Hinn "gríðarlegi ferðamannastraumur við Kárahnjúka".

Á sínum tíma sýndi Landsvirkjun glæsimyndir sem áttu að sýna mikinn ferðamannafjölda við Kárahnjúka eftir að virkjað yrði. Virkjunin yrði forsenda þess og sýndir voru fjallaklifrarar utan í stíflunni og fólk sem þaut um lónið á seglbrettum og bátum og tjaldaði og var við leiki og útveru. 

Í sumar hafa borist fréttir í fjölmiðlum, sem hafa átt að sanna hve mikið aðdráttarafl þessa svæðis ykist við virkjun. Virkjanasinnar hafa hent þetta á lofti í skrifum sínum.

Nú hef ég verið þar í alls níu daga í fjórum ferðum í sumar og aldrei séð ferðamenn á ferli nema þrjá bíla í fyrradag og tvo ferðamenn 12. júní. Samt hefur verið þarna 15-20 stiga hiti, sól og blíða dögum saman. Ég hef gengið, ekið og flogið yfir vegi og slóða sem eru á annað hundrað kílómetra og síðustu tíu árin aldrei séð jafn fáa á ferli. 

Nú kann að vera góður ferðamannastraumur sé í byggð austur í Fljótsdal að Hengifossi, Skriðuklaustri, Végarði og stöðvarhúsi virkjunarinnar. En þaðan eru meira en 50 kíómetrarar að stíflunum við Kárahnjúka og Hálslóni, sem er heldur ókræsilegt um þessar mundir, með splunkunýjar tuga kílómetra sandleirur og rofabörð af mannavöldum.

Í sumar hefur verið eindæma stilliviðrasamt og ekki hreyft vind svo neinu nemi í þurru veðri. Ekki hefur því fengist reynsla varðandi sandstorma. Þegar ég var á sandleirunum við Töfrafoss kom smá golukaldi sem nægði til að gefa mér færi á að kvikmynda sýnishorn af því hvað hinn þurri sandur þurfti lítið til að fjúka.

Glansmynd Landsvirkjunar og virkjanasinna af örtröð ferðamanna á Kárahnjúkasvæðinu er enn bara glansmynd. Fréttir af gríðarlegum ferðamannastraumi þar upp frá byggjast á misskilningi og kannski líka af því, að vegna þess hve fá vitni eru af fámenninu þar er hægt að segja sögur af örtröð án þess að eiga á hættu að þær séu leiðréttar.  

Athugasemdir

[Úrsúla Jünemann, 11.7.2008 kl. 23:05]

Takk Ómar að leiðrétta þetta. Aldrei hafði ég trú á að ferðamenn sem koma til Íslands höfðu mikinn áhuga af manngerðum hlutum. þetta er jú hægt að skoða í flestum löndum annarstaðar. Það sem dregur fólkið hingað er okkar frábæra náttúra sem við erum svo léttlindir að skemma fyrir slikk.

[Þorsteinn Briem, 12.7.2008 kl. 00:00]

Landsvirkjun:

"Fólk er eindregið hvatt til að virða reglur um umferð og öryggi. Þetta er enn framkvæmdasvæði og ferðalag um það er á ábyrgð viðkomandi vegfarenda."

http://www.karahnjukar.is/newsItem.asp?catID=124&ArtId=2019

[B.N. (IP-tala skráð) 12.7.2008 kl. 00:16]

Þegar ég var að keyra Ítalska ferðamenn sem voru hérna á Fagra Íslandi í 12 daga tjaldferð árið 2001 að þá var tekin ákvörðun vegna áhuga allra í hópnum að taka  krók á leið okkar þegar við vorum við Öskju eftir næturdvöl við Drekagil  að setja stefnuna á Kárahnjúkasvæðið. Við keyrðum eftir torsóttum slóða man ég þar til við komum að gatnamótum eða þannig þar voru 3 blá skilti sem voru merkt Hafrahvammagljúfur,Gæsavatnaleið og Askja. Á þessum slóðamótum var stoppað og tekið hádegishlé til að fá sér í gogginn og njóta kyrrðarinar. Það varð að vera algjör þögn eftir matinn. Það var skrítið að upplifa þetta að sjá fólkið njóta þess að heyra í engu sem tilheyrði manninum. Þegar komið var loks að Hafrahvammagljúfri fóru allir út á ystu nöf og léttu taka myndir af sér með svæðið sem nú er komið í kaf sem dæmi vera í bakgrunninn. Ég verð að viðurkenna það að ég var mikið lofthræddur við það að sjá nokkra af farþegunum fara full langt út á brúnina til að taka myndir af sér og náttúrunni sem þá var hluti af hinni einu sönnu Íslenskri náttúru fegurð með réttu tónnunum.

