HVÍLÍKUR MUNUR!

Hef verið á ferðalögum frá Reykjavík um Norður- og Norðausturland og hef ekki getað bloggað. Nýi stórglæsilegi vegarkaflinn í Norðurárdal kennir okkur ýmislegt: 1. Beint fjárhagslegt tjón undanfarin ár af slysunum á gamla kaflanum fer langt með að borga þessa framkvæmd. 2. Svipað má segja um ýmsa aðra kafla á þessari leið.  3. Það er hægt að stytta þessa leið um hátt á þriðja tug kílómetra og ná þannig megninu af þeirri styttingu sem Norðurvegur gæti haft í för með sér auk þess sem breikkun vegarins styttir ferðatímann ein og sér.

4. Af framansögðu má sjá að endurbætur á hringveginum eiga að hafa forgang.

5. Með því að malbika þá kafla Kjalvegar, sem þegar er upphækkaður og gera eldri kaflana líka því sem sjá má við Bolabás norðan við Þingvelli er hægt að liðka fyrir ferðamannaumferð og gefa kost á styttri leið milli Suðurlandsundirlendisins og Norðurlands án þess að raska stórlega náttúrunni milli jökla og ræna svæðið því aðdráttarafli dulúðarinnar sem það hefur enn að miklu leyti og hægt er að líta á sem verðmæti í sjálfu sér.  

Athugasemdir

[Halldór Egill Guðnason, 15.7.2007 kl. 02:07]

Þessi vegarkafli er mikil framför. Nægir að líta yfir á "gamla kaflann". Hugmynd þína um Kjalveg styð ég 100 %. Fór Kjöl í fyrsta skipti síðasta sumar og finnst að allir eigi að eiga möguleika á að fara þá leið. Allt í lagi þó trukkarnir fari lengri leiðina.

[Páll Jóhannesson, 15.7.2007 kl. 11:36]

Mikið er ég sammála þér Ómar. Vegakaflinn í Norðurárdal er langþráður draumur, sem er að verða að veruleika. Og betrum bættur Kjalvegur er enn draumur, sem vonandi á eftir að verða að veruleika innan fárra ára.

[Högni Jóhann Sigurjónsson, 15.7.2007 kl. 14:03]

Ég er sammála ykkur með veginn um Norðurárdal, fór hann um síðustu helgi og eins og þú nefnir Ómar þetta með breiðari vegi og erum við þá ekki að tala um neina metra, skiptir máli í ferðatíma, sparnaði sem sagt ekki alltaf að hægja á og gefa í og ekki síst öryggi og að hvað - 4 einbreiðar brýr, ef ég man rétt hverfa af þjóðvegi 1. Enn ég velti fyrir mér var þörf á að hafa þessa hlykki á honum? Ég tel að þetta taki til baka áðurnefndann sparnað og öryggi.

  Enn ég er ekki sammála ykkur með Kjalveg, ég er alveg svo innilega sammála fréttamanninum sem kom í sjónvarpið mitt fyrir nokkrum árum með tillögu þes efnis að Kjalveg ætti að byggja upp og klæða og ég er á þeirri skoðunn að flutningabílarnir eigi að fara hann af því er mikill sparnaður t.d. í olíubrennslu og þar með megun ofl.ofl.

[Fannar frá Rifi, 16.7.2007 kl. 15:13]

Endurbætur og styttingar á núverandi vegastæði gagnast líka miklu fleyrum heldur en bara þeim sem búa á Akureyri eins og kjalvegur myndi gera. Skagafjörður, Vesturland og Vestfjörðum græða á endurbótum á núverandi veg. kjalvegur yrði einkavegur eyfirðinga.

[Högni Jóhann Sigurjónsson, 17.7.2007 kl. 23:53]

Fannar þú mannst hvar Kjalvegur kemur í byggð á norðurlandi er það ekki?

Austur Húnvetningar, Skagfirðingar,Eyfirðingar og Þingeyingar hefðu gagn af Kjalvegi svo og Sunnlendingar.

Þar sem umræðan er um að Kjalvegur yrði unninn í einkaframkvænd Fannar þá get ég ekki séð annað en að vegabætur verði á Vesturlandi og þó svo að hann yrði það ekki þá ætti það ekki að koma niður á vegabótum á Vesturlandi, fyrir utan það að álag á vegum Vesturlands mun minnka þegar Kjalvegur verður til.