"Að fara að vera - eða ekki fara að vera..."?

Tilhneiging, sem kalla má nafnháttarsýki, ryður sér hratt til rúms í íslensku máli. 

Fyrirsögnin á viðtengdri frétt er dæmi um þetta. Í staðinn fyrir að segja einfaldlega: 

"Við náum ekki í fólkið"

er sagt: 

"Við erum ekki að fara að ná í fólkið." 

Þrettán atkvæði í stað átta. 

Einn íþróttafréttamaður lýsti atviki svona: 

"Hann var ekki að fara að verja þennan bolta"

í stað þess að segja: 

"Hann gat ekki varið þetta skot." 

Þessi breyting málsins felur í sér lengri og klúðurslegri setningar en annars þyrfti. 

Og jafnvel er nafnháttur notaður margsinnis í röð, og gæti því frægasta setning leikbókmenntanna senn orðið svona: 

"Að fara að vera eða fara að vera ekki - það er málið" 

í stað þess að segja: 

"Að vera eða vera ekki - það er málið." 

„Við erum ekki að fara að ná í fólkið“

Athugasemdir

[Húsari. (IP-tala skráð) 22.6.2021 kl. 08:05]

Ég held að Ómar sé eini rýnir málsins
sem nokkurt mark hefur verið tekið á
þessi síðustu ár.

Hann er afdráttarlaus í málflutningi sínum og skýringum;
þær jafnan hnitmiðaðar og auðskiljanlegar.

Algerlega laus við háð í athugasemdum sínum en stutt
í þessa ísmeygilegu glettni!

Hann nær til fólks, - og það er gæfumunurinn!