"Bjór og búálfar."

Það þykir fínt og gott, sem knúði Íslendinga til Hrunsins, að hefja veraldleg og áþreifanleg verðmæti, mæld í krónum, tonnum og megavöttum ein til öndvegis en hæða, spotta og lítilsvirða andleg verðmæti hugans.

Sú mikla blaðakona, Agnes Bragadóttir, vinkona mín, reit í grein um það að ég hefði hlekkjað mig við vinnuvélar í Gálgahrauni "út af nokkrum steinum." Neðar gat maður víst ekki komist.

Þó dettur Agnas í þann pytt í þessari setningu að hugarflug hennar gerir það að blaðamennskustaðreynd að ég hafi hlekkjað mig við vinnuvélar og mun það kannski í framtíðinni verða að því sem við Baldur Hermannsson skilgreindum eitt sinn undir hugtakið "viðurkenndur misskilingur."

Verður hlekkjun mín og syngjandi vélsög víkingarsveitarmanna við að saga hlekkina í sundur þá orðin að staðreynd í heimildum framtíðarinnar fyrir tilstuðlan Agnesar. 

Agnes sannar óvart mátt hugarflugsins í einni setningu sem á að afsanna gildi "nokkurra steina" í Gálgahrauni.

"Steinarnir" eru reyndar heil landslagsheild, endi hins magnaða Búrfellshrauns og vettvangur mikilla sagna sem birtast í nöfnunum Gálgahraun, Gálgaklettur, Sakamannastígur, Fógetagata, Móslóði, Garðastekkur, - allt heimildir um atburði og líf genginna kynslóða í hrauninu.

Þar að auki myndefni sumra af frægustu verkum meistara Kjarvals.   

Í Gálgahrauni kynntist andófsfólk nokkrum prýðismönnum, sem vegna utanaðkomandi aðstæðna horfðust í augu og áttu samskipti við okkur í hrauninu og við áttum útaf fyrir sig ekkert sökótt við.

Þeir voru að vinna sína vinnu þar sem annars staðar.  

Þessir menn munu nú standa fyrir því að færa Álfakirkju og uppskera væntanlega háð og spott fyrir það hjá mörgum. Hafa þó margir vegagerðamenn víða um land sýnt landinu og sögu þess svipaða virðingu.

Þegar ég var barn að aldri þrjú heil sumur í Kaldárseli upplifði ég í sterkri upplifum Álfakirkju rétt hjá sumarbúðunum og tröllkerlingarnar þrjár, sem urðu að steini uppi á Valahnjúkum. Á bak við tröllkerlingarnar var eftirminnileg saga, sem séra Friðrik og hans fólk hélt vel utanum.  

Kyngimögnuð sagan af Tungustapa í Dölum og lög og ljóð um álfa, svo sem lagið "Kirkjuhvoll" draga að ferðafólk og hrífa þá sem hlusta á fagran og tilfininngaríkan flutning tónlistarfólks á lagið um álfana.

Þúsundum saman hafa erlendir ferðamenn komið til Íslands og farið um Norðurmýri til þess að upplifa hugarfóstur Arnaldar Indriðasonar.

Í lok mánaðarins verður farin hópferð Íslendinga á slóðir í Þýskalandi sem ber heitið "Bjór og búálfar".

Fólkið, sem býr þar, er ekkert feimið við þjóðsögurnar þýsku og dularmögn þeirra. 

Fólk hrífst af málverkum Kjarvals af "nokkrum steinum" í Gálgahrauni.

Dóttursonur minn upplifir miklar sögur og viðburði í hreiðrabyggð við lund við Helluvatn þótt hinir fullorðnu viti aðeins um eitt hreiður þar.

Þegar ég lá veikur sem ungur drengur og pabbi gaf mér landakort til að stytta mér stundir, af því að hann vissi að ég var orðinn landafræðinörd, varð staður á Fjallabaksleið syðri, sem heitir Sátubotnar, að miklu sjálfspunnu sögusviði hugmyndaflugs og dagdrauma með atburðum í ímyndaðri og fjölmennri útilegumannabyggð í Sátubotnum.  

Enn í dag birtast í huga mér ljóslifandi minningar um sögur og atburði á leiðinni frá Hungurfit og upp í Sátubotna, rétt eins og þeir hefðu gerst í raunveruleikanum. Samt er ekki hægt að mæla minningar í tonnum eða megavöttum.

