Burt með orðin "hvernig" og "svona"! Þau eru ekki nógu fín.

Orðin "hvernig" og "svona" hef ég lengi haldið að væru góð orð, einföld og skýr. En ég hef víst rangt fyrir mér. Sóknin gegn notkun þessara orða bendir til þess að þau séu ekki nógu fín og beri helst að útrýma þeim.

Í stað þeirra er í tíma og ótíma notuð hin fína og viturlega orðalag: "Með þessum hætti", "með öðrum hætti", "með einum eða öðrum hætti.

Í stað þess að segja til dæmis: "Það er verið að að athuga hvernig hægt sé að gera þetta" er sagt: "Það er verið að athuga með hvaða hætti sé hægt að gera þetta.

" Þarna eru notuð þrjú orð í stað eins, "með hvaða hætti" í stað orðsins "hvernig", en það þykir bara miklu fínna og lýsa visku og yfirvegun þess sem notar þau.

Helst þarf að nota sem allra flest orð til þess að ljóst sé yfir hve gríðarlegum orðaforða og agaðri, þróaðri og flókinni hugsun þeir búa sem geta ekki hugsað sér jafn ómerkilega einföld orð og "hvernig" og "svona".

Orðið "aðferð" er líka alltof einfalt og ófínt að ekki sé nú talað um sögnina "að gera". "Aðferðafræði" skal það heita og "að framkvæma."

 Nú nota menn aðferðafræði um allan fjandann í stað þess einfaldalega að segja frá hvernig gert er.

Ef maður íhugar að gera eitthvað þá er alltof ófínt að segja:

"Ég er athuga hvernig ég get gert þetta".

Guð minn almáttugur, svona plebbamál gengur ekki.

Maður er ekki maður með mönnum nema segja:

"Ég er að athuga með hvaða hætti ég geti fundið þá aðferðafræði sem hægt er að beita tl þess að framkvæma þetta."

Með svona orðalagi er ég orðinn maður með mönnum.  

Helst þarf að nota þrisvar til fjórum sinnum lengri setningar til að segja sama hlutinn til þess að það geti talist nógu fínt svo að orðavalið og orðkynngin lýsi því langar leiðir yfir hve gríðarlega mikilli aðferðafræði með þessum eða hinum hættinum þeir búa yfir sem hafa náð mestu valdi á hinum nýja kannsellístíl.

Athugasemdir

[Hildur Helga Sigurðardóttir, 10.5.2009 kl. 04:24]

Sleppur "þannig" í fíniorðahópinn ?

Annars er uppáhaldshatursorðið mitt sem stendur "lausn" , oftast (mis)notað í fleirtölu:

Allt frá "verkefnalausnum" til "gardínulausna", "múrhúðunarlausna" og "mannauðslausna". 

Er ekki -með einhverjum hætti eða aðferðarfræði-  hægt að leysa þetta, annars ágæta, orð undan þeim þjáningum, sem á það eru lagðar ?

[Kristján (IP-tala skráð) 10.5.2009 kl. 05:34]

Hvað segirðu um nýjasta tískuorðið, forsendubrestur?  "Það hefur orðið forsendubrestur fyrir því ..." Er maður ekki orðinn virkilega gáfaður þegar maður getur haft forsendubrest á takteinum?

[Hlédís, 10.5.2009 kl. 10:35]

þakka pistilinn, Ómar!

Gekkst þú ekki af "ég mundi segja" dauðu, hérna um árið. með setningum af þessu tagi:  ".. ef'ann Mundi bróðir mundi vera við mund'ann segja, að þetta mundi.."   Grín gagnast vel í baráttunni fyrir tærara máli. 

Sammála Kristjáni um forsendubrestina - 

--lausnum hefur líka fjðlgað ört síðustu ár eins og Hildur H. nefnir

[Stefán Benediktsson (IP-tala skráð) 10.5.2009 kl. 11:12]

Mér líður illa þegar orð eins og keppni er notað í fleirtölu, eins þegar orð eru betrumbætt: kostur verður valkostur en varðandi frakkann sem varð næstum úti þá er hann eitt margra dæma um menn sem ekki taka mark á orðum. Manninum hafði verið ráðið frá þessari göngu af mörgum. Í góðri bók Hans W Ahlman "I jöklernes Rike" segir þessi mikilsvirti heimsskautasérfræðingur "suðausturhluti Vatnajökuls er mesta veðravíti á norðurhveli jarðar"

[JK (IP-tala skráð) 10.5.2009 kl. 12:03]

Úr fréttum Rúv: samkvæmt lögreglunni á Vík í Mýrdal er skortur á skyggni á Mýrdalssandi. Af blogginu hjá menntaðri stúlku: „Hjá mér varð skortur á tekjuflæði“

Þetta finnst mér vera stungin tólg!

[Sigurður Þór Guðjónsson, 10.5.2009 kl. 12:31]

Svona orðalag  er upphaflega komið frá opinberum aðilum sem reyna að hljóma virðuleg og hefur síðan smitað yfir til almennings.

