Sérkennilegur bílafróðleikur Jónasar Elíassonar.

Í Fréttablaðinu og Morgunblaðinu er að jafnaði birtur fróðleikur um bíla, sem oft er athyglisverður, eins og tengd frátt á mbl.is ber með sér. 

En fróðleikurinn getur einn birst á fleiri stöðum og er lítil en afar athyglisverð klausa í grein Jónasar Elíassonar prófessors í fyrradag gott dæmi um það. 

Jónas hefur ritað áhugaverðar og skemmtilegar greinar um umferðarmálin undanfarnar vikur, en svo kemur allt í einu þetta, sem hann ritar um bílismann:

"...einkabílar í dag vega ekki nema þriðja part og eyða ekki nema fjórða parti af því sem var fyrir 50 árum, ef fólk kaupir sparneytinn bíl."  

Ef þetta væri rétt hjá Jónasi, gæti það orðið forsíðufrétt, slík firn eru fullyrt í þessum orðum hans. 

Í þeim felst að meðal einkabíllinn 1970 hafi verið þrisvar sinnum þyngri en einkabíllinn 2020.  Nú er auðvelt að fletta þessu upp í bílfræðiritum og sjá, að meðal bíllinn 2020 er á bilinu 1200-1500 kíló, og er þessi flokkur bíla af meðalstærð oft kallaður Golf-flokkurinn eftir Volkswagen Golf, sem hefur verið framleiddur síðan 1973.  

Í þessum stærðarflokki eru mest seldu bílar Evrópu og Hyundai Kona, sem tengda fréttin fjallar um, er á þessu róli. 

Ekki er hægt að fá léttari Golf en 1200 kíló, eins og sést á mynd úr Auto Katalog 2019, og ekki léttari Toyota Yaris en 1000. 

Samkvæmt fróðleik Jónasar voru sambærilegir bílar 3000- 3600 kíló i kringum 1970. 

En fyrsti Golfinn var hins vegar 750 kíló og bílar almennings langflestir léttari um 1970 en 1000 kíló, og yfir línuna er þungaaukningin á bílaflotanum um 40 prósent síðustu 50 ár. 

Ef sambærilegir bílar nú á tímum væru þrefalt léttari en þeir voru 1970, væru þeir á bilinu 250-350 kíló, álíka þungir og meðal vélhjól!

Það er rétt hjá Jónasi að hluta til þetta með sparneytnina, því að á móti þungaaukningunni hefur tekist að auka hana, miðað við þyngd bílanna. 

En hið hlálega er, að umræðuefnið í grein Jónasar er vandinn vegna vaxandi plássleysis fyrir fjölgandi bíla í umferðinni, og þar skipta þyngd og orkueyðsla bílanna engu máli, heldur fyrirferð þeirra; það pláss sem þeir taka á götunum. 

Og þar hefur þróunin síðustu 50 ár verið sú að bílarnir eru að meðaltali mun breiðari en þeir voru og einnig lengri. 

Golf 2020 er hálfum metra lengri en Golf 1973, og 20 sem breiðari. 

Ef bílarnir sem nú streyma eftir Miklubraut yfir Elliðaárnar, væru hálfum metra styttri hver, myndu samtals 50 kíómetrar af malbiki, sem nú eru þakin bíla, verða auðir.  

 

Rúmlega 100.000 rafdrifnir Hyundai Kona á götum heimsins

Athugasemdir

[Haukur Kristinsson (IP-tala skráð) 25.7.2020 kl. 19:16]

Minn ágæti bekkjarbróðir er í tómu rugli. Veit ekki hvað hefur komið fyrir drenginn. Vona að að hann nái sér fljótt.

[Hallgrímur Hrafn Gíslason, 25.7.2020 kl. 20:51]

Bull er í þér Ómar, Miklabrautin er aðeins 5,7 km, Hálfann solahringinn eru flestir bílanna við heimili eða á bílastæðum fjölbílishusa. Vandamál höfuðborgarsvæðisins er vöntun á 20 mislægum, ljóslausum gatnamótum sem kosta um 30 milljarða,   skiftir sáralitlu máli með 50 cm styttri bíl. Bil milli bíla er haft svipað hvort sem yaris eða landcruser er fyrir framann. Það skiptir meira mali hvort þér er haldið klukkutíma lengur a götunni milli miðbæjar Hafnafjarðar og miðbæjar Rvk, vegna rauðra götuljósa

[Ómar Ragnarsson, 25.7.2020 kl. 21:11]

Það streyma 100 þúsund bílar um Miklubrautina á dag. Hver einasti þessara bíla er staddur á henni í eitt skipti og meðallengd þeirra sjálfra er 4,5 metrar, og þessir 4,5 metrar þekja malbikið undir þeim. 

Ef meðallengdin væri 4 metrar, sem er Yaris lengd, eru það 50 þúsund metrar, eða 50 kílómetrar alls sem myndu sparast. 

[Ásgrímur Hartmannsson, 25.7.2020 kl. 21:40]

Já...

""...einkabílar í dag vega ekki nema þriðja part og eyða ekki nema fjórða parti af því sem var fyrir 50 árum, ef fólk kaupir sparneytinn bíl."  "

Ekki veit ég hvar hann Prófessor Jónas fær þessar "upplýsingar," nema hann haldi að 3 hásinga trukkar hafi verið venjulegir  einkabílar fyrir 50 árum.  Þá myndi þetta stemma. 

"Ef bílarnir sem nú streyma eftir Miklubraut yfir Elliðaárnar, væru hálfum metra styttri hver, myndu samtals 50 kíómetrar af malbiki, sem nú eru þakin bíla, verða auðir.  "

Ef hlutirnir væru öðruvísi, þá væru þeir ekki eins og þeir eru, semsagt?

Í hverju er þessi Jónas prófessor, með leyfi að spyrja?

[Hallgrímur Hrafn Gíslason, 25.7.2020 kl. 22:26]

Nei Ómar það sparast aðeins 50km af skugga, malbilið er það sama 5,7 km, sama hversu langir og margir bílar skrölta um 

[Ómar Ragnarsson, 25.7.2020 kl. 23:57]

Þar sem er skuggi undir bíl, er bíll yfir. Sérkennilegt er að heyra öðru haldið fram.