Í raun reynt að draga allt Alþingi með sér niður í svaðið.

Nú er 1. desember liðinn, en vegna þess að ég hlakkaði til þess að njóta þessa dags, ákvað ég eftir að eftir að sexmenningarnir á Klausturbarnum, höfðu gert sitt til að eyðileggja stemninguna, að skrifa ekkert eða segja um það mál þennan dag, þótt full ástæða væri til í þessu sorglega máli.

En nú er kominn 2. desember og málið fer enn versnandi.  

Þrátt fyrir orð um að þeir skammist sín, reyna þessir frumherjar í nýrri tegund af klausturlifnaði að komast hjá því að taka eðlilegum afleiðingum af því að hafa hraunað yfir samstarfsfólk sitt á þingi, svo að þjóðin er agndofa. 

Ég hef stutt Sigmund Davíð Gunnlaugsson í ýmsum ágætum stefnumálum hans. Ég hallaðist strax að því fyrir 18 árum að það ætti að reisa algerlegan nýtt þjóðarsjúkrahús á nýjum stað á höfuðborgarsvæðinu og hallaðist einnig að andófi SDG um gegn því að rífa skefjalaust niður menningarverðmæti og vinalegar byggingar. Sigmundur Davíð gerði mikið gagn í því máli ásamt fleirum. 

Siðan kom að vísu Wintrismálið, en rykið kannski vonandi byrjað að setjast, þegar þetta endemis mál blossar allt í einu upp og versnar enn með hverjum degi.

Manni er alveg lokið, þegar hann kemur fram með það í fjölmiðlum að þingmenn í öðrum flokkum en Miðflokknum og Flokki fólksins hafi iðulega haft í frammi mun verri munnsöfnuð og níð en Klaustursgestir, þegar þeir hraunuðu yfir aðra þingmenn á þann einstæða hátt sem tekinn var upp á snjallsíma. 

SDG nefnir engin nöfn þingmanna hinna flokkanna, og þar með liggja allir þingmenn undir grun, því enginn getur sannað né afsannað neitt. 

Hér er að verki verið í anda orðanna að "svo má böl bæta að benda á annað verra" en á alveg einstaklega skaðlegan hátt. 

Þetta eru nefnilega mjög alvarlegar ásakanir, því að það þarf talsvert til að ganga lengra í soralegu orðbragði en gert var 20 nóvember síðastliðinn.

Með þessu er gerð tilraun til þess að draga alla þingmenn á einu bretti niður í svaðið. 

Hefði mátt halda að menn forðuðust að gera málið verra en það er og lítt skiljanlegt að fara þessa leið í málsvörn.  

„Mér finnst það svo sorglegt“

Athugasemdir

[Jón Valur Jensson, 2.12.2018 kl. 01:04]

Gazalegt, Ómar, gazalegt!

En Sigmundur gæti líka verið að vísa til þingmanna fyrri þinga. En með því að segja það er ég líklega búinn að tvöfalda hóp "grunaðra", upp í 126 manns! og þá líður þér enn verr þegar þú vaknar upp við þá hugsun á sunnudagsmorgni! (Verður bara að drífa þig út í kirkju.)

Annars dettur mér ekki í hug að verja það sem klámfengið var og niðrandi um kvenfólk í þessum borðræðum. (Tischreden Lúthers, með bjór við höndina, voru víst grófar á köflum; Adolf Hitler tíðkaði svo aðrar enn hreinskilnari og ískyggilegri, en þarna í þessum nútíma-borðræðum Klaustur-manna falla þær, þegar verst gegnir, niður á eitthvert karlagrobbsstig eða jafnvel ungæðislegt eins og hjá mönnum sem nýkomnir eru með kynhvöt og þurfa að sanna sig á einhvern hátt.)

[Arnór Baldvinsson, 2.12.2018 kl. 01:38]

Sæll Ómar,

Ef Sigmundur fer með rétt mál, þá er Alþingi Íslendinga orðið að einhverskonar heimili fyrir vandræðafólk!  Þetta er ekkert annað en siðblinda á háu stigi og maður sér undarlegustu rök fyrir því að þetta hafi nú bara alls ekki verið svo slæmt.  

Ég vann talsvert í hafnarvinnu þegar ég var ungur og bróðir minn var sjómaðurinn í hátt í fjörutíu ár.  Við höfum nú heyrt ýmislegt illa pússað um ævina, en við vorum sammála um að okkur rekur ekki minni til að hafa heyrt svona orðbragð!  Ef þaðan af verra viðgengst í sölum Alþingis, þá er bara eitthvað mikið að!