"Maðurinn lifir ekki á brauði einu saman" sagði meistarinn mikli. Án hugarins væri bústaður hugans, líkami okkar, ekki mikils virði.

"Ég hugsa, þess vegna er ég" var eitt sinn sagt. Og þau orð lifa og eru sönn löngu eftir að sá, sem mælti þau, hefur sameinast moldinni, sem hann var kominn af.   

Álfakirkjan verður færð

Athugasemdir

[Haraldur (IP-tala skráð) 11.6.2014 kl. 10:57]

Mikið er ég sammál þér hérna.
Og hef mikla samúð með Agnesi sem fylgir slóð eineltisins til að hafa sitt lífsviðurværi.

Á erfitt veð að ímynda mér að henni líði vel.

[Gísli (IP-tala skráð) 11.6.2014 kl. 11:19]

Mér sýnist að þegar kemur að umhverfismálum sannast máltækið ,á títtnefndri Agnesi

"að vera eins og álfur út á hól„ og svo sem í fleiri málum 

[corvus corax, 11.6.2014 kl. 11:20]

Flottur pistill að vanda. Og að gefnu tilefni, ég hef enga samúð með Agnesi Bragadóttur vegna þess að "hver er sinnar gæfu smiður".

[Guðjón Sigþór Jensson, 11.6.2014 kl. 12:11]

Þar kom að því!

Lofað var hátíðlega að ekki yrði hróflað við merkum jarðmyndunum m.a. því sem Kjarval hafði málað og hrifist af. Nú á að flytja þessar jarðmyndanir svo lóðabraskaranir í Garðabæ fái sínar óskir uppfylltar. þetta er eins og hver annar fíflagangur í boði braskaranna!

[Gústi (IP-tala skráð) 11.6.2014 kl. 12:38]

Málflutningurinn verður svolítið hjákátlegur þegar haft er í huga að síðan Kjarval sletti málningu á striga hefur varla sést þarna hræða fyrir utan mælingarmenn vegagerðarinnar. Svipað og þegar fjölmiðlar þurfa að senda ljósmyndara sérstaklega til að mynda foss í einhverri sprænunni sem allt í einu er orðinn ómetanleg náttúrugersemi en enginn hefur séð ástæðu til að mynda fyrr og á sér jafnvel ekki nafn.

[Þorsteinn Briem, 11.6.2014 kl. 12:49]

Svona svipað og "Gústi".

[halkatla, 11.6.2014 kl. 14:03]

Já, bara að allir gætu upplifað þetta svona, og meðtekið.

[Þorvaldur S (IP-tala skráð) 11.6.2014 kl. 14:29]

„...allt heimildir um atburði og líf genginna kynsóða í hrauninu.“

Ætli þetta orðalag sé „freudian slip“?

[Þorsteinn Briem, 11.6.2014 kl. 14:45]

Það er að sjálfsögðu skemmtilegt að sjálfstæðismenn geri stanslaust grín að Sjálfstæðisflokknum í Garðabæ.

Gálgahraun var árið 2009 friðlýst samkvæmt tillögu Garðabæjar og bæjarstjórnin hefur því væntanlega talið hraunið vera náttúruperlu.

Auglýsing um friðlýsingu Gálgahrauns í Garðabæ

Ríkið greiðir kostnaðinn við nýjan Álftanesveg, sem kostar hátt í einn milljarð króna að meðtöldum flutningi á álfakirkju.

Og gott að bæði Sjálfstæðisflokkurinn og álfar séu kristnir en ekki múslímar.

Álfatrú er hins vegar ómerkilegri en kristin trú.

[corvus corax, 11.6.2014 kl. 16:07]

Steini Briem, álfatrú og kristin trú eru alls ekkert sambærilegar þar sem kristin trú felst í því að trúa á guð og Krist og allt sem því fylgir en álfatrú snýst um að trúa eða trúa ekki að álfar séu til en ekki að trúa á þá sem slíka með tilbeiðslu.

[Þorsteinn Briem, 11.6.2014 kl. 16:16]

Hvorki hefur sannað né afsannað að einhverjir guðir eða álfar séu til, enda er um trú að ræða í báðum tilfellum en ekki vísindi.

