Til eru Íslendingar sem haga sér svona eða mæla því bót.

Atvikið í flugvél Ryanair, sem greint er frá í tengdri frétt, þar sem flugfarþegi ræðst á fatlaða blökkukonu fyrir það að hún er fötluð og þeldökk, er því miður líka til á meðal okkar Íslendinga.

Meira að segja má sjá núna á íslenska blogginu að ekkert hafi verið út á framkomu mannsins að setja, hann hafi bara verið að segja sannleikann um "heimsku beljuna" og "svarta ljóta bastarðinn." 

Og hver manneskja verði að sætta sig við það að sagður sé sannleikurinn um hana. 

Engin ástæða sé til að gera neitt veður út af svona löguðu, þetta sé ekki frétt.

Ég lenti einu sinni í því á leið frá Kararíeyjum til Íslands í leiguþotu með öðrum Íslendingum, að fljótlega eftir að komist var í flughæð, ruddist ölvarður farþegi að okkur hjónunum og konu sem sat okkur við hlið, og byrjaði að ausa yfir mig svívirðingum. 

Hann linnti ekki látum og þegar lengra leið á flugið fóru farþegar í sætunum í kringum okkur að kvarta við flugfreyjurnar yfir því að ekki væri hægt að fá frið á þessari löngu flugleið fyrir manninum. 

Þær komu til okkar og báðu hann um að fara í sæti sitt, en við það færðist hann allur í aukana og svo fór, þegar flugliðarnir gátu engu tauti við hann komið, að ég bauðst til að reyna að leysa málið með því að standa upp og fara fram á klósett. 

Það er ekkert grín að fást við svona í sex klukkustunda flugferð yfir úthafi langt frá landi. 

Hann elti mig fram eftir vélinni, þannig að þegar ég kom út af náðhúsinu, sá ég mér þann kost vænstan að setjast í autt sæti allra fremst í vélinni, langt frá fyrri stað, þar sem ekki voru eins margir nálægt mér. 

Þeir, sem þarna höfðu setið, reyndu að færa sig fjær, og það þýddi bara það eitt að maðurinn ruddi mér yfir í næsta sæti við og hlammaði sér sjálfur niður við hlið mér, slefandi og lítt geðslegur. 

Augljóst var að þarna, yfir miðju Atlantshafinu, væri ekkert hægt að gera nema að reyna að koma því þannig fyrir að maðurinn eyðilegði ekki flugferðina nema fyrir sem fæstum. 

Þetta varð til þess að það sem eftir var ferðarinnar varð ég að dúsa þarna og biðja hann um að hafa lægra, en við slíkar bónir hertist hann bara upp og mokaði út úr sér óhroðanum: "Djöfuls merkikerti ertu! Hvað heldurðu að þú sért?  Að líta niður á fólk og vilja ekki tala við það, auminginn þinn!" O. s. frv. o. s. frv..

Úthaldið hjá honum var ótrúlegt, hann hafði það af sem hann hafði greinilega ætlað sér í upphafi ferðarinnar, að eyðileggja allar sex klukkustundirnar heim. 

Nú les maður á íslenska blogginu svipaðar lýsingar á blökkukonunni og ausið var yfir mig hér um árið:   "Taugaveiklaðar kellíngar, sem þola ekki að vera kallaðar beljur.." - "hörundsár, á erfitt með að heyra að þú ert skíthæll með hor í nös." - "Sumir eru svartir, aðrir skáeygir, og enn aðrir fatlaðir á sál og líkama." - "Ef þér finnst staðreyndir særandi, then, get over it."

 

 

 

„Sama hvort hún er fjandans fötluð“

Athugasemdir

[Haukur Kristinsson (IP-tala skráð) 22.10.2018 kl. 14:13]

Hef minnst á það áður hér á síðu Ómars að framkoma af þessu tagi hefur færst í aukana og að ég álíti að ein megin ástæðan fyrir því er framkoma fávitans í Hvíta húsinu, en einnig uppgangur kynþáttahaturs í Evrópu.

[Þorsteinn Siglaugsson, 22.10.2018 kl. 14:25]

Já, Trump ber auðvitað ábyrgð á öllum dónaskap í veröldinni, og ekki síst á dólgnum sem hékk yfir Ómari í sex tíma flugferð!

Það verður nú munur þegar hann hættir sem forseti BNA!

[Haukur Kristinsson (IP-tala skráð) 22.10.2018 kl. 14:44]

Hluti af ummælum mínum fyrir skömmu. Hér gæti verið um Trump "effect" að ræða. Trump lætur að vísu ekki myrða andstæðinga sína, en rekur þá úr starfi og svertir mannorð þeirra með öllum ráðum. Slíkur ignorant og dóni hefur aldrei áður verið húsbóndi í Hvíta húsinu. Gæti valdið því að ríkisstjórnir (regimes) færa sig upp á skaftið, verða djarfari, ósvífnari. Rússar nota eitur til að koma andstæðingum fyrir kattarnef í fjarlægum löndum. Sádar myrða blaðamann í konsúlati þeirra erlendis. Yfirmaður Interpols, Kínverjinn Meng Hongwei, er hnepptur í fangelsi í Kína. Og á litla krútti Íslandi er sett lögbann á fréttaflutning um brask og innherjaviðskipti forsætisráðherrans og fjölskyldu rétt fyrir kosningar.