Baldvin Nielsen,Reykjanesbæ

[365, 12.7.2008 kl. 00:25]

Af hverju ertu svona sorry, svektur og sár Ómar?

[Sólveig Klara Káradóttir, 12.7.2008 kl. 00:33]

Það er örugglega alveg rétt hjá þér Ómar, að virkjunin og allt það sem henni fylgir skapar miklu meiri vandamál en marga grunaði.

Mér finnst það frábært hjá þér að fylgja þessum málum svona vel eftir, þú ert sannur í því sem þú tekur þér fyrir hendur.

Takk fyrir að bera Íslenska náttúru fyrir brjósti og gera þitt til að koma skoðunum þínum á framfæri. 

[Haraldur Bjarnason, 12.7.2008 kl. 00:47]

Ómar, nú er komin sú mynd á þetta að Kárahnjúkavirkun sé Fljótsdalsstöð og ekki nema hluti ferðamanna fer alla leið upp að Hálslóni og stíflunni. Vestan eða suðvestanátt eftir þurrviðri eins og oft er þarna á eftir að sýna miklar og stórar fjörur og í raun sýnir þetta ekki neitt eftir að sandstrókurinn þyrlast upp. Þetta leggst allt yfir Fljótsdalshérað, en Baldivn ég held að þetta sé smá misskilningur hjá þér. Hafrahvammagljúfrin eru ekki horfin. - Þau eru ennþá þarna og gott að fara fram á gljúfrin neðan stíflunnar.

[Ólafur B. Jónsson (IP-tala skráð) 12.7.2008 kl. 01:56]

Þú ættir að vita það ÓMAR að nær öll íslenska þjóðin dáir þig, en ertu ekki að ganga of langt í náttúruvernd þinni? Þessi náttúruvernd þín, er hún ekki eins og önnur einstaklings bundin náttúruvernd, bara þín ósk um að það sem þú sérð á þínu flugi, sé eins og í gamla daga?. Fyrirgefðu Ómar, bara gangtu ekki of langt. 

[B.N. (IP-tala skráð) 12.7.2008 kl. 01:57]

Mikið rétt Haraldur Hafrahvammagljúfur eru þarna en fyrir neðan stíflu. Ég var í þessari örstuttu frásögn að reyna að horfa yfir skynsviðið í hljóði og mynd sem eina heild án fingrafara mannsins á verkinu og segja frá hvernig ég og ferðamennirnir upplifðum þessa ferð sem var sú fyrsta okkar allra inn á þetta svæði.

Baldvin Nielsen,Reykjanesbæ     

[Gunnar Th. Gunnarsson, 12.7.2008 kl. 02:22]

Eru allir haldnir "Vistkvíða" hér?

[Landfari, 12.7.2008 kl. 09:30]

Já það verður frólegt að sjá hvernig baráttan við fokið kemur til með að fara. Mér finnst þa nú ekki lýsa neinum stuðningi við framkvæmdina að fara þarna uppeftir að skoða svæðið eftir breytingarnar.

Ekki voru þeir sem fóru í skoðurnarferðir út í Vestmannaeygar eftir gos á sínum tíma að sýna neinn stuðning við eldgos. Þeir voru bara að skoða fyrir forvitni sakir. Ég ætla að vona að ég eigi eftir að fara þarna uppeftir aftur og sjá breytingarnar. Það má enginn túlka þá ferð sem einhvern stuðning við þessa framkvæmd, jafnvel þó mitt eigið fyrirtæki hafi staðið fyrir henni, en Landsvirkjun er jú eign okkar allra, ennþá allavega.

Þegar einar dyr lokast opnast aðrar. Mér skilst að nú sé möguleiki á að labba ofan í gljúfrinu sem var náttúrulega engin leið áður. Gæti vel trúað að það gæti verið magnað að labba eftir árbotninum fyrrverandi með þessa hamraveggi á báðar hliðar.

[Sveinbjörn V. Jóhannsson (IP-tala skráð) 12.7.2008 kl. 10:22]

Almenningi er ennþá bannað að sigla á lóninu Ómar. Skil ekki afhverju þú heldur að þú megir vaða yfir alla! Sigla á lóninu og vera með bíl á friðuðu landi Kringilsárrana. Gera þriggja brauta einkaflugvelli hér og þar ofl.   Ég sé þig ekki sem talsmann ósnortinar náttúru þegar þú hagar þér svona.. Ég ætla samt ekki að taka það af þér að sumt gerir þú vel!!  Það er búið að vera heppilegt veðurfar þarna uppi það sem af er sumri. Við verðum að gefa landsvirkjun séns með þetta sumar í sambandi við uppfok, lónið kemur vonandi til með að fyllast fyrr þegar Hraunaveita verður komin inn.. 

