"Ó, aldna þing, - upp rísi þú!"

Frumvarp stjórnlagaráðs til nýrrar stjórnarskrár ilmar af umbótum og er kaflinn um Alþingi dæmi um það.

Þar var ætlun ráðsins að reyna að búa svo um hnúta að bæta vinnubrögð Alþingis og auka vald og virðing þessa elsta löggjafarþings heimsins en draga úr því ofurvaldi framkvæmdavaldsins sem hefur raskað valdajafnvæginu, sem talið er nauðsynlegt að ríki í vestrænu lýðræði, á milli framkvæmdavalds, löggjafarvalds og dómsvalds.

Þannig er forseta þingsins og nefndarformönnum falin aukin verkefni og ráðherrar mega ekki gegna þingmennsku samhiða ráðherradómi, efirlitshlutverk þingsins og þingnefnda er aukið og valdreifing og valdtemprun eru leiðarljós.

Á menningarnótt var flutt lag með texta um þetta, svohljóðandi:  

                                                 Ó, ALDNA ÞING, UPP RÍSI ÞÚ !

Með lögum byggja landið skal

en ólögunum eyða

og þjóðar mesta mannaval

til mikla verksins leiða.

Oss dreymir bætt og betra þing

sem byggi upp og lagi

og sætti sérhvern Íslending

við sanngjörn lög og hagi.

                                                   Ó, aldna þing, - upp rísi þú

                                                   með aukinn kraft og traust og trú !

                     Það aldna þing, sem upp þá rís

                     til aukins trausts og valda

                     skal tryggja´að farsæld verði vís

                     er veginn fram skal halda

                     til endurmats á öllu hér

                     í okkar trú og siðum

                     því öldin nýja nærri er

                     með nýjum stefnumiðum.

                                                             Ó, aldna þing, - upp rísi þú

                                                            með aukinn kraft og traust og trú !  

Þú aldna þing með frama´og frægð

sem flaug um veröld alla

en hefur stundum lagst í lægð

og látið merkið falla -

ó, megi aftur hugsjón há

þig hefja upp og styrkja,

rökin bestu´og sönnust sjá

og samheldnina virkja.

                                             Ó, aldna þing, - upp rísi þú

                                             með aukinn kraft og traust og trú !

Tekið verði á vanda Alþingis

Athugasemdir

[Sigurður Þorsteinsson, 11.9.2012 kl. 20:49]

Ómar á  sama tíma og þú heldur að frumvarp um nýja stjórnarskrá er ríkisstjórnin ekki að gera handtak til þess að stuðla að atvinnuuppbygginu. Atvinnuuppbygging þýðir ekki að allar sprænur landsins verði virkjaðar, en að við  skoðum með jákvæðum hætti allar þær hugmyndir sem stuðlar að atvinnuuppbygginu. Það er ekki ríkið sem á að fara í fjárfestingu heldur atvinnulífið.

[Þorsteinn Briem, 11.9.2012 kl. 21:06]

11.9.2012 (í dag):

Beinar erlendar fjárfestingar jukust um 100 milljarða króna í fyrra

[Ómar Ragnarsson, 11.9.2012 kl. 22:35]

1851 ríkti mikil örbirgð, hungur og hallæri hjá Íslendingum, fátækustu þjóð Evrópu, sem bjó í torfkofum í vegalausu landi.

Samt var eytt fé í það að þjóðin kysi sérstakt stjórnlagaþing, Þjóðfundinn, til að setja þjóðinni nýja, íslenska stjórnarskrá.

Samkvæmt þínum skilningi, Sigurður, hefði alls ekki átt að huga að þessu, heldur að hugsa eingöngu um atvinnuuppbyggingu.

1918 var búin að vera dýpsta kreppa, sem komið hefur á Íslandi frá aldamótunum 1900 og fram á þennan dag.

Þá hefðir þú væntanlega sussað, Sigurður, á nokkurn þann sem var að tala um stjórnarskrá fyrir Ísland, frjáls og fullvalda ríki, og talið að aðeins ætti að tala um og sýsla við atvinnuuppbyggingu.

1944 var kaupmáttur almennings miklu minni hér á landi heldur en nú og aðeins lélegir malarvegir og slóðar lágu um landið. Þá hefði alls ekki átt að vera að tala um lýðveldisstofnun og stjórnarskrá fyrir lýðveldið Íslands, heldur eingöngu um atvinnuuppbyggingu.