Þurfa að losa sig við...

Framsóknarflokkurinn hefur alla sína tíð róið á miðju hægri-vinstri litrófsins og því átt að vera með mikið fylgi. Því miður hefur hann alla tíð hengt sig á málefni óréttlætis og spillingar sem hafa fælt frá.

Lengi vel var það hrópandi óréttlæti kjördæmaskipunarinnar sem flokkurinn barðist fyrir og smám saman einnig sjálftökustjórmál SÍS-veldisins í helmingaskiptum við Sjálfstæðisflokkinn.

Núna er þrennt sem gerir flokkinn óaðlaðandi.

1. Sjálftökustjórnmálaspillingin sem kristallaðist í einkavinavæðingu bankanna.

2. Stefna náttúruspjalla og stóriðju, alger andstæða stefnu Eysteins Jónssonar, forystumanns flokksins um miðbik síðustu aldar.

3. Frumkvæði og fylgispekt við verstu galla kvótakerfisins.

Ef unga fólkið í flokknum gerir ekki upp við þetta þrennt sé ég enga framtíð fyrir Framsóknarflokkinn. Hann rær á svipuð miðjumið 80% kjósenda og Samfylkingin, Frjálslyndir og Íslandshreyfiingin, auk þess stóra hluta sjálfstæðismanna sem vilja hóflegt fjálsræði og samfélagskennd í verki. Framsóknarflokkurinn hefur klemmst á milli og verður að rífa sig lausan frá þeim steinrunnu afturhalds- og sérgróðaöflum sem hafa ráðið flokknum síðari ár.

Hiti á fundi framsóknarmanna

Athugasemdir

[Ástþór Magnússon Wium, 7.1.2009 kl. 00:13]

Ekkert breytist í spilltasta greni landsins 

Framsóknarspilling í kjallaranum er uppfærsla á gömlu leikriti sem var endurflutt í kvöld í Þjóðleikhúsinu, í dimmum kjallaranum. Enda þolir það sem þarna er að gerast ekki dagsins ljós. Nú eru flokkseigendafélag Finns Ingólfssonar & Co búið að finna… Meira

[Salvör Kristjana Gissurardóttir, 7.1.2009 kl. 00:56]

Það væri nú ekkert verra að fá þig í Framsóknarflokkinn Ómar:-)

Það er mikið að gerast þar og ég hugsa að þínar hugmyndir hafi miklu meiri hljómgrunn núna en fyrir nokkrum misserum. 

[Offari, 7.1.2009 kl. 01:03]

Framsókn þarf að skilja við fortíðina og hefja nýja sókn.  Nú er tækifæri til breytinga.

[Sigurður Þórðarson, 7.1.2009 kl. 02:20]

Rétt greining.  Af einhverjum ástæðum hefur Framsóknarflokkurinn ekki viljað gera upp við spillinguna og því mæti ætla að þau kunni best við sig í dauninum

[Bjorn Jonasson (IP-tala skráð) 7.1.2009 kl. 09:20]

Taka raunverulega til - Losa sig við gamla framsóknarþingmannahópinn og þá sem ungir eru og falla engu að síður undir sömu fortíðarfötlun.

Sverja af sér opinberlega flokkseigendafélagið, nafngreina það og vísa því úr flokknum.

Gera upp við fortíðina, kvótakerfið o.s.frv.

Ef þeir gera þetta, og þá skal ég kjósa Nýja Framsókn.