ÞEGIÐU, BJARNI, ÞETTA ERU STELPURNAR!

Fyrir tæpum 40 árum var kallað upp í laginu um Jóa útherja: "KR-ingar, þið eigið leikinn!" Og strax var svarað: "Þegiðu, Egill, - þetta er landsliðið!" Egill þessi var rakari, hélt mikið með KR og var hávær í stúkunni. Bjarni Fel er sennilega þekktasti KR-ingurinn og þessa dagana gæti verið kallað: "KR-ingar, þið eigið leikinn!" Og strax yrði svarað: "Þegiðu, Bjarni, - þetta eru stelpurnar!" Og í kvöld hefði verið hægt að kalla upp eitthvað svipað á Laugardalsvellinum. Þetta voru stelpurnar og þær voru æðislegar.

Hugsa sér muninn að horfa upp á sömu markatölu, 5:0, og í síðasta karlalandsleik, bara öfugu megin!

Þetta er sérstaklega glæsilegt og ánægjulegt sem og metaðsókn að leiknum.

Ég uppgötvaði persónulega kvennaknattspyrnuna á eftirminnilegan hátt. Ég og bræður mínir stunduðum svonefndan fjölskyldufótbolta í Fram-heimilinu á laugardagsmorgnum og systkinabörnin tóku þátt með fullorðnu körlunum.

Ég var á tímabili lengi frá fótboltanum vegna tognunar í læri en kom síðan aftur til leiks. Þá vildi svo til, að eitt sinn er ég sótti að marki andstæðinganna, náði hún Magga, systurdóttir mín, boltanum af mér.

Og ekki bara það, stelpuskömmin lék laglega á mig og brunaði upp með boltann. Mér brá og hugsaði mér að láta krakkann ekki komast upp með þetta. En hún var furðu fljót og ég varð að teygja mig svo mikið á eftir henni að ég tognaði aftur í lærinu, féll við og stelpuskjátan skoraði.

Þetta var gríðarlegt áfall. Hafði mér förlast svona mikið? Hvað var eiginlega að gerast? 

Eftir sex vikna hlé kom ég aftur til leiks. En á því tímabili hafði komið í ljós að það var ekki bara að ég hefðí kannski ekki verið alveg eins frískur og fyrr, heldur var hún Magga byrjuð að blómstra í kvennaknattspyrnu með Breiðabliki þar sem hennar beið mikill frami, landsliðssæti og að vera valin efnilegasta knattspyrnukona landsins.

Já, Margrét Ólafsdóttir, frænka mín, kenndi mér góða lexíu og alltaf þegar stelpurnar brillera, gleðst ég yfir gengi þeirra og óska þeim hjartanlega til hamingju.  

Athugasemdir

[Halldór Egill Guðnason, 22.6.2007 kl. 12:02]

Frábært hjá þeim að ná 5 : 0.  Ekki síst eftir 5 : 0 tapið hjá strákunum um daginn. Vonandi að þessi frábæri árangur verði bakkaður upp af ögn meiri myndarskap en verið hefur gagnvart kvennaboltanum hingað til. Þær eiga það svo sannarlega skilið.