Skeytingarleysi og óvirðing, sjáið myndirnar !

Hér á landi hefur ríkt skeytingarleysi og óvirðing gagnvart þeim sjaldgæfu fyrirbærum sem Kerið, Víti við Kröflu og Víti í Öskju eru. Þetta hefur líka átt við um margar aðrar náttúrugersemar.

Að hluta til er um að ræða röskun sem aldrei verður hægt að bæta fyrir þannig að valtað er yfir hagsmuni komandi kynslóða. Í því felst óvirðing við þær og frekja.   

Aðeins er hægt að segja um þrjá fyrrnefnda staði að Víti í Öskju hafi enn ekki verið stórskemmt með umferð en á hinum tveimur stöðunum vilja Íslendingar vaða um með stjórnlausum átroðningi og stórfelldri röskun.

Enginn má heyra nefnt að aðgangur sé seldur að stöðum á borð við Kerið eins og alls staðar er gert á hliðstæðum stöðum erlendis og er þetta gjald innheimt gegn því að um það sé séð að umferð um staðinn sé þannig háttað að ekki verði skemmdir á honum og upplýsingar veittar í formi bæklinga.

Landsvirkjun hefur unnið stórfelld óafturkræf spjöll algerlega að óþörfu á Víti við Kröflu.

Sá staður hefur þá algeru sérstöðu að gígarnir eru tveir, risastór neðri gígur og annar minni rétt ofan við þann stærri.

Þarna hafa verið unnin óbætanleg spjöll með því að setja niður 10000 fermetra borplan við jaðar efri gígsins og ryðja burtu viðkæmum hálendisgróðri sem þar var svo að aldrei verður hægt að bæta úr því.

Öll fyrri loforð um að stefnubora þarna svo að ekki þyrfti að eyðileggja staðinn voru svikin.

Vel hefði verið hægt að bora fjær Vítisgígunum tveimur og þessi framkvæmd er í æpandi mótsögn við margítrekaðar fullyrðingar Landsvirkjunar um vandaða og tillitssama umgengni hana við náttúruna og "snyrtileg" virkjanamannvirki.

Rétt er að taka fram að með því að smella tvisvar á myndina er hægt að stækka hana svo að einstök atriði sjáist betur. Þá sést hvernig gróna svæðið neðst á myndinni hefur verið skorið í sundur og viðkvæmri gróðurþekjunni eytt að stórum hluta til þess að geta þanið borplanið inn á hana. Þetta er í um 600 metra hæð yfir sjó og því alls ekki það sama að gera þetta í þessari hæð eða niðri á láglendi.

Hér skýt ég P. S. inn í vegna aðdróttana í athugasemd þess efnis ég sé að ljúga um það að þarna hafi verið ruðst inn á gróið svæði, heldur sé þarna aðeins "leirdrulla." Mér líkar það illa að vera sífellt vændur um "falsanir" og lygar og bréfritarinn hefur kannski ekki átt von á því að ég og fleiri hafi gengið um svæðið og tekið af því myndir á jörðu niðri.

Ég skelli hér inn mynd sem tekin er af hinu grasi og mosagróna svæði í átt að borplaninu. Á henni sést hluti hins gróna svæðis og dæmi síðan hver fyrir sig, hvort þetta sé bara leirdrulla og ekkert annað.

Enn og aftur er bent á að hægt er að tvísmella á myndina til að skoða nánar hina grænu "leirdrullu."   

Ein af röksemdunum fyrir því að þetta sé bara allt í lagi af því að ég hafi þá sérstöðu að fljúga yfir þetta og sjá það úr lofti og að flestir ferðamannanna komi ekki þarna upp eftir, heldur aðeins að neðri gítnum, heldur ekki vatni.

Skammt þarna frá er flugfélagið Mýflug sem flýgur útsýnisflug með ferðamenn svo hundruðum skiptir á hverju sumri og nógu oft hef ég komið þarna á jörðu niðri til að vita að hundruð ferðamanna ganga upp á þetta svæði á hverju sumri þótt langflestir komi aðeins að neðri gígnum.

Samkvæmt þessari röksemdafærslu væri bara allt í lagi að umturna stöðum eins og Kverkfjöllum og Öskju, af því að lítill minnihluti ferðamanna á Íslandi komi þangað.

