mótbárunum sem ég hef heyrt gegn hraðskreiðari ferju er sú, að í slæmum sjó verði að hægja á henni.

En menn hefði þá átt að horfa á hinn kostinn, að hafa hægskreiða ferju sem getur ekki nýtt sér höfn sína hálft árið.

Það gleymist þegar ferjuleiðirnar Vestmannaeyjar-Þorlákshöfn og Vestmannaeyjar-Landeyjahöfn eru bornar saman, að það tekur klukkustund lengri tíma að aka frá Landeyjahöfn til Reykjavíkur en frá Þorlákshöfn til Reykjavíkur þannig að ferðin með hraðskreiðri ferju til Þorlákshöfn tekur í heild ekki mikið lengri tíma en með ferju til Landeyjahafnar.

Hvað flugsamgöngur snertir þá er oft ófært til flugs á flugvöllinn í svipuðu veðri og ófært er í Landeyjahöfn, þ. e. í sunnan- og suðaustanáttum þar sem þoka leggst á flugvöllinn þótt sæmilegt skyggni sé undir henni, því að flugvöllurinn liggur í meira en 100 metra hæð.

Hægt væri að búa til stutta flugbraut syðst á leiðinni út í Stórhöfða næstum niðri við sjávarmál.

Í hvassri suðaustanátt myndi vindur standa beint á þessa braut og skyggni þar viðunandi þótt þoka lægi á flugvellinum og misvinda ofan af Sæfellinu.

Flugvél af Twin Otter gerð myndi nýtast í þessu flug.

Ný ferja kemur 2015

Athugasemdir

[Jón Logi (IP-tala skráð) 25.1.2012 kl. 15:39]

Og Dornierinn líka eða þarf hann meira?

Þá væri komin tenging beint í Hvolsvöll, beint á hringveginn og í rútu.

[Ásta (IP-tala skráð) 25.1.2012 kl. 17:12]

Það gleymist reyndar líka í umræðunni að það eru alls ekki allir sem fara með ferjunni að fara til Reykjavíkur.

Þorlákshöfn er t.d. mikill krókur fyrir þá sem ætla sér að fara austur á land en sú leið styttist mikið þegar farið var að sigla í Landeyjahöfn.

[Jón Logi (IP-tala skráð) 25.1.2012 kl. 17:31]

Það þola heldur ekki allir veltu á sjó, og ég veit mýmörg dæmi þess að fólk af landi heykist á því að fara til Eyja (svo og útlendingar) um Þorlákshöfn vegna sjóveiki.

Landeyjahöfn er ca 25 mínútur á "stími", restin er aðlagning og svoleiðis.

"Stímið" til Þorlákshafnar er 3 tímar, meira en 6 tímar fram og til baka, þannig að takmörkin eru 2 ferðir á dag á móti ca 5.

Akstursvegalengd er ca 1 klst meiri.

[Ómar Ragnarsson, 25.1.2012 kl. 21:19]

Það var rætt um það á sínum tíma að "stímið" til Þorlákshafnar styttist niður fyrir tvo tíma.

Best væri auðvitað að sigla eftir þörfum til beggja hafnanna eftir því sem þær væru opnar,  en sem fyrr kostar víst allt peninga.

Hvað brautin við Klaufina snertir myndi sú vegalengd sem flugvél notaði styttast mjög mikið við það að vindurinn væri stífur.

[Egill Óskarsson, 25.1.2012 kl. 22:00]

Það vill gleymast ansi oft í þessari umræðu, og það gerist einmitt hérna, að þegar ákveðið var að ráðast í gerð Landeyjahafnar var aldrei gert ráð fyrir að núverandi skip myndi sigla á milli. Það átti að vera minni, hraðskreiðari og umfram allt grunnristari skip. Með slíku skipi hefði verið hægt að sigla miklu oftar en hefur verið. Það sýndi sig bara núna í haust þegar Baldur sigldi á milli að grunnristari skip á í miklu minni vandræðum en núverandi Herjólfur.

[Björn Jóhann Guðjohnsen (IP-tala skráð) 26.1.2012 kl. 01:21]

Sæll Ómar

Þegar talað er um hraðskreiðari ferju þá er aldrei minnst á aukinn rekstrakostnað. Ferja sem færi helmingi hraðar myndi eyða miklu meiri olíu með tilheyrandi kostnaði. Hefðu farþegarnir átt að borga eða hefði sá kostnaður átt að vera frír eins og það að fara í gegnum Héðinsfjarðargöng?

[Jón Logi (IP-tala skráð) 26.1.2012 kl. 08:56]

Öðruvísi ferja sem hraðskreiðari væri þyrfti ekki endilega að eyða mikið meira. Það munar ekki öllu hvort þú keyrir á 60 eða 90.

Þetta snýst um lengd og breidd, og hámarkshraði í öldu snýst mikið um lengd. Skip eru afar misjöfn sjóskip. Og Herjólfur greyið er ekkert sérstakur.

[Bjarki (IP-tala skráð) 26.1.2012 kl. 10:52]

Það er nú málið Egill. Menn keppast við að afskrifa Landeyjahöfn sem mistök þegar hún er ekki tilbúin. Það er ekki hægt að slíta í sundur mannvirkið sjálft og skipið. Þangað til sérhönnuð ferja fyrir Landeyjahöfn verður tekin í notkun er verkið ekki nema hálf klárað.

[Ómar Ragnarsson, 26.1.2012 kl. 18:57]

Það besta væri sérhönnuð grunnskreið ferja sem færi í Landeyjahöfn nema yfir verstu vetrarmánuðina og til viðbótar ferja sem brúaði bilið þegar Landeyjahöfn er lokuð.

Þegar menn segja að kostnaðaraukinn sé of mikill taka þeir ekki með í reikninginn stóraukna flutninga sem skapast á helsta ferðamannatímanum.