Ótrúlegur skaði skeður.

Ég var á ferðalagi um New Jersey í gær en þegar komið var í hús þeirra sem áttu von á mér var mér sagt frá þeirri ótrúlegu frétt sem væri hér vestra á sjónvarpsstöðum að Íslendingar hefðu lýst því yfir að þeir hyggðust ekki borga skuldir sínar erlendis. Loksins komst Ísland í fréttirnar! 

Það þarf talsvert til að örþjóð eins og Íslendinga komist í helstu sjónvarpsfréttir hér en það þótti auðvitað stórmerkileg frétt að þjóð, sem teldi sig í hópi siðmenntaðra þjóða og meðal þeirra ríkustu í heimi gæfi fáheyrðar yfirlýsingar sem jafnvel vanþróuðustu þjóðir gerðu sig ekki sekar um.

Í dag hefur engu máli skipt þótt maður reyni að bera þetta til baka. Það er ekki frétt að þjóð ætli sér að standa í skilum á siðlegan hátt og sú frétt mun aldrei birtast hér. Maður er spurður hvort Íslendingar séu gengnir af göflunum, og þegar reynt er að banda þessu frá sem misskilningi fylgir á eftir spurningin um það hvort það séu þá íslenskir ráðamenn sem séu fífl eða gangsterer nema hvort tveggja sé. 

Spurt er hvort fyrrum forsætisráðherra og núverandi seðlabankastjóri viti ekki að út um allan heim er hægt að fylgjast með ummælum hans í Kastljósi beint á netinu og fá þau þýdd umsvifalaust og hvort fjármálaráðherra og forsætisráðherra hafi ekki hugmynd um hvað þeir séu að segja. 

Fréttin á erlendum sjónvarpsstöðvum hefur þegar valdið ómældu tjóni á orðstír, ímynd og heiðri íslensku þjóðarinnar. Þótt allir Íslendingar sem staddir eru í Bandríkjunum þytu út á göturnar og hrópuðu að hverjum sem væri að Íslendingar ætluðu sér að haga sér eins og siðmenntað fólk þá væri það gagnslaust, þetta tjón verður seint bætt.

Og ef endilega þarf að setja peningalegan mælikvarða á allt nú sem fyrr, þá getur þetta tjón á "good-will" verið ótrúlega mikið í beinhörðum peningum.  

Lokaspurning útlendinga er, að fyrst þetta hafi verið grundvallað á mistökum íslenskrar ráðamanna, hljóti þetta að verða til þess að þeir verðir látnir taka pokann sinn. Þegar maður verður að viðurkenna að það verði ekki gert, hrista erlendir viðmælendur höfuðið og hafa endanlega sannfærst um það hvers konar þjóð lifi uppi á útskerinu þarna nyrst í Atlantshafinu.  

Samtal við Árna réð úrslitum

Athugasemdir

[Ísdrottningin, 9.10.2008 kl. 18:24]

Maður á einfaldlega ekki til orð.

[A.L.F, 9.10.2008 kl. 19:30]

Ég get en ekki orðabundis yfir þeim áföllum sem ríða yfir þjóðina á hverjum degi, þetta virðist engan enda ætla að taka.

[Ari (IP-tala skráð) 10.10.2008 kl. 02:59]

Hverjir eru "Íslendingar"? Þú hlýtur að meina íslenska ríkið?   Ríkið getur ekki tekið ábyrgð á gríðarlegum skuldum einkabanka sem eru með margfaltstærri umsvif en allt Ísland. Það bara er ekki mögulegt.  Þetta var aldrei skuld "Íslendinga" ekki nema þeirra fáu sauða og rotinna epla sem eru fjárglæfrabankamennirnir. Það er hvorki almenningur ("Íslendingar") né Ríkið("Íslendingar") enda stendur skuldastaða ríkisins mjög vel.