Hvað um "hvítu kolin" hans Trumps ?

Einn hluti af nýrri umhverfisstefnu Joe Bidens beinist að því að beina bæði fjármagni og hugviti til þess að leita grænna lausna á fjölmörgum sviðum. 

Í heild muni stefnan bæði búa til ný verðmæti í nýju hagkerfi, minnka tjón af mengun og gera starfsemi vistvænni. 

Margt sem er í deiglunni er raunar mjög nýstárlegt svo sem það að breyta koldíoxíði í grjót með niðurdælingu. 

Biden nefndi sem dæmi um ávinning af betri nýtingu orku bætta einangrun húsa, sem Trump greip á lofti í seinni kappræðu þeirra og lýsti afleiðingunum af slíku þannig að hús yrðu gluggalaus.  Litlu munaði að í framhaldinu kæmi samlíking við það þegar Bakkabræður ætluðu sér að bera birtuna í húfum sínum inn í húsin, og mátti reyndar sjá á netinu, að sumir ákafir fylgismenn Trumps tóku þann pól í hæðina.

Á netinu má sjá skondna samantekt á sérvöldum "skrýtnustu" og "vitlausustu" setningunum, sem hann hefði sagt í sjónvarpsútsendingum á forsetaferlinum, og fylgdi með að um svo auðugan garð væri að gresja, að mjög erfitt hefði verið að velja. 

Meðal þeirra fleygustu voru lýsingar hans í upphafi faraldurs í BNA í sjónvarpsútsendingu á þeirri töfralækninga að úða sterkum hreinislög inn í lungu covid-sjúklinga sem steindræpi veiruna.

Svipaðs eðlis voru lýsingar hans á því hvernig svokölluð "hvít kol", alger nýjung, myndu verða alveg mengunarlaus og laus við slæman útblástur. Þetta sýndi vel hve umhverfisvænn kolaiðnaðurinn gæti verið. 

Einna lengst komst hann þó þegar hann fullyrti að góðir flugvellir og flugvélar hefðu verið mikilvægustu vopnin sem Georg Washington og Thomas Jefferson hefðu búið yfir í frelsisstríði Bandaríkjamanna!   

Frelsisstríðið að tarna var reyndar háð á 18. öld, en ástæðulaust að vera með einhverja smámunasemi varðandi slíkt. 

Einn best tókst honum þó upp þegar hann líkti því fjálglega hvernig F-35 orrustuþotur Bandaríkjamanna veittu flughernum yfirburði af því að þær væru svo ósýnilegar, að jafnvel þótt verið væri alveg upp við þær sæu menn þær ekki. 

Þar að auki gæti flugherinn eytt fellibyljum með því að varpa kjarnorkusprengjum inn í miðju þeirra og sprengja þá í spað. 

En kannski voru mestu tilþrifin þegar Trump lýsti bæði með látbragði og hljóðum hve krabbameinsvaldandi hávaðinn í vindmyllum væri. 

Þegar viðstaddir hváðu og báðu um nánari útskýringar gerði Trump sér lítið fyrir og hermdi eftir hinum banvæna hávaða með miklum tilþrifum.  

Kynna byltingarkennda hreinlætisvöru

Athugasemdir

[Guðmundur Örn Ragnarsson (IP-tala skráð) 5.12.2020 kl. 23:54]

 Ómar! Hvernig getur spaug og gálgahúmor Trums farið svo í taugarnar á þér þegar þú sjálfur hefur viðhaft það sama alla ævi. En það sem skiptir öllu máli er allt það góða sem hann hefur komið í framkvæmd á fjórum árum, bæði fyrir Bandaríkin og allan heinminn. Sömuleiðis hefur þú gert okkur lífið hér á Íslandi skemtilegra og betra á þinn hátt. 

[Guðmundur Örn Ragnarsson (IP-tala skráð) 6.12.2020 kl. 00:18]

Þegar þessi orð eru rituð er Trump að stíga í ræðustól á sigurgönguhátíð í Valdosta í Georgiu. 

 

[Ómar Ragnarsson, 6.12.2020 kl. 01:55]

Ég er búinn að horfa á margar klukkustundir af "spaugi og gálgahúmor" þessa manns á kosningafundum hans, blaðamannafundum og fernum kappræðuþáttum í sjónvarpi og komast að því að það sem er svo alvarlegt við mikið af málflutningi hans er að hann virðist svo sannarlega alls ekkert "spaug og gálgahúmor" í hans augum.