Og hvorutveggja jafn merkilegt að ómerkilegt.

[Þorsteinn Briem, 11.6.2014 kl. 16:31]

Taka tvö:

Hvorki hefur verið sannað né afsannað að einhverjir guðir eða álfar séu til, enda er um trú að ræða í báðum tilfellum en ekki vísindi.

Og hvorutveggja jafn merkilegt eða ómerkilegt.

Móðurafi minn var bæði kristinn og álfatrúar og í fjölskylduboði þvörguðu hann og dómkirkjupresturinn um álfatrú.

Ég hef sjaldan skemmt mér betur.

[Ómar Bjarki Kristjánsson, 11.6.2014 kl. 17:00]

Það er ekkert garantí fyrir því að álfarnir séu endilega kristnir. Jú jú, það er talið að flestir álfar hafi tekið kristna trú en jafnframt er vitað að sumir álfar eru hundheiðnir.

Það er ekkert hægt að útiloka að einhverjir álfanna hafi tekið upp Islamstrú og í raun sé þarna um mosku að ræða.

Eg er nú alveg hissa á að ekkert heyrist frá framsóknarmönnum þessu viðvíkjandi.

[Ómar Ragnarsson, 11.6.2014 kl. 21:34]

Innsláttarvilla frá því í morgun hefur verið leiðrétt, takk fyrir ábendinguna.

Gústi, fram undir miðja síðustu öld höfð nær engir séð Landmannalaugar, hvað þá Ljótapoll, Jökulgil eða Hrafntinnuhraun.

Samkvæmt kenningu þinni eru þessi náttúruverðmæti einskis virði nú af því að menn þekktu þau ekki þá.

Kenningin um að fáfræði um fyrirbæri í núinu hverju sinni eigi að ráða öllu varðandi mat á þeim til allrar framtíðar er augljóslega kolröng.

Vísustu vísindamenn miðalda töldu jörðina vera flata og báru fyrir sig þá vitneskju, sem þá var fyrir hendi. 

[Gústi (IP-tala skráð) 12.6.2014 kl. 00:26]

Þar sem þú hefur ákveðið að gera heila kenningu úr ábendingu minni ætla ég að svara eins:

Samkvæmt kenningu þinni Ómar þá hafa vísindamenn samtímans ávalt rangt fyrir sér. Fáfræði ríkir um öll fyrirbæri í núinu. Og ekki skal hrófla við einni steinvölu eða raska flæði lækjarsprænu fyrr en við vitum nákvæmlega hvort einhver hefði áhuga á þessu eftir nokkur hundruð ár.

Samkvæmt kenningu þinni eru ljúfar æskuminningar þínar rétthærri en afkoma og framtíð barna minna. Og að eiga ekki fyrir salti í grautinn er innantómt hjóm og smámunir þegar álfa- og tröllasögur standa til boða.

Samkvæmt kenningu þinni er það sögufölsun að segja þig hafa hlekkjað þig við vinnuvél. En kenning þín telur ekkert athugavert við það að kalla Garðahraun nafni nágranna síns, Gálgahrauns, því Gálgahraun er friðlýst og liggur utan fram­kvæmda­svæðis­ins en áhrifin eru meiri af mótmælunum ef fólk heldur að um Gálgahraun sé að ræða. "..Verður hlekkjun mín og syngjandi vélsög víkingarsveitarmanna við að saga hlekkina í sundur þá orðin að staðreynd í heimildum framtíðarinna.." og svo verður sett upp stytta í Gálgahrauni, góðan spöl frá orrustuvellinum.

Samkvæmt kenningu þinni á eitthvað sem flokka má sem "heil landslagsheild" að vera ósnert til eilífðar, nema hægt sé að sanna að það muni aldrei verða talið merkilegt. Gallinn, eða kosturinn, er hinsvegar sá að "heil landslagsheild" eru til dæmis Vestfirðir, Austurland, Reykjanes, Laugardalurinn, Seltjarnarnesið o.s.frv..
"heil landslagsheild" er ekkert merkilegt. Það er ekki til sú bygging, gata eða girðingastaur neins staðar í heiminum sem ekki er á "heilli landslagsheild".

Ef við ætlum að fara að meta hvern stein samkvæmt því að einhverntíman í framtíðinni gæti hann þótt merkilegur þá byggjum við bara moldarkofa.