Merkileg dagsetning á morgun, 12.12.´12 og síðan 88 ára bið.

Frá nýjársdegi 2001, sem skrifaðist 1.1.´01 hafa komið ellefu dagar þar sem sama talan kom upp þrisvar, þ. e. 2. febrúar 2002, 3. mars 2003 o. s. frv. allt til ellefta ellefta árið 2011.

Ýmsir, sem gátu valið sér merkisdag, svo sem brúðkaupsdag, völdu þessa daga.

En tólfti tólfti 2012, 12.12.´12 verður síðasti dagurinn í þessari runu, því að árið hefur aðeins tólf mánuði þannig að á næsta ári kemur ekki svona dagur.

Síðan verður að bíða í 88 ár, til fyrsta janúar árið 2101, þ. e. 01.01.´01 til þess að þetta komi upp aftur.

Ef kærustuparið er 18 ára og missir af því að geta gert þetta, er ekki öll von úti ef þau ná bæði 106 ára aldri!

Þegar ég gerði textann "Árið 2012" fyrir 45 árum, kom ekkert annað ár til greina. Ástæðan var sú að vegna atkvæðafjölda i laginu mátti ártalið ekki vera meira en fimm atkvæði.

1967 var ekkert slíkt í sjónmáli fyrr en árið 2001. En helst vildi ég að spádómar textans kæmu seinna fram, til dæmis eftir 100 ár í stað 45, en laglínan leyfði það ekki.

Ef ég vildi fara lengra fram í tímann kom ekki upp hagkvæmt ártal fyrr en 3001, sem var fyrsta ártalið eftir 2012 sem var fimm atkvæði.

Af þessum sökum var hæsta raunhæfa ártalið sem nothæft var, árið 2012.

Já, merkileg dagsetning tólf, tólf, tólf og ártalið 2012.    

Athugasemdir

[Skuggi (IP-tala skráð) 11.12.2012 kl. 15:29]

Kærar þakkir fyrir þennan lagatexta sem og aðra.

Raula þetta lag m/texta, oft með sjálfum mér.

[Benedikt V. Warén, 11.12.2012 kl. 18:32]

12 12 2112 er líka merkileg vegn þess að summan er 12.

1+2+1+2+2+1+1+2=12 

[Aðalsteinn Geirsson (IP-tala skráð) 11.12.2012 kl. 18:57]

Hjá bankamönnum er 13.13.´13 dagssetning sem hjá eðlilegu fólki er 13.1. 2014 svo að ekki er allt búið enn.