Íslands þúsund ár

31.10.2012 | 15:14

Ekki út í hött að æfingasvæði marsfara sé hér.

Það kemur æ betur í ljós að það var ekki út í hött að Bob Zubrin, forsprakki Alþjóðlegra samtaka um marsferðir, kom hingað til lands fyrir tólf árum til að athuga hvort hér á landi væru heppilegustu aðstæður á jörðinni til þess að hafa æfingasvæði fyrir marsfara framtíðarinnar.

Ég flaug með Zubrin yfir Kverkfjöll og til Mývatns og gerði um þetta frétt. Menn kinkuðu vorkunnsamlega til mín kolli yfir þessari "geimmóra"- og sérvitringafrétt.

Eitthvað breyttist viðhorfið hjá þeim, sem lásu aðalgrein Time tímaritsins með viðtali við Zubrin og NASA-menn, sem ræddu um það sem fyllilega raunhæfan möguleika að gera byggða nýlendu á mars.

Nokkrum árum síðar kom sendinefnd mars-samtakanna til landsins og valdi sér æfingasvæði í Gjástykki á hliðstæðan hátt og Askja hafði verið valin 1967 sem æfingasvæði fyrir tunglfarana.

Sú staðreynd á mikinn þátt í þeirri upplifun, sem ferðamenn í Öskju fá og aðdráttarafli þess svæðis. Þótt Gjástykki sé í verndar(nýtinga)flokki í rammáætlun er hart sótt eftir því að virkja þar og að minnsta kosti að teygja virkjanir norðan Kröflu það langt norður að það valdi mikilli umhverfisröskun á þeirri landslagsheild sem svæðið Leirhnjúkur-Gjástykki er.

Þrjár greinar formanns Landeigendafélags Reykjahlíðar í Morgunblaðinu síðasta vetur og athugasemdir við rammaáætlunina segja sína sögu um þetta.

Þegar sendinefnd marsáhugamannanna kom til landsins hafði hún valið til vara svæði í Kanada.

Nú sést að það svæði er ekki samkeppnishæft úr því að Ísland og Hawai eru nefnd eftir ferðir geimvagnsins Forvitni á mars.

Vísa til fyrri bloggskrifa minna um þetta mál og umsagnar sem ég sendi inn fyrir hönd Framtíðarlandsins til iðnaðarráðuneytisins vegna rammaáætlunar og hægt er að sjá á vef Framtíðarlandsins.