Jónas og Einstein; svipuð ummæli með aldar millibili. 0:0 eða 1:1 ?

Eftir að hinn íslenski höfuðsnillingur Jónas Hallgrímsson hafði verið í vísindaferð við fjallið Skjaldbreið orkaði þessi návist við fjallið svo mjög á skáldið, að hann orti innblásið snilldarljóð um fjallið og undur þess. 

Undir lok ljóðsins kemur þessi ljóðlína um tilurð það sem "hrauna veitir bárum bláum":

 

"Gat ei nema guð og eldur 

gjört svo dýrðlegt furðuverk." 

 

Sem sagt: spurningin um skapara og sköpun himins og jarðar. 

Nú líða árin og annar höfuðsnillingur, Albert Einstein, lendir öld síðar inni í rökræðum um guðstrú manna, og er inntur eftir því sem fróðasti þalifandi maður um alheiminn, hvort hann trúi á guð. 

Haft var eftir Einstein á þessum árum, að hann hefði áttað sig á því í rannsóknum sínum og uppgötvunum, að hann vissi æ minna eftur því sem þekkingin yrði meiri. 

En svarið um Guð var víst einhvern veginn svona:

"Það sem ég þó veit um alheiminn er, að hann er svo yfirgengilega undursamlegt og mikilfenglegt fyrirbæri, að enginn, nema Guð hefði getað skapað hann." 

Einstein er oftast eignað það, að hafa bryddað fyrstur manna upp á þessu sjónarhorni á Guð og guðdóminn. 

En öld fyrr hafði íslenskur snillingur reyndar orðað svipað. 

Á annar þeirra höfundarrétt á þessum ummælum sínum? 

Jónas vissi ekki um að öld síðar myndi annar snillingur orða hans fleygu hugsun. 

Og Einstein hafði áreiðanlega aldrei lesið eða heyrt ljóðið um Skjaldbreið. 

Svarið um einkarétt á hugsuninni verður því líklega annað hvort 1:1 eða 0:0. 

 

„Hryggilegt“ að sjá svör Ásgeirs og Sverris

Athugasemdir

[Sigurður Antonsson, 11.12.2021 kl. 19:35]

Okkur er áskapað að dáðst að einstakri náttúrsköpun. Óþarfi að hafa áhyggjur af framvindunni. Nýjar kynslóðir koma til að bæta úr því sem á vantar. Það sem þær ráða ekki við er regnmagnið sem kemur af fjöllum og hálendi.

Gæti verið gaman að sjá grenitré í gígnum á Skjaldbreið vaxa þar meðan vatnsskortur kemur ekki í veg fyrir vöxt þeirra. Óvirkir eldgígar í fjallshlíðum EL Teide á Tenerife eru með trjágróðri. Hæsta fjall Spánar, næstum 3800 m. Þrátt fyrir lítinn raka dafna þar grenitré og gleðja margan göngumanninn, mitt í svartri og rauðri eldfjallaösku, innan um eðlur og harðgerðan gróður.

Grenitré voru ekki vel séð í nágreni við Almannagjá í lok síðustu aldar og voru söguð niður í skjóli nætur af misvitrum. Velmeinandi embættismönnum. Friðun landsvæða er ekki galdur og á ekki að vera fyrir fáa útvalda.

[Ómar Ragnarsson, 12.12.2021 kl. 04:10]

Erlendir sjónvarpsmenn sem ég hef flogið með yfir Þingvallavatn undrast að sjá barrskóginn sem gróðursettur hefur verið í gígnum í Sandey og er þar eins og skrattinn úr sauðarleggnum í æpandi mótsögn við ósnortna íslenska náttúru. 

[Húsari. (IP-tala skráð) 13.12.2021 kl. 00:26]

Sæll Ómar.

Mér er næst að halda að það viðhorf
er fram kemur í orðum Einstein hafi
verið uppi öldum saman og ekkert
jafn fjarri mönnum en eihver eignarréttur
í því sambandi.

Orðið eign er sennilega einhver mesta fjarstæða sem
nokkur möguleiki var að grípa til í þessu sambandi
og alveg áreiðanlega jafnfjarri þeim Jónasi og Einstein.

Guðleg fegurð andartaksins verður ekki metin til fjár eða eignar.

Eign hvernig sem á er litið er í besta falli að láni
en oftast ímyndun hrein. Því er það svo að vasar eru engir á líkklæðum.