Kveðja,

[Bjarni (IP-tala skráð) 2.12.2018 kl. 08:56]

Merkilegt hvað það er allt í einu til mikið af fólki sem hefur aldrei talað illa um aðra.  Merkilegt líka að ég þekki engan sem ekki hefur talað illa um aðra.  Er ég í svona slæmum félagsskap?

Ekki síður mekileg þessi vandlæting kvennu, þekki enga konu sem ekki hefur reglulega drullað yfir karlmenn sem hóp, og þeim fjölgar mikið nú um stundir.

GamGamlar tilvitnanir í gamla bõk hafa aldrei ãtt betur við en nú, sá kasti steininum sem syndlaus er.

[Grímur (IP-tala skráð) 2.12.2018 kl. 09:39]

Ekki var nú orðbragðið um "feita, miðaldra, hvíta karla" á Austurvelli neitt til að vera kenna börnunum að hafa eftir sem þangað voru dregin

En það er víst í lagi að vera með "réttu" fordómana

[Hörður Þormar, 2.12.2018 kl. 10:14]

Sexmenningarnir sátu að sumbli í 3-4 klst. og  töluðu hátt með alkunnu orðbragði.

Það er furðulegt að þeir veittu ekki athygli manni sem sat við næsta borð allan þennan tíma.

Hvílíkur athyglisbrestur. 

[Ómar Ragnarsson, 2.12.2018 kl. 10:50]

Ein hvers staðar sá ég að þeir hefðu haldið að hann væri útlendingur. 

Auðvitað. Nú orðið er stundum eins og maður sé staddur í einhverri erlendri smáborg. 

Orðbragðið í ræðunni á Austurvelli var nú reyndar í því samhengi að áður hafði verið vitnað lítillega, en orðrétt í orðbragðið í klausturlifnaðinum. 

Og þá virkaði orðbragðið "miðaldra feitir karlmenn" eins og hjáróma rödd í kórdreng. 

[Bjarni (IP-tala skráð) 2.12.2018 kl. 11:06]

Hjãróma rödd í kõrdreng?

Sé ekki betur en pistlahöfundur sé hér að mæla því bót að þjóðfélagshópur sé svívirtur ã opinberum vettvangi.  Þetta gerir hann ódrukkinn og þurfti ekki leynilegar upptökur til að koma upp um kauða.

[Sigurgeir Árnason (IP-tala skráð) 2.12.2018 kl. 11:16]

  Fækka þingmönnum um helming,hætta við stækkun alþingis ekkert aukið skrifstofurými fyrir þingmenn,enginn styrkur til stjórnmálaflokkanna sem er grasrótin að spillingu innan þjóðarinnar.þeir sem vilja hafa stjórnmálaflokka geta styrkt þá sjálfir og séð um rekstur þeirra, fjármunir sem sparast við áðurnefndar aðgerðir mætti nota til styrktar fátækum.öryrkjum eða öldruðum er lifa við alltof kröpp kjör.Hætta að styrkja aulasamfélagið á Austurvelli.

[Hörður Þormar, 2.12.2018 kl. 17:09]

Jón Valur minnist á Martin Lúther. Sennilega er hann einn mesti sorakjaftur sem sögur fara af. Talsmáti hans ber vott um sjúklega grimmd og hrottaskap. T.d. vildi hann láta drekkja vansköpuðum og vanþroska börnum, kallaði þau "afkvæmi djöfulsins". Ekki ætla ég að lýsa pyntingum og aftökuaðferðunum sem hann mælti með, þær má sjá í meðfylgjandi heimildaþætti. Því er reyndar  haldið fram að flest þessi ummæli hafi verið ölæðisraus, enda hafi Lúther innbyrt allt að 2 L af víni með steikinni.

Á 500 ára afmæli "siðbótarinnar", á síðastl. ári, var Lúther hampað fyrir kjark  sinn, vit og dugnað, en þessari dökku hlið sópað vandlega undir teppið.  Og ekki er hægt neita því að Lúther framdi þrekvirki, t.d. með biblíuþýðingu sinni sem var forsenda fyrir aukinni lestrarkunnáttu og þar með frjálsri hugsun:                 Die dunkle Seite Martin Luthers - Luther einmal anders - Dokumentation