Lutz Long ráðlagði Jesse Owens.

Langstökkskeppnin á Ólympíuleikunum í Berlín 1936 var dramatísk og settu tveir bestu stökkvararnir, Lutz Long og Jesse Owens hvað eftir annað Ólympíumet í henni.

Þetta var í ofanálag ekki einasta hörku keppni milli hins hvíta Þjóðverja Lutz Long og hins dökka Bandaríkjamanns Jesse Owens, heldur þurfti Long að bera þann kross að þurfa að sanna yfirburði hins aríska kynstofns undir vökulum augum Adolfs Hitlers.

Owens átti í erfiðleikum í undankeppninni og Long gaf honum ábendingar sem nýttust Owens vel til að omast örugglega í úrslit og stökkva síðan til sigurs 8,06 metra og setja nýtt Ólympíumet, aðeins sjö sentimetrum lakara en heimsmet hans.

Var drengskap Long við brugðið og urðu hann og Owens miklir vinir, rétt eins og þeir Max Schmeling og Joe Louis urðu perluvinir eftir tvö einvígi í hnefaleikahringnum 1936 og 1938, en síðari bardaginn var hápólitískur vegna yfirvofandi heimsstyrjaldar og líkt við einvígi einræðisins og lýðræðisins.

Long og Owens leiddust frá verðlaunapallinum og Owens sagði síðar, að allir verðlaunapeningar hans hefðu verið lítils virði miðað við þá 24ra karata vináttu sem Long sýndi honum.

Long féll í stríðinu og fékk síðar sérstök heiðursverðlaun fyrir drengskap sinn.

Ég þekki ekki reglur í golfi út í hörgul og finnst það sérkennilegt ef fólk má ekki tala um það sem það er að gera við samherja eða keppinauta.

En séu reglurnar svona verður að sjálfsögðu að fara eftir þeim.

Svekktar Keiliskonur gengu á dyr

Athugasemdir

[Dolli Dropi (IP-tala skráð) 19.8.2013 kl. 23:23]

Fólk er ekki að keppa "saman" í svona holukeppni. Þú sem keppandi verður að taka þínar eigin ákvarðanir.
 Þetta er ekki svo ólíkt að menn gætu verið að "laumum ráðum" að mönnum í Ólympíukeppni í skák
                ....hey, passaðu þig á þessu eitraða peði, taktu þessu línu, hann nær tempói á þessu....o.s.frv.

Liðið er að hagnast á þessu broti, og brotið gerðist 2svar. Held að þetta verði ekki ljósara.
  Ótrúleg framkoma hjá Keilli að ganga út, og henda verðlaunapeningunum.

      Greinilega ofdekraðar prinsessur þarna á ferðinni....

[Karl J. (IP-tala skráð) 20.8.2013 kl. 11:18]

Aðal vandamálið í mínum huga er allt þetta fólk sem ekki er hluti af leiknum sem er að flækjast út um allar trissur. Allt í lagi að standa meðfram brautum og fylgjast með en þegar horft er á myndir frá þessu atviki þá standa þær stöllur saman út á braut.

Þessi sem ráðið gaf hefði aldrei átt að vera út á braut í miðri keppni þar sem hún tilheyrði ekki leikendum, ekki kylfusveinn, dómari né keppandi.

[Ómar Ragnarsson, 20.8.2013 kl. 19:40]

Fyrst reglurnar eru svona og rökstuðningurinn þessi fyrir þeim, verður auðvitað að fara eftir þeim eins og ég sagði í pistlinum.

Ég á að vísu erfitt með að sjá beina samsvörun með því að tefla skák, en reglur eru reglur.