Orsökin fyrst og fremst lélegt malbik.

Of mikil notkun negldra hjólbarða hefur að vísu ráðið miklu um slitið á götunum í Reykjavík. Hitt hefur gleymst að orsökin er líka miklu lélegra efni í malbikinu en í öðrum löndum í Evrópu.

Skammtímasjónarmið hafa ráðið um þetta, því að öflun hins lélega efnis hefur kostað minna fé. En sá sparnaður hefur étist upp með miklu sliti og einnig hefur ástand gatnanna og heilspillandi áhrif á borgarbúa kostað sitt.

Þess vegna var löngu kominn tími til umbóta í þessu máli.   

Vilja malbik út fyrir steypu

Athugasemdir

[Þorsteinn Briem, 5.11.2013 kl. 22:10]

"Þess vegna var löngu kominn tími til umbóta í þessu máli."

Af þessari frétt að dæma hefur ekkert verið ákveðið í þessum efnum.

Og harla ólíklegt er að þeir sem búa við götur þar sem mjög mikil umferð er, til að mynda við Hringbrautina í Reykjavík, verði hrifnir af enn meiri hávaða þar frá umferðinni.

Ef svifryk frá umferðinni á þessum götum myndi hins vegar minnka töluvert eingöngu vegna þess að þær væru steyptar en ekki malbikaðar gæti hins vegar gegnt öðru máli.

30.10.2013:

Harðkornadekk gera naglana óþarfa

[Ólafur Kristinn Guðmundsson, 5.11.2013 kl. 22:21]

Harðkornadekk eða naglalaus dekk minka lítið þörfina fyrir alvöru malbiki......

Ólafur Guðmundsson.

[Ólafur Guðmundsson (IP-tala skráð) 5.11.2013 kl. 22:32]

Var að blogga um þessa frétt sérstaklega undir fyrirsögninni:

Reykjavíkurborg sjálf aðal sökudólgurinn....

Hér er ég algjörlega sammála vini mínum Ómari Ragnarssyni, auk þess að styðja Kjartan Magnússon í að þetta verði skoðað í þaula.

Málið er það, að við höfum notað mjög léleg efni í malbik í Reykjavík til margra ára.  Ástæðan er sú, að borgin rekur eigin malbikunarstöð, sem sækir megnið af sínu efni í eigin malarnámur í nágreni Reykjavíkur.  Þar er ekki spurt um gæði, heldur hvernig billegast er sloppið frá því að malbika götur.  Það efni er alltof mjúkt og brotkennt, enda ungt berg, fullt af holum sem safna vatni, frýs og molnar.

Auk þess, þá malbikum við miklu þynnra en aðrar þjóðir og mér er sagt rangt bik sé notað sem bindiefni.  Við notum ódýrt bik sem auðvelt er að leggja, en ekki það bik sem við ættum að nota fyrir okkar köldu og röku aðstæður það sést m.a. á því að  malbikið hér skríður undan þunga meir en annarsstaðar, t.d. á bílastæðum og við bílalúgur, þar sem bílar stoppa, en einnig á strætóstoppistöðvum og sérreinum strætó, enda þótt strætó aki ekki á nöglum.

Það eru til hér yfir 40 ára gamlir steyptir vegir eins og upp í Kollafjörð.  Minna slit er á honum en á tveggja ára malbikuðum götum í Reykjavík. Sem dæmi má nefna að vegir sem eru malbikaðir með innfluttum alvöru efnum eins og norsku kvartz slitna miklu minna.  Það á einnig við um Hvalfjarðargöng, þar sem ekki hefur verið malbikað frá því að göngin opnuðu og slit ekki mikið, þó svo að þar sé ekið um á nöglum.  Bleytan er reyndar minni, en álagið það sama, auk þess að undirlag er afar gott, enda berggrunnur og því almennilegt undirlag.

Erlendis sér maður ekki rásað og gauðslytið malbik eins og hér við svipaðar aðstæður, þannig að maður hlýtur að draga þá ályktun að eitthvað sé verulega að í lagningu á malbiki í Reykjavík og á Íslandi.

Í ljósi þess að hér er svifryk og götur slitna mikið, þá er með ólíkindum að menn skuli ekki vinna gegn menguninni með því að þrífa göturnar með háþrýstiþvotti.  Slíkt sést ekki hér.  Í besta falli eru götur sópaðar einusinni á ári, þar sem rykinu er þyrlað upp, eða reynt að líma það niður með saltpækli eða öðru gumsi, sem gerir lítið annað en að drepa allan gróður í nágreninu og breytast síðan í meira svifryk.

Erlendis þar sem ég þekki til, eru götur þrifnar með reglulegu og þéttu millibili með háþrýstiþvotti þegar þiðnar.  Þar sem slíkt er gert sést ekki svifryk.

Að lokum er rétt að geta þess, að þróun í nagladekkjum og öðrum aðferðum til að ná fram gripi í hálku hefur þróast mjög mikið undanfarin ár.  Nagladekk eru miklu betri í dag en  fyrir nokrum árum, með betri tækni í dekkjum, léttari og færri nöglum ásamt fleiri atriðum.

