Meira en 20 stiga hitasveifla á Kvískerjum?

Mjög sérstakar aðstæður ollu því að hitinn á Kvískerjum í Öræfum fór upp í 17 stig í morgun.

Á morgun og fram á morgun annars í páskum er búist við því að hitinn Suðausturlandi fari niður í 4 stiga frost, þannig að sveiflan niður á við getur farið yfir 20 stig. 

Í Reykjavík verður sveiflan frá sjö stigum í morgun niður í 9 stiga frost, eða um 16 stig. Það hitafall myndi banka í fallið í frægasta páskahretinu 1963 þegar hitafallið var enn hraðara og hretið stóð lengur; fallið var 16 stig er rétt er munað.  

Meðalhiti í Reykjavík í fyrstu viku apríl er rúmlega tvö stig en hækkar um 0,1 stig á hverjum degi, þannig að um þetta leyti eru fjörbrot vetrarins að hefjast að jafnaði og því tími páskahretanna. 

Hretið mikla 1963 olli bæði msnnskaða og gríðarlegum gróðurskemmdum. 

Á bloggsíðu Trausta Jónssonar er fróðleg umfjöllun um helstu páskahretin síðustu aldirnar. 

Úr 17 stiga hita í fimm stiga frost

Athugasemdir

[El lado positivo (IP-tala skráð) 3.4.2021 kl. 15:20]

 Þetta hlýtur að vera bilaður mælir þarna á Kvískerjum.

[Ómar Ragnarsson, 3.4.2021 kl. 17:23]

Ef hann er það, þá eru hitamælarnir á austanverðu landinu allir bilaðir þegar hnúkaþeyr á sunnan og úr suðvestri ríkir. 

Sjálfur hef ég margsinnis verið uppi í 660 metra hæð á Sauðkárflugvelli í allt að 17 stiga hita á sama tíma og suðvestansuddinn hefur gefið 7 stiga hita í Reykjavík.   

[El lado positivo (IP-tala skráð) 3.4.2021 kl. 20:09]

Þetta er bara þvílíkt "útgildi" að þetta fær vart staðist án vandlegrar mannlegrar yfirferðar. Fjögurra stiga hiti á Fagurhólsmýri en 17 á Kvískerjum með rúmlega 10 kílómetra millibili?

 

[Ómar Ragnarsson, 4.4.2021 kl. 16:49]

Þú talar um "mannlega yfirferð" og ályktar af því að slíka yfirferð skorti að mælingarnar á Kvískerjum sé rangar og þar með kannski falsaðar. 

Það vill hins vegar svo til að ég er meðal þeirra, sem hef einmitt upplifað þetta fyrirbæri á eigin skinni, ekki bara á nokkrum stöðum á landinu, heldur líka einmitt þarna. 

Raunar eru ekki 10 kílómetrar á milli Fagurhólsmýrar og Kvískerja heldur er stysta fjarlægð í loftlínu á milli þessara staða 15 kílómetrar.  

Sem dæmi má nefna fyrrnefndan Sauðárflugvöll og mælistöðina þar og aðra mælistöð í 25 kílómetra fjarlægð við Eyjabakka. 

Á mælistöðinni við Eyjabakka rauk hitinn einu sinni upp um tíu gráður og féll síðan aftur niður á innan við klukkustund í snarpri hnjúkaþeysbylgju, og var á stuttu tímabili tíu gráðum hærri en við Sauðárflugvöll. 

Þegar hafgolan kemur inn Eyjafjörðinn og berst suður í Eyjafjarðardal getur orðið tíu stiga hitamunur á milli tveggja staða sem eru aðeins tíu kílómetra frá hvor öðrum. 

Nú nýlega rauk hitinn á Seyðisfirði upp í 20 stig í suðvestan hnjúkaþey það var drjúg "mannleg yfirferð" sem gat vitnað un það. 

Upplýsingarnar hér á síðunni eru byggðar á gögnum og skrifum þess íslensks veðurfræðings sem er einna fróðastur um veðurfar og veðurmælingar og hefur það meira að segja sem aðalstarf á Veðurstofu Íslands. 

Landslagið í Öræfasveit er einfaldlega þannig að stærsta og hæsta eldfjall Íslands skiptir sveitinni í tvennt og veldur því að bæði í Skaftafelli og á Kvískerjum getur verið allt annar hiti og veðurlag en á Fagurhólsmýri. 

Á Mýrinni getur einfaldlega vestlægur strengur gefið hinn lága hita á meðan sama vindátt fer upp í 2000 metra hæð yfir Öræfajökli og þornar hratt og hitnar á leiðinni niður að Kvískerjum.  

Um þetta fyrirbrigði, "föhn" vind á erlendu máli gilsa fullgilt eðlisfræðilögmál sem hafa verið reynd í þúsundum skipta víða um lönd án þess að menn hafi lagst í einhvers konar Trump-leiðangur með ásökunum um falsaðar eða rangar nælingar. 

En við lifum á dálítið sérstökum tímum með undarlegu afturhvarfi frá vísindahugsun síðari tíma.