Það er svo annað mál hvort það eigi að rjúfa rómaða gestrisnishefð Íslendinga með því að gera okkur fræg fyrir hið gagnstæða, að láta gesti og gestgjafa fá að finna fyrir því að þeir séu illa séð og hafi aðrar pólitískar skoðanir en hugnanlegt er.

Ef það verður látið ráða för framvegis fá engin íslensk stjórnvöld frið til að bjóða erlendum gestum til landsins, - alltaf verða einhverjir sem eru gestgjöfunum andvíg sem geta látið það bitna á þeim á borð við það sem nú var notað sem röksemd vegna Kersins.

Næg tækifæri gefast til að mótmæla á annan hátt en þennan.

Geta má þess til samaburðar að þegar forráðamenn Sovétríkjanna sálugu og fleiri ríkja, sem stunduðu enn meiri mannréttindabrot og kúgun en Kína gerir nú, heimsóttu Bandaríkin og önnur Vesturlönd, var þeim ævinlega sýnd eðlileg og sjálfsögð gestrisni og þeim sýnt það sem markverðast var, þótt mótmælendur nýttu sér rétt sinn á götum úti til að viðhafa mótmæli.

Hitt verður líka að viðurkennast að úr því að Kerið er í einkaeigu hefði átt að leita samráðs og samþykkis eigendanna fyrirfram. En það réttlætir ekki þá óíslensku stefnu þessara eigenda að vegna þess að gestgjafarnir og gestir þeirra séu í litlum metum hjá þeim réttlæti það eitt að rjúfa gróna og rómaða íslenska gestrisnishefði.

Höfðu ekki áhuga á heimsókn Wen

Athugasemdir

[Gunnar Th. Gunnarsson, 21.4.2012 kl. 21:55]

Mér finnst þetta flott, þarna við Kröflu. Skemmtilegur kontrast. Sýnir flotta náttúru og hátæknivísindi mannsins. Mjög snyrtilegt og laðar að tvennskonar ferðamenn.

 Náttúrusérvitringar, sem hvergi mega sjá mannanna verk því þá fyllast þeir vistkvíða, verða að leita annað. Það er líka til fullt af stöðum fyrir þá.

[Ómar Ragnarsson, 21.4.2012 kl. 22:33]

Gott að heyra þetta, Gunnar. Það með er komin röksemd fyrir því að virkja svona alls staðar. Ef það fyndist nýtanlegur jarðhiti á Þingvöllum væri það "flott" að reisa þar virkjanamannvirki. "Skemmtilegur kontrast. Sýndi flotta náttúru og hátæknivísindi mannsins. Mjög snyrtilegt og laðar að tvenns konar ferðamenn. "

Þeir sem vilja að staðið sé við loforð um að virkja í samræmi við loforð um að nota stefnuborun eru "náttúrusérvitringar."

Það eru bara "náttúrusérvitringar" sem fá því ráðið að að ekki er virkjað í Yellowstone.

Og það væru "náttúrusérvitringar" sem andæfðu því að reisa virkjun á Þingvöllum. ´

[Gunnar Th. Gunnarsson, 21.4.2012 kl. 22:54]

Það er engin að tala um að virkja "alls staðar".

Alltaf sama sagan með ykkur náttúrusérvitringana

[Ómar Ragnarsson, 21.4.2012 kl. 23:28]

Hvar viltu þá ekki virkja? Hvar vilt þú draga línuna?  Af hverju yrðu virkjanamannvirki í Öskju, Kverkfjöllum, á Þingvöllum og við Geysi ekki eins "flott og mikill konrast og sýndu flotta náttúru og hátæknivísind mannsins" og við Víti við Kröflu.

Ég var persónulega eins og fleiri "náttúrusérvitringar" búinn að samþykkja virkjun við Kröflu að því tilskildu að staðið væri við loforð um stefnuborun svo að hægt væri ná orkunni án þess að skemma Víti.

Nú sé ég að þér finnst að sjálfsagt hafi verið að þetta loforð yrði svikið svo að hægt væri að sýna hvað þetta væri "flott og mikill kontrast og hægt að sýna flotta náttúru og hátæknivísindi mannsins."

[Guðmundur Brynjólfsson (IP-tala skráð) 22.4.2012 kl. 01:54]

É é é é ég... maður stamar nú bara eins og Ragnar Reykás.

Þér að segja hélt ég, Ómar, þegar ég var að lesa niður þessa bloggfærslu og kom að myndinni að þarna værir þú með einhverja mynd sem sýndi "fótósjoppað" hvernig einhver hugsanleg mannvirki gætu tekið sig út þarna. Bjóst sem sagt við einhverjum fabúleríngum um að svona gæti þetta orðið og þá væri það óafturkræft etc. etc.