Ég held að menn ættu að líta sér nær og horfa á þetta raunsætt með lausnir í huga, í stað þess að kenna nagladekkjum um allt og sjá einu lausnirnar í bönnum og skattlagningu.

 Ólafur Kr. Guðmundsson.

[Þorsteinn Briem, 5.11.2013 kl. 22:34]

Í mörg ár átti ég íbúðir á móti Björnsbakaríi við Hringbraut, þar er gríðarlega mikil umferð og gluggar yfirleitt lokaðir Hringbrautarmegin, bæði vegna svifryks og hávaða frá götunni.

"Iðnaðardemöntum, harðkornum, er blandað í slithluta harðkornadekkja. Kornin koma í ljós við akstur og byrja að vinna sem öryggisbúnaður í hálku og bleytu.

Iðnaðardemantarnir stórauka veggrip í hálku og auka rásfestu. Svifryk er hverfandi lítið og demantarnir skemma ekki malbik. Síðast en ekki síst eru árstíðabundin dekkjaskipti úr sögunni því keyra má á harðkornadekkjum allt árið."

Harðkornadekk gera naglana óþarfa

[Hallgrímur Hrafn Gíslason, 5.11.2013 kl. 22:50]

Þá verður spurningin sú, var betra efni notað í steypta veginn upp í Kollafjörð upp úr 1970 en í malbikið núna,?

[Þorsteinn Briem, 5.11.2013 kl. 22:56]

"Harðkornadekk eru reynd og rannsökuð við allar aðstæður og hafa staðist ströngustu gæðapróf.

Starfshópur samgönguráðs komst að þeirri niðurstöðu árið 2009 að harðkornadekk væru bestu vetrardekkin fyrir aðstæður á SV-horninu.

Ráðið hvatti til þess að unnið yrði að því með fræðslu og áróðri að harðkornadekk kæmu í stað nagladekkja.

Vegslit af völdum harðkornadekkja er 14 sinnum minna en af nagladekkjum."

Harðkornadekk gera naglana óþarfa

[Hallgrímur Hrafn Gíslason, 5.11.2013 kl. 23:07]

Hvað verður um öll harðkornin sem koma úr dekkunum þegar þau slitna.  Valda þau ekki svifriki?

[Þorsteinn Briem, 5.11.2013 kl. 23:18]

Það væri nú ekki gott ef demantar yrðu að ryki.

Ég myndi alla vega ekki gefa dömu demanta ef mikil hætta væri á því.

[Þorsteinn Briem, 6.11.2013 kl. 03:01]

Malbik var 55% svifryks í Reykjavík að vetrarlagi fyrir áratug en einungis 17% í febrúar, mars og apríl síðastliðinn vetur.

Og salt var 11% svifryks fyrir áratug en einungis 3% síðastliðinn vetur.

"Frá árinu 2000 hefur notkun nagladekkja í Reykjavík verið könnuð árlega og var 67% veturinn 2000-2001 en komin niður í 38% síðastliðinn vetur."

"Auk minnkunar á notkun nagladekkja hafa orðið breytingar á malbikstegundum og malbikunaraðferðum sem hefur áhrif á slitþol malbiksins og um leið magn og gerð svifryks frá malbikinu."

"Miklabraut er lögð malbiki með innfluttri harðri grjóttegund sem á að gefa mikið slitþol.

Grensásvegur er aftur á móti lagður malbiki með innlendri grjóttegund, þar sem slitþolið verður ekki eins mikið og með notkun innflutta grjótsins."

Samsetning svifryks í Reykjavík - Vegagerðin í september 2013

[Hallgrímur Hrafn Gíslason, 6.11.2013 kl. 09:57]

Steini, það eru líka notuð skeljabrot í harðkornadekkin.

[Elvar Níelsson (IP-tala skráð) 6.11.2013 kl. 10:18]

Prófanir á mörgum tegundum hjólbarða við ýmsar aðstæður gefa til kynna að nagladekkin eru talsvert betri en harðkornadekk, FÍB hefur birt niðurstöður slíkra kannana.

Það er ábyrgðarhluti af hendi Reykjavíkurborgar og annara að halda því fram að nagladekk séu óþörf. Reynslan hefur sýnt mér að götur eru illa hreinsaðar, bæði af snjó og ryki.

Lögreglan hefur notað nagla síðustu ár - því á almennur bíleigandi ekki að nota nagla. Það er undarlegt að almenningur virðist eiga að sætta sig við minna öryggi í umferðinni en æskilegt er.

[Þorsteinn Briem, 6.11.2013 kl. 13:31]

Framsókn oft í ryki reið,
röftum hér um vegi,
en til heljar lá sú leið,
og losnar þaðan eigi.

[Örn Johnson ´43 (IP-tala skráð) 6.11.2013 kl. 15:55]

Mikið væri ánægjulegt ef Borgin og Vegagerðin réðu malbikunarfólk sem réði við það verkefni að þegar malbik er tengt við annað malbik að þá verði ekki til dalur og/eða fjall sem hendir bílum í loft upp. Þetta er alvarlegt metnaðarleysi hjá þessum aðilum. Mér er sagt að hér hafi einu sinni verið til maður sem gat þetta en hann flutti til Noregs og er ekkert á leið heim, enda kunnátta hans í hávegum höfð þar í landi!