Bakkarnir líta ekki vel út. Held að þarna verði aldrei baðstrandar fílingur  

[Ómar Ragnarsson, 12.7.2008 kl. 13:25]

Það er rangt að bannað hafi verið að sigla á lóninu. Bannsvæðið er aðeins rétt við stífluna en fyrir innan er tæplega 24 kílómetra langt lón til frjálsra siglinga. Hvorki ég né þeir tveir aðrir sem ég veit til að hafi siglt á lóninu, hafa "vaðið yfir alla."  

Ég var aldrei með bíl á friðuðu landi, heldur fór þangað á snjó að vetrarlagi án þess að koma nokkurn tíma inn á friðað land.

Nema að þú teljir að þessi staður í lónstæði Hálslóns,sem bíllinn stóð á, hafi verið friðað land, af því að Landsvirkjun var búin að fá það "friðað" fyrir sig til að drekkja því í drullu og láta áður aflétta friðun á þeim hluta Kringilsárrana, sem lenti í lónstæðinu.

Þessi fullyrðing þín, Sveinbjörn, er dæmi um það hvernig öllu er snúið á haus og stærsti einstaki umhverfisspillir Íslandssögunnar er orðinn að að aðila sem "friðar" land en einstaklingur, sem engu rótaði við á hinu drekkta svæði er orðinn að manni, sem kærður var fyrir spjöll sem í sjónvarpsfréttum var sagt að gæti varðað allt að tveggja ára fangelsi.

Eftir rúmlega klukkustundar yfirheyrslu yfir mér hjá rannsóknarlögreglunni eystra og ellefu blaðsíðna skýrslugerð mína með sex myndum til handa Umhverfisstofnun lauk þessu máli með því að ég fékk, hálfu ári síðar, bréf frá sýslumanni þar sem mér var greint frá því að um þessa kæru yrði ekki frekar fjallað vegna þess að ekkert refsivert athæfi hefði fundist.

Fjölmiðlar höfðu að sjálfsögðu engan áhuga á að fylgja þessu máli eftir og greina frá málalyktum, - það "selur" miklu betur að viðhalda upphaflega meintu afbroti og hneyksli.

En sumir vilja greinilega halda þessu máli áfram og mér kæmi ekki á óvart, miðað við það sem á undan er gengið, að menn sakfelli þá um síðir hina látnu heiðursmenn Agnar Koefoed Hansen og Berg Gíslason fyrir að hafa fundið og lent á frábæru náttúrugerðu flugvallarstæði fyrir suðvestan Kárahnjúka fyrir 69 árum.

[Guðjón Sigþór Jensson, 12.7.2008 kl. 14:17]

Nú herma síðustu fréttir að þeir Landsvirkjunarmenn séu komnir af stað með Landgræðslunni töluverðan tækjabúnað til að binda jökulleirinn sem er mjög fíngerður og að sama skapi mjög fokgjarn. Þarna er komið að n.k. syndakvittun þeirra hjá Landsvirkjun að reyna að bæta fyrir. En er þetta ekki svipað því að skvetta vatnsfötu á skógareld? Við þessu vöruðu ýmsir, þ. á m. Guðmundur Páll Ólafsson sem líkti þessu við eyðimerkurgerð af hálfu Landsvirkjunar.

Ljóst er að þessi vinnubrögð minna á Kleppsvinnuna sem fræg var á síðustu öld og þótti ekki beint til fyrirmyndar og síst þeim til framdráttar sem höfðu fólk að fíflum. En nú er upprunnin önnur kynslóð þeirra sem vilja hafa þjóðina að fíflum og hafa því miður komist ansi langt í því.

Óskandi er að þessi Kárahnjúkavirkjun verði ævarandi áminning um að nauðsyn ber að taka athugasemdir náttúrufræðinga alvarlega. Þarna var gríðarlega fagurt land sem nú er að breytast smásaman í gríðarlega eyðimörk hvað sem áformum um þjóðgarð allt í kringum Vatnajökul áhrærir.

En við verðum að hafa í huga að stóriðjan hefur stórnvöld meira og minna í vasanum og eru margir tilbúnir að verja stóriðjuna í von um nokkrar vesælar álkrónur! 

Bestu kveðjur og þakkir!

Mosi