En þetta er sem sagt svona! Ég á ekki til eitt einasta orð. Hverskonar vitfirring er þetta eiginlega? Ég er ekki neinn "náttúrusérvitringur" og finnst að oft hafi náttúruverndarsinnar farið offari, en mér er öllum lokið við að skoða þessa mynd þína. Fyrr má nú rota en dauðrota.

Þetta eru ekki bara náttúruspjöll heldur er þetta níðingsháttur gegn stórmerkilegu náttúrufyrirbæri, níðingsháttur gegn landinu og komandi kynslóðum sem þurfa að burðast með þessa erfðasynd um ókomna tíð. Nema þá að það verði farið í að afmá þetta - ef það er þá hægt. Sem mér sýnist að verði erfitt.

[Bubbi Morthens (IP-tala skráð) 22.4.2012 kl. 07:38]

Gunnar þetta hefur ekkert með það að vera sérvitur á náturuna .Þetta er lýsandi dæmi um hroka og óvirðingu sem hefur viðgengist hér á landi að allt þetta grjót og mosi sé einskonar rusl.

[Friðrik Dagur Arnarson (IP-tala skráð) 22.4.2012 kl. 10:23]

"Skemmtilegir kontrastar". Já einmitt. Með sömu rökum er hægt að segja að það sé sniðugt að setja skemmtistað inn í íbúðahverfi, eða verksmiðju og verkstæði. Allt fyrir hina skemmtilegu blöndu ólíkra þátta. Sumt af því sem gert var við Kröflu var gert áður en sú hugsum sem æ fleiri nútímamenn hafa, t.d. um það að laga mannvirki að umhverfi sínu og hafa þau ekki á viðkvæmum stöðum. Almennt er umgengni góð á svæðinu og fyrir það ber að þakka. Þessi borplön eru samt arfaslæm og þó viss huggun sé að það tókst að verja litskrúðugt gil með miklum dýjamosa einum 200 metrum þarna beint suður af þegar borað var þarna þá er staðsetning þessa plans ótæk. Þeir sem hafa skoða þetta vel hljóta að taka undir að umfjöllun þín, Ómar, er fullkomlega málefnaleg en ekki sérvitringsháttur, hvað þá þvergirðingsháttur eins og Gunnar sýnir í skrifum sínum.

[sigurður sunnanvindur (IP-tala skráð) 22.4.2012 kl. 11:36]

Orkugeirinn stefnir alltaf á lægsta samnefnarann.

Forgangsraforka til iðnaðar er hvergi ódýrari og notast er við ódýrustu og því miður oft áz tíðum ósmekklegustu útfærslur mannvirkja.

Stefnuborun er 20-30% dýrari en hefðbundin borun og því var aðeins ódýrara að bora á gígbarmi Vítis heldur en að skábora úr 500m fjarlægð.

Landsnet er að undirbúa 220KV raflínur með 550MW flutningsgetu frá Blöndu til Fljótsdals og frá Vatnsfellsvirkjun og norður Sprengisand.

LN stefnir að því að nota einungis mjög áberandi grindarmöstur af því að það er ódýrasti kosturinn.

LN hyggst meira að segja nota slík möstur meðfram Akureyri og yfir útivistarsvæði bæjarbúa og bíta svo höfuðið af skömminni og þvera Eyjafjörð það nálægt flugvellinum að setja þarf rauð blikkljós í möstrin til að vara flugmenn við hættunni! Línan skerðir blindflugslágmörk og er stórhættuleg.

Í siðuðum samfélögum er einfaldlega notast við jarðstrengi í þéttbýli og nágrenni flugvalla og lokuð og mött möstur notuð þar sem við á og jafnvel mattaðir leiðarar sem ekki glampar á.

Kjósahreppur hefur neitað LN um leyfi til að reysa 220KV loftlínu um hreppinn þar sem slíkt mannvirki gagnast þeim ekkert. Landeigendur í Skagafirði munu að öllum líkindum láta reyna á eignarnámsákvæði raforkulaga þar sem 220KV lína varðar ekki almannahag og auðvelt er að benda á að hægt er að flytja þessa orku skaðlaust um jarðstreng sem einungis rýrir verðmæti lands óverulega.