[Árni Gunnarsson, 10.5.2009 kl. 12:40]

Þarna ríður þú Ómar á vaðið með uppreisn gegn þessum fjanda íslenskrar tungu sem búinn er að vera fleinn í mínu holdi um langt árabil. Mér er minnisstæð setningin sem ég heyrði Halldór Ásgrímsson þylja þingeimi forðum. "Það er alveg makalaust að heyra háttvirtan þingmann tala með þessum hætti!" 

Og nú er svo komið að ungir menn fara að spyrja elskuna sína að því hvort þau eigi að elskast með þessum eða hinum hætti.

Og eins og þú réttilega segir eru þetta tilburðir í þá veru að sýnast gáfulegur. Mörgum reynist það mikil hættuför.

[Þorsteinn Briem, 10.5.2009 kl. 14:00]

Hann Árni minn Gunnarsson er greinilega með nefið í hvers manns koppi og rekkjuvoðum unga fólksins.

Sennilega tímavörður.

[Þorsteinn Briem, 10.5.2009 kl. 15:28]

Hann með sínum hætti,
í hverjum var þar drætti,
mældi af veikum mætti,
og marga svona kætti.

[Bergur Thorberg, 10.5.2009 kl. 15:41]

Dale Carnegie?

[. (IP-tala skráð) 10.5.2009 kl. 18:00]

Hvernig getur þetta verið svona?

                                                                                       EE elle

[Svanur Gísli Þorkelsson, 10.5.2009 kl. 19:25]

Mig grunar að plebbinn sem innleiddi þetta málfar og gerði það vinsælt sé enginn annar en Davíð Oddsson. Hann segir aldrei hvernig eða svona og ekki heldur "á hvaða hátt", heldur ætíð "með hvaða hætti" og "með þeim hætti". Upp úr 1985, eftir að allt sem Davíð sagði var jórtrað á í fjölmiðlum, (og það færðist í aukana frekar en hitt, eftir því sem árin liðu fram) tóku aðrir minni gusar þetta upp og nú getur enginn talað eða skrifað án þess að hafa þennan "háttinn" á, þ.e. Davíðshátt.

[Hammurabi, 10.5.2009 kl. 19:37]

"Ad Hitlerum" er búið að breytast í bloggheimum í "Ad Davidum", þ.e.a.s. það er bara tímaspursmál hvenær fólk fer að kenna davíð um hitt og þetta, áhugavert.

Áhugvaerð viðbót við þessa umræðu eru þau orð sem notuð eru í umræðunni sem hreinlega eru ekki til, t.d.  sóknaráætlana, áætlunartímabil, útgjaldastig og svona mætti lengi telja. Hér er ég ekki að halda fram að ég, eða aðrir, skilji ekki þessi orð. Það er hinsvegar eðlilegra og skýrara að hafa orðin skorin í tvennt. Hér er að sjálfsögðu ógetið um þau sérfræðiorð sem viðskiptafræðin hefur búið til.

[Hlédís, 10.5.2009 kl. 19:56]

"Það eru ekki allar syndir gvuði að kenna" gildir einnig um Davíð. "Kannselí"-stíllinn er eldri en DO ;)

[Svanur Gísli Þorkelsson, 10.5.2009 kl. 21:55]

Ég man eftir sérstakri umfjöllun um þetta orðfæri Davíðs í íslenskuþætti á Gufunni rétt fyrir aldamótin. Umsjónarmaður kenndi DO um að hafa gert það vinsælt, hverju sem svo einhverjum "kannselí" stíl líður Hlédís.

[Hlédís, 10.5.2009 kl. 23:06]

Það eru alltaf og verða alltaf einhver orð og orðaflækjur í tísku. Verst er þegar fólk heldur að tískufrasarnir séu fínt, "rétt" mál.

Líttu á pistilinn hér efst og 'gúgglaðu' ef þekkir ekki orðið kannselístíll, Svanur.

[EE elle (IP-tala skráð) 11.5.2009 kl. 01:06]

Hvernig gerist svona? 

                                                                                            EE elle

[EE elle (IP-tala skráð) 11.5.2009 kl. 16:19]

Kristján, hvað er að orðinu forsendubrestur?  Nú er ég ekki að fella þig, heldur skil ekki.  Orðið hefur oft verið notað núna vegna okurlána.  Fólki þarf að blæða fyrir skuldir sem voru teknar með vissum forsendum og viðmiðum frá glæpabönkum og líka Seðlabankanum.  Og þau viðmið fuku út í veður og vind í gengisfallinu og óðaverðbólgunni.  

Fölsk verðbólga - almenningur féfléttur af… 

http://www.heimilin.is/varnarthing/index.php?option=com_content&view=article&id=199:gengistryggd-
lan-ologleg&catid=58:frettir

[Stefán Jónsson, 15.5.2009 kl. 10:18]

Úfff, hvað ég er sammála þér, Ómar.
Uppskrúfað stofnanamál getur verið óskaplega þreytandi og langoftast fæ ég á tilfinninguna, að eftir því sem orðskrúðin er meiri, því rýrara sé innihaldið.
"Þeir sem hafa frá mestu að segja nota fæst orð!"