Það var fárviðri undan Hafnafjalli og á Kjalarnesi í allan dag.

Allt frá því í morgun og fram á kvöld hafa vindhviður á Kjalarnesi og undan Hafnarfjalli farið reglulega yfir 30 m/sek, allt upp í 37 m/sek, sem jafngildir fárviðri.  

Þetta hlýtur að hafa mátt lesa af mælum vegagerðarinnar sem blasa við öllum vegfarendum við enda þessara tveggja vegarkafla. 

Þegar vindur rýkur skyndilega úr 17 m/sek upp í 37m/sek veldur hann miklu meira álagi heldur en ef vindur er næsta stöðugur. Á háum bílum með stórum lóðréttum fleti, sem slíkur fárviðrisvindur skellur á, veðurofsinn því að bíllinn byrjar að rugga og það eykur enn frekar hættuna á að hann velti. 

En hvernig má þetta vera þegar það er ekkert sérstaklega hvasst í Reykjavík og bara rólegt í austurhluta borgarinnar þar sem siðuhafi var á ferli á litlu rafknúnu léttbifhjóli og lenti ekki í neinum vandræðum, enda mesti vindur í hviðum aðeins þriðjungur af hviðunum á Kjalarnesi og undan Hafnarfjalli og Skarðsheiði?

Ástæðan er einföld og afar mikilvægt að vegfarendur geri sér grein fyrir henni:  Fjallabálkarnir tveir; Hafnarfjall-Skarðsheiði og Esja-Móskarðshnjúkar-Skálafell fá vindinn á sig svipað og þegar hraðfara vatnsflóð eða hafsjór skellur í fárviðri á klettum og björgum; - það myndast mikil iðuköst. 

Í dag mátti með einu símtali við síma 9020600 fá samband við símsvara veðurstofunnar og velja þar á eftir númer 5; flugveðurspá.  

Byrjun hins lesna texta hljóðaði svona í morgun: "vindur og hiti í 5000 feta hæð (1500 metrar) 20 gráður 20-50 hnútar." 

50 hnútar samsvara um 25 metrum á sekúndu, sem er rauð tala ef hún birtist á veðurskilti á jörðu niðri. 

Í vindhviðum við fjöll getur þessi tala stækkað ansi hressilega. Yfir 70 hnútar á Kjalarnesi og undan Hafnarfjalli-Skarðsheiði augljós og fyrirsjáanleg afleiðing.  

Niðurstaðan á Reykjavíkurflugvelli í dag varð því:  Þar var meinleysislegt veður en engin lítil flugvél á lofti. 

 

Einn í bílnum þegar slysið varð