Danir eru löngu hættir að reisa vindrafstöðvar á opnum grindarmöstrum þar sem það þóttu foráttuljót mannvirki. Þeir vinna markvisst að því að rífa allar 150KV loftlínur og setja í jörð og eru hættir að reisa loftlínur og allar nýjar línur verða jarðstrengir með allt að 400KV spennu.

Í Evrópu tíðkast að nota þyrlur til að reisa raflínur þar sem vegagerð þykir erfið eða óásættanleg. LN gerir alltaf kröfu um veg meðfram línunum.

Loftlínur verða eingöngu reistar til að flytja raforku til stóiðju.

Núvernandi flutningskefi dugar fullkomlega allri almennri notkun og styrking þess kerfis er orðin hagkvæmari með jarðstrengum.

Metnaðarleysi Íslenska orkugeirans minnir á afdankað Sovét frá liðinni öld.

[Gunnar Th. Gunnarsson, 22.4.2012 kl. 14:12]

Friðrik Dagur, það er rétt hjá þér að nútímahugsun varðandi mannvirki í náttúrunni eru löguð betur að henni en áður. Það er hins vegar einskis virði í huga náttúrusérvitringa og nefni ég sem dæmi hönnun mannvirkja við Bitru.

[Stefán Stefánsson, 22.4.2012 kl. 16:17]

Þú stundar það nú eins og oft áður að fara frjálslega með sannleikann og jafnvel að segja ósatt Ómar...

Það er ekki rétt að hróflað hafi verið við Víti eins og þú segir og á það við báða gígana á svæðinu. Affallsvatn er leitt í rörum niður fyrir svæðið.

Það er óverulegur gróður sem fór þarna undir borplanið. Leirdrulla er ekki gróður, það þekki ég.

Á þessu plani eru nú þegar fjórar holur og þar af þrjár stefnuboraðar og kjallari kominn fyrir þá fimmtu.

Það er mjög gott að standa vörð um náttúruna og það gerum við. En svona öfgakenndur áróður eins og þú stundar oft vinnur frekar á móti náttúruvernd heldur en hitt.

Hafðu sannleikann að leiðarljósi félagi, það er heillavænlegra.

[Friðrik Dagur Arnarson (IP-tala skráð) 22.4.2012 kl. 16:17]

Gunnar, það er líka nútímahugsun að átta sig á því að jafnvel þó reynt sé að laga mannvirki betur að umhverfi sínu en gert var áður fyrr, þá gildir að þau eiga alls ekki heima á alls staðar. Það er margt fleira en bara útlit mannvirkja sem spillir náttúrusvæðum. Bitra hefði t.d. lagt til gríðarlega mengun sem engin lausn er enn til á og Hvergerðingar hefðu fengið að kenna á henni öðrum fremur. Ímynd svæða eyðileggst, en ímynd er eitt það verðmætasta sem hver sá á sem reynir að selja öðrum eitthvað. Og þegar upp er staðið snýst þetta mest um gáfulega auðlindanýtingu, bæði í krónum talið og einnig í öðrum gildum. Virkjun á mörgum stöðum er einfaldlega mun óhagkvæmari nýting en margt annað, til lengri tíma litið. Væri óskandi að virkjanasérvitringar áttuðu sig á því og fengju skilning á því að krossferðir til að koma virkjunum í margar af helstu náttúruperlum okkar eru á viðlíka siðferðislegum grunni og krossferðirnar á miðöldum og hafa kannski álíka göfugan tilgang.

[Árni Gunnarsson, 22.4.2012 kl. 16:45]

Er fyrirmyndin ekki áreiðanlega sótt til Rússlands?

[Gunnar Th. Gunnarsson, 22.4.2012 kl. 18:02]

Bitra er vænlegur virkjunarkostur í öllu tilliti. Náttúrusérvitringarnir eru ósammála.

Hverjum hefði dottið það í hug?

[Ómar Ragnarsson, 22.4.2012 kl. 18:45]

það vill til, Stefán, að ég gekk um það svæði sem þú kallar "leirdrullu", og ég verð að segja, að sú "leirdrulla" er hin fyrsta sem ég hef rekist á sem er græn á litinn.

Þegar tóm gefst til skal ég finna til myndir af þessari einstæðu grænu "leirdrullu" en best væri auðvitað að þú gengir sjálfur um þetta gróna svæði.

