Skilvirkur bílaþvottur.

Þegar ég var að þvo bílinn minn síðast rifjaðist það upp fyrir mér að áratugum saman þvoði ég eftir rangri aðferð.
Byrjaði efst og þokaði mér síðan niður.

Eftir á að hyggja er ég hissa á því hve lengi ég gerði þetta svona því að bæði leiðir þessi aðferð til þess að maður er lengur að þvo og þar að auki meiri hætta á að það verði "helgidagar" í þvottinum.

Loks uppgötvaði ég það fyrir ca 20 árum að langfljótlegast og best er að byrja neðst á bílnum og færa sig upp eftir.

Ástæðan er sú að þegar byrjað er ofan frá rennur vatnið niður eftir bílnum og ekki er lengur hægt að sjá vel hve langt kústurinn fór í síðustu stroku. Annað hvort fer maður of oft yfir sama svæðið eða að maður skilur rönd eftir óþvegna.

Ef byrjað er neðan frá sést alltaf farið eftir hverja stroku og þvotturinn verður markvissari og fljótari.

Og nú vaknar spurningin: Hvers vegna í ósköpunum að vera að fjalla um þetta á bloggsíðu?

Jú, það er vegna þess að þegar ég uppgötvaði þessi sannindi fyrir 20 árum gerðist það þannig að ég kom á bílaplan þar sem var mikil biðröð eftir plássi og sá þá að sumir bílaeigendurnir voru eilífðar tíma að þvo.

Allir þessir silakeppir byrjuðu efst og héldu niður eftir. Sem sagt: Ótrúlega margir, þeirra á meðal ég, höfðu ekki uppgötvað bestu aðferðina í jafn einföldu verki.

Athugasemdir

[Lára Hanna Einarsdóttir, 7.2.2009 kl. 01:16]

Ég hef ekki tölu á því hve oft ég hef þvegið bíla. Og alltaf byrjað efst. Og oftast fengið helgidaga þrátt fyrir góðan vilja og mikla vandvirkni.

Þetta er uppljómun og þegar þú segir það - augljóst. Ég byrja neðan frá næst. Takk... 

[Sigurður Haukur Gíslason, 7.2.2009 kl. 01:46]

Ekki er ég sammála þér, hvorki sem fólksbílaeigandi eða fyrrverandi vörubílstjóri. Ég byrja alltaf efst og er samt fljótastur á þvottaplaninu og engir "helgidagar". Aðferðin er þessi:

Hugsa um bílinn sem hluta en ekki heild.

Byrja á þaki (aftast með strokum alveg yfir þakið því bíllinn hallar yfir leitt fram á þvottaplönum).

Svo afturrúða og skott, afturbretti og niður, afturhurð og niður, framhurð og niður, framrúða og vélarhlíf, frambretti og niður og enda á grilli og svuntu.

Með þessari aðferð þá lekur ekki skítuga vatnið yfir það sem þú ert búinn að þvo.

[Ómar Ragnarsson, 7.2.2009 kl. 01:56]

Skítugasti hluti bílsins er neðst, Sigurður Haukur, og yfirleitt eru óhreinindin efst svo lítil að með því að hafa góðan kraft á vatninu skolast þau alveg af þó þau fari niður eftir bílnum yfir það sem búið var að þvo.

Þú ert með þá kenningu að skíturinn af ofanverðum bílnum setjist á hann neðanverðan. Samkvæmt því á þá skíturinn á neðanverðum bílnum að aukast á meðan þú ert að þvo hann að ofan.

[Sigurður Haukur Gíslason, 7.2.2009 kl. 02:06]

Góður kraftur á vatni fer mjög í taugarnar á mér á þvottplönum. Náunginn við hliðina er með "góðan kraft" og sprautar á nágranna sína. Burstinn er til að þvo, vatnið til að skola.

Allt í lagi þó skíturinn að ofan setjist á neðrihlutann, á hvort sem er eftir að þvo hann.

Skora á þig í "þvottakeppni" hvenær sem er. Er með Carinu 1991 módelið og þú mátt vera með Fiatinn.

