16 ára misheppnað basl við að kála Lada Niva.

Nú eru liðin 16 ár síðan framleiðendur Lada sýndu "arftaka" Lada Niva jeppans.

Þegar Lada Niva kom fram 1977 hafði hann slegið í gegn víða um lönd, til dæmis á Íslandi, 1977. Hér á landi, eina landinu í heiminum, var leyft að kalla bílinn Lada Sport.  

En 1996 var kynntur "arftakinn", Lada 2123 sem var það nútímalegur í útliti, að hann væri vel gjaldgengur enn í dag, með ávalar og fallegar línur í stíl okkar tíma, heldur meira rými en Lada Niva en að vísu 140 kílóum þyngri fyrir bragðið af því að hann var bæði lengri og breiðari.   

Árið 2002, eða fyrir tíu árum, hófst framleiðsla hans undir nafninu Lada Chevrolet Niva og í kjölfarið fylgdi Lada Nadeshda, sem var "minivan" útgáfa.

Skemmst er frá því að segja að það hefur misheppnast að "drepa" Lada Niva, sem selst enn vel í Rússlandi og fjölmörgum öðrum löndum á sama tíma og "arftakarnir" hafa verið andvana fæddir.

Rússarnir höfðu vit á því að setja snemma beina innspýtingu í bílinn svo að hann stenst mengunarkröfur.  

Þetta minnir á hliðstæður hjá öðrum bílaframleiðendum, svo sem þegar það átti að "drepa" Porsche 911 með "arftökunum" Porsche 928 og 924 fyrir aldarfjórðungi.

Meginástæðan fyrir slæmu gengi svonefndra arftaka Lada Niva er líkleg sú, að framleiðendurnir notuðu áfram sama vélbúnað og drifbúnað og var og er í Lada Niva og að því leyti var þarna um að ræða nýjar umbúðir utan um gamla vöru.

Nú verður fróðlegt að sjá hvort enn ein tilraunin við að kála Lada Niva heppnast.

 Ég hef átt slíka gripi síðustu tvö árin og þeir hafa reynst vel, einkum sá sem ég fékk nánast gefins, því að hann er enn við góða heilsu þrátt fyrir aldur, fyrri notkun og afar þreytulegt útlit.

Á myndinni er annar þeirra í notkun við kvikmyndatökur á leiðinni inn að Herðubreiðarlindum, og Friðþjófur Helgason mundar myndavélina.

Helsti gallinn á þessum bílum er sá að engir loftpúðar eru í þeim. Gaman væri að sjá hve mikið verðið myndi hækka ef loftpúðum yrði komið fyrir í honum og gerðar aðrar breytingar í stíl við það sem gert hefur verið við Porche 911 og gert var við Volkswagen Bjölluna, sem lifði í 26 ár eftir að "arftakarnir" komu fram.

Það myndi gera bílinn nýtískulegri ef útliti framendans væri breytt og gert straumlínulagaðra, en það yrði hins vegar erfitt, því að varahjólið er í nefinu og við það skapast rými fyrir óvenju stóra farangursgeymslu afturí.

Lada fríkkar

Athugasemdir

[Þorsteinn Briem, 1.9.2012 kl. 16:03]

21.7.2011:

"En í seinni tíð er einum og einum Lada Sport tekið að bregða fyrir á götum og vegum.

Það er fyrst og fremst bílaleigan Geysir í Reykjanesbæ sem flytur þá inn vegna bílaleigustarfseminnar.

Það eru ekki síst erlendir leigutakar sem sækjast eftir því að taka þessa bíla á leigu, að sögn starfsmanns bílaleigunnar í samtali við fréttavef FÍB.

Hann segir bílana reynast ágætlega og þeir bili ekkert frekar en aðrar tegundir og gerðir bílaleigunnar."

Félag íslenskra bifreiðaeigenda - Nýir Lada Sport á Íslandi

[Ómar Ragnarsson, 1.9.2012 kl. 16:54]

Fyrir næstum áratug reyndi bílaleiga í Reykjavík að leigja út nokkra Lada Niva. Eftir nokkrar vikur gáfust menn upp á því. Leigjendurnir komu úr ferðum með ýmsa hluti lausa og höndunum eins og rúðuupphalara og þess háttar.

Þetta rímar við mína reynslu af þessum bílum. Ég þekki ekki neinn þeirra þar sem ekki hefur eitthvað smálegt verið laust. Bíllinn, sem ég keypti einmitt af bílaleigunni Geysi en hef nú selt aftur með mikilli eftirsjá, var með lausan gúmmifetil á bensíngjöfinni og hnappurinn var fallinn af handfangi sem er notað til að leggja framsætisbakið fram.

Á öðrum bílum eru það síðan aðrir smáhlutir sem eru lausir.

En þetta fannst mér og sjálfsagt mörgum leigutökunum líka bara sjarmerandi því að þessir tveir Niva-bílar mínir hafa alltaf farið í gang og gengið eins og klukkur, sama hve mikið frost og óveður hefur verið.

Á eldri bílnum eru fyrsti gír og fjórði gír ónýtir, en þá nota ég bara háa og lága drifið á víxl í staðinn með tvíkúplingu með gamla laginu til að skipta upp svona:

2.gír í lága - 3ði gír í lága - 3ði gír í háa - 5. gír í lága - 5. gír í háa ! 

Lada Niva var næstum 20 árum á undan tímanum í hönnun og hefur það framyfir aðra "crossover" aldrifsbíla ("crossover"bílar eru með heilsoðna byggingu en ekki á sérstakri grind) að hafa næga veghæð á við bestu torfærubíla en á það skortir sárlega á flestum svonefndra jepplinga.

[ÞÞ (IP-tala skráð) 1.9.2012 kl. 22:04]

Standast þeir elgtest? Kv. Þorgeir