Drepa aðilar aðila? "Aukning á konum." "Slysatíðni dregst mikið saman."?!

Einkennileg og algerlega óþörf er sú árátta, sem veður uppi, að nota orðin aðlila og meðlimi  um allt og alla. 

Í frétt er sagt frá því að lögreglan hefði verið kölluð út vegna óvelkomins aðila í húsi, og að þegar lögreglan var að vísa aðilanum út, hafi aðilinn slegið lögreglukonu í andlitið. 

Orðið aðili geldur fyrir þessa ofnotkun, því að með því er það útvatnað og leiðir oft til  merkingarleysu. 

Fréttin um aðilann verður líka ónákvæmari og lakari, því að það hefði verið örlítið nákvæmara að vita hvort árásarmaðurinn var kona eða karl.

Hvar endar þetta? Verður "aðili ársins" valinn um næstu áramót og sömuleiðis "íþróttaaðili ársins"?

Og verður niðurdegið og dapurt fólk ekki aðilum sinnandi? Að ekki sé nú talað um setningu Nobelskáldsins, sem verður kannski orðuð svona: "Hvenær hefur aðili drepið aðila..?" 

Enn eitt stórlega ofnotaða orðið, sem tröllríður umræðunni, "aukning", var það fyrsta sem heyrðist í útvarpinu við að kveikja á fréttunum áðan. 

Þar talaði kona um það að "það hafi orðið aukning á konum."  Hvenig "aukning"?

Hafa þær stækkað og kannski orðið óléttar?

Nei, sennilega ekki, heldur hafði konum fjölgað. 

Í einni frétt um daginn var sagt: "Það hefur orðið aukning í magni fólks" í staðinn fyrir að segja einfaldlega: "Fólki hefur fjölgað." 

 

P.S.  Svo, þegar blöðin eru opnuð í dag, blasir við fyrir þessi fyrirsögn:

"Slysatíðni dregst mikið saman."

En hvers vegna ekki að nota einfaldara mál: 

"Slysum fækkar mikið." 

 

 

Sló lögreglukonu í andlitið

Athugasemdir

[Guðmundur Ásgeirsson, 16.7.2020 kl. 16:46]

Einnig er óþolandi sá nýlegi ósiður fréttabarna að hefja fyrirsagnir á orðunum: "Þetta er afhverju" ... (X gerði Y).

Þar er um að ræða þráðbeina íslenskun á enska orðalaginu "This is why" ... (X did Y) en útkoman verður málfræðileg vitleysa.

Rétt íslenska: "Þetta er ástæða þess að" ... (X gerði Y).

Eða einfaldlega: "Ástæða þess að" ... (X gerði Y).

Við tökum ekki sturtu heldur förum í sturtu.

Við gerum ekki diskana heldur þvoum þá upp.

Ástæða þess er að við tölum íslensku en ekki ensku.

[Kolbrún Hilmars, 16.7.2020 kl. 18:22]

Þetta gerir langskólamenntun fyrir okkur.  Við þurftum að skila óáhugaverðum  ritgerðum með lágmarksorðafjölda, og orðalag eins og "Það hefur orðið auking í magni fólks" vegur þyngra en "Fólki hefur fjölgað".  Þetta er afleiðingin.  :)

[Guðmundur Ásgeirsson, 16.7.2020 kl. 18:37]

Kolbrún. Ég er langskólagenginn og þekki ekki þetta vandamál, en kannski hrjáir það þá sem hafa lítið fram að færa efnislega. ;)

[Ómar Ragnarsson, 16.7.2020 kl. 19:02]

Orðalag þitt, "með lágmarks orðafjölda", er alveg á skjön við þær óþörfu málalengingar sem bæði lengja textann og gera hann tyrfnari.