Manny Pacquiao á móti Ricky Hatton.

Klukkan þrjú í nótt verður rosa bardagi á Stöð 2 Sport. Það verða engiar bardagar á undan, heldur farið beint í þennan.
Manny Pacquiao, álitinn besti hnefaleikari heims miðað við þyngd (pound for pound), þjóðhetja og frægasti maður á Filippseyjum, berst við Ricky Hatton, álíka dáðan hnefaleikara í Bretlandi.

Bara það að annar hvor þessara manna standi í hringnum hefur verið trygging fyrir æsilegum og hröðum bardaga nær allan þennan áratug.

Þegar þeir nú leiða saman hesta sína ætti því að lofa góðu.

Athugasemdir

[Guðmundur Júlíusson, 2.5.2009 kl. 23:47]

Sæll Ómar, held að Manny muni hafa þetta í nótt, nema að brjálæði íranns blási honum þrek í "hnefa", en í enda dagsins, ég held að filipseyjingurinn hafi þetta eða hvað heldur þú sem sérfræðingurinn?

[Guðmundur St Ragnarsson, 3.5.2009 kl. 04:35]

Þetta var rosalegur bardagi Ómar. Ricky átti ekki séns og var hann þó tilbúinn og búinn að æfa eins og enginn væri morgundagurinn.

Verður ekki F Mayweather jr. að taka upp hanskana að nýju? Manny og Floyd. Það yrði rosalegt.

[Ómar Ragnarsson, 3.5.2009 kl. 05:03]

Ég hafði orð á því þegar þeir gengu í hringinn að andlega séð kæmi Manny betur fyrir og ég hafði líka á orði að þrátt fyrir ævintýralegan sóknarhraða og hörku Hattons væri það honum fjötur um fót að vera ekki nógu hreyfanlegur til hliðanna.

Einnig talaði ég um að mikið ylti á því hvort Pacquiao leyfði Hatton að komast upp með að vera í eftirlætisstöðu sinni, návígi með möguleikum á skrokkhöggum, en hraði Hattons hefur gert honum þetta kleift á ferlinum, til dæmis á móti Mayweather, en þar töldu ýmsir, þeirra á meðal Bubbi, að Joe Cortes dómari hefði þjónað Mayweather með því að vera sífellt að skilja boxarana að þegar Hatton var kominn í óskastöðu sína.

Þetta var ekki beinn spádómur en úr þessu mátti lesa að ég hallaðist frekar að sigri Pacquiao vegna þess að hann er hraðasti boxari veraldar um þessar mundir.

Pacquiao þurfti engan dómara til að halda Hatton frá sér. Fljótlega kom í ljós í fyrstu lotu að hann var svo miklu hraðari en aðrir mótstöðumenn Hattons höfðu verið, þeirra á meðal Mayweather, að hann var fullfær um það sjálfur að afgreiða Hatton á þann hátt sem verður að teljast undraverður.

Manny er enn á uppleið, nokkuð sem erfitt er að sjá fyrir, og þessvegna varð bardaginn í nótt svo einstakur viðburður.