[Gísli Reynisson, 7.2.2009 kl. 02:33]

kannast við þetta.  hef nú verð að þrífa rútur og þar er þetta aðeins meira verk.  enn mér var líka bent á að ef þú sápar bíl eða rútu og byrjar efst þá tekuru sápuna af áður enn þú kemst neðst í bílinn.

www.aflafrettir.com

[Henrý Þór (IP-tala skráð) 7.2.2009 kl. 02:42]

Maður á helst ekki að brúka kústinn. Kústurinn fer illa með, sérstaklega áberandi á svörtu lakki. Háþrýstiþvottur er málið. Verst hvað það er dýrt að nota háþrýstiþvott á Íslandi.

Þvottaplön eru líka hrikaleg. Sá eitt sinn mann hamast með þvottakústinn á kerrunni sinni til að ná af henni steypu. Síðan hef ég alltaf grandskoðað þá kústa sem ég hef neyðst til að nota.

[Þorsteinn Briem, 7.2.2009 kl. 12:23]

Verulega vandaður þvottur,
en víða er brotinn pottur,
hér skola af sér skottur,
og skafa að neðan mottur.

[Ökumaður (IP-tala skráð) 7.2.2009 kl. 22:51]

Ætla ekki að hætta mér út í trúarbragðadeilur eins og þá hvort betra er að byrja efst eða neðst á bílum. En mig langar til að prjóna svolítið við það, sem Henrý Þór getur um varðandi kústaþvott. Eftir að farið var að nota lökk sem eru leyst upp í vatni, er yfirleitt lokaumferðin glært lakk til að ná glanshúð. Þessi húð er afskaplega viðkvæm og flestir bílaframleiðendur taka mönnum vara fyrir því í leiðbeiningapésum, sem fylgja öllum bílum, að nota kúst við þvott. Þeir mæla yfirleitt með svampþvotti og góðri bílasápu. Tjörudrullan hér er náttúrulega  sérstakt viðfangsefni. Ég sprauta oftast á bílinn fyrst til að ná grófustu óhreinindunum, úða hann svo með tjöruhreinsi, þegar þess þarf, og síðan þvæ ég hann með háþrýstiþvottatæki. Eftir þetta fer ég yfir hann með svampi og bílashampoo. Svo kemur náttúrulega bónið þegar hann hefur þornað vel, en það er sérstakt viðfangsefni. - Nú freistar mín að bæta því við, að ef við erum að hreinsa tjöru af hjólbörðunum má ALLS EKKI nota tjöruhreinsi fyrir lakk, því nær allar tegundir af slíku innihalda bónefni, sem gera þá ennþá hálli en ella. Þar ber eingöngu að nota sérstakan dekkjahreinsi eða bara hreint White Spirit.

[Heimir H. Karlsson (IP-tala skráð) 8.2.2009 kl. 15:08]

Sæll Ómar.

Fróðlegt og gaman að lesa um hinar ýmsu kenningar varðandi bílaþvott.

Og auðvitað hef ég mína reynslu og kenningu líka.

Hvað skít og drullu varðar, þá er mér mjög svo illa við saltnotkun nútímans. Þetta fer líklega verr með bílana en gömlu malarvegirnir, ef undan eru skildir vestfirskir malarvegir.

Saltslabbið gerir það stórkostlega ógagn að setjast á rúður, sérstaklega framrúður, og ljós bifreiða.

Þrif bifreiða væru eflaust miklu þægilegri og þyrftu ekki að vera eins tíð, ef ekki væri vegna saltnotkunar á götur.

Í stað saltnotkunar, þá mætti haga búnaði og akstri eftir aðstæðum. Það virðist mér vera þáttur sem er á hröðu undanhaldi.

Kveðja,

Heimir H. Karlsson.

[Brjánn Guðjónsson, 8.2.2009 kl. 15:50]

best að koma með þriðju leiðina í umræðuna.

sleppa því að þvo skrjóðinn.

[Kristbjörn Árnason, 8.2.2009 kl. 16:38]

En ef sú staða hefði verið uppi, að Ólafur hafi vitað að því, að Samfylkingin ætlaði sér að slíta þessu ríkisstjórnarsamstarfi. 

• Átti þá Ólafur að mati Geirs að láta hann vita? 
• Þetta eru bara ótrúlegar vangaveltur.
• Geir leyfir sér að vitna í einka samtöl sem eiga
  vændanlega að vera bundin trúnaði. 

Það er kominn tími á það að sjálfstæðismenn hætti þessu væli og snúi sér að sínum skyldum.