Þetta er svosem ekki nýtt. Í umhverfismati fyrir Hólmsárvirkjun er gras í fyrirhuguðu lónstæði skilgreint sem mosi, kjarr skilgreint sem gras og skógur með meira en mannhæðaarháum trjám skilgreindur sem kjarr.

[Ómar Ragnarsson, 22.4.2012 kl. 19:22]

Nú er ég búinn að setja inn mynd tekna af jörðu niðri í pistil minn og haltu nú áfram, Stefán, að ásaka mig um falsanir og lygar.

[Stefán Stefánsson, 22.4.2012 kl. 22:35]

Ég var ekki að bera á móti því að einhver gróður hafi verið þarna, heldu, að hann hafi verið óverulegur.

Ég er búinn að vera á þessu svæði frá því framkvæmdir hófust þarna og veit um hvað ég er að fjalla.

Þú hélst því fram að ekki hefði verið stefnuborað og það var röng fullyrðing hjá þér. Framtíðin verður þannig að borplön verða fá,en margar holur á þeim og er það framför frá því sem áður var.

Þú verður að reikna með þvi að einhverjir staðkunnugir lesi það sem þú skrifar og ég hika ekki við að mótmæla þér í þau skipti sem ég sé að sannleikanum er hagrætt.

Bestu kveðjur til þín félagi.

[Sigurður Sunnanvindur (IP-tala skráð) 22.4.2012 kl. 23:44]

Ómar hefur rétt fyrir sér í öllum atriðum nema því að skáborað hafi verið af þessu tiltekna borstæði.

Það breytir þó ekki því aðalatriði að þetta borstæði er verulega smekklaust og metnaðarfyllra orkufyrirtæki hefði borað með öðrum hætti frá öðrum stað.

Þetta svæði hefur verið gróðurvana fyrir 288 árum og þarna tapaðist það sem áunnist hafði á þeim tíma.

[Jón Logi (IP-tala skráð) 23.4.2012 kl. 08:05]

Þarna fór ég sem leiðsögumaður í fyrra (með Þjóðverja). Við skoðuðum stöðvarhúsið við kröflu og svo svæðið. Það var nú einhver kurr í fólkinu yfir því að sjá þetta svona, þannig að mér var létt þegar við héldum á brott.

[Ómar Ragnarsson, 23.4.2012 kl. 08:56]

Þetta er örlítið í áttina. Nú breytirðu "leirdrullu" í "óverulegan gróður."

Minnir mig á það þegar ég hafði sýnt Geir Haarde þáverandi forsætisráðherra, fyrirhugað lónstæði Hálslóns, þar sem af 57 ferkílómetrum voru 30 ferkílómetrar gróið land, sagði hann við fjölmiðla eftir ferðina að þetta væru mest melar og grjót en líka óverulegur gróður.

Á sínum tíma var talað um það að ekki þyrfti að óttast spjöll við Víti vegna þeirrar tækni að geta stefnuborað. Það blasir við að þetta hefur ekki verið efnt, annars hefði verið hægt að láta allra næsta nágrenni Vítis í friði í stað þess að vera rétt ofan við það og einnig fyrir neðan þar sem borholan "Helvíti" var boruð rétt við holuna "Sjálfskaparvíti.  

Framtíðin virðist ekki eiga vera sú við að borplön verði fá, að minnsta kosti ekki við Þeystareyki, því að þar eiga þau að verða hvorki meira né minna en 15 á sama tíma og ég hef það frá kunnáttumönnum að fimm borplön gætu nægt.

[Gunnlaugur Hólm Sigurðsson (IP-tala skráð) 23.4.2012 kl. 16:27]

Þetta er bara mjög snyrtilegt og flott, svona á að níta náttúruna koma að henni með hóflegri virðingu, verum ánægð að þurfa ekki Kjarnorku eða kolaorkuver.

[Jón Logi (IP-tala skráð) 23.4.2012 kl. 16:31]

Ég var líka með hópinn minn við Goðafoss. Veðrið var frábært, og mér gekk illa að smala í rútuna.

Aðeins einn benti á að þarna færi mikið af orku til spillis. Ég benti á hópana af ferðamönnum þarna allt um kring, og sagði að þarna væri útflutningur, - fólk sem ekki kæmi til að skoða stíflugarð.

Karl glotti og sagði það rétt.

Það verður hins vegar að játast að þeim fannst gaman að stöðvarhúsinu við Kröflu, aðallega einum, fyrr starfsmanni hjá Blohm & Voss muni ég rétt. Vélfræðingur.