Kötturinn Carl Möller var yndisleg persóna. 1.

Húsdýr geta verið jafn heillandi fyrir fullorðna sem börn. Dætur okkar fundu blindan, nýfæddan kettling, sem mjálmaði í öskutunnu.

Þær fengu að bjarga honum og til heiðurs hljómborðsleikaranum í Sumargleðinni fékk hann nafnið Carl Möller.

Hann varð brátt einn ástsælasti og skemmtilegasti meðlimur okkar stóru fjölskyldu. Hann var mikill persónuleiki.

Ég lék mér mikið við Kalla. Aðal leikurinn fólst í því að fara á bak við dyr eða horn og strjúka höndinni létt eftir gólfinu við dyrnar eða hornið. Kalli beið þá færis, en stökk síðan skyndlega til árásar, réðst á höndina og slóst við hana.

Ég var oft blóðrisa á höndum af þessum sökum en það gerði ekkert til.

Þegar ég kom heim á kvöldin, lagði ég oft bílnum fyrir utan húsið, rúllaði rúðunni lítillega niður svo að lítil rifa opnaðist og lét fingurna leika við þakrennuna þannig að hljóðið í því var líkt og litlir músafætur tifuðu á þakinu.

Það brást sjaldan að væri Kalli í grenndinni, læddist hann aftan að bílnum, stökk síðan skyndilega upp á þakið og réðist á höndina með miklum látum.

Læt þetta nægja að sinni um Kalla en bæti við nokkrum sögum af honum síðar.

Barack finnst gaman að leika sér

Athugasemdir

[Jóna Kolbrún Garðarsdóttir, 22.5.2009 kl. 01:35]

  Allar kisurnar mínar þrjár eru miklir persónuleikar.  Kisur eru frábær gæludýr.

[Þorsteinn Briem, 22.5.2009 kl. 11:07]

Leikskólavísa:

Í krapinu hann er nú karl,
með kisunum herðir sinn jarl,
í sorpinu finnur oft snarl,
og sætur er Möllerinn Carl.

[Finnur Bárðarson, 22.5.2009 kl. 16:36]

Hann nói minn vill bara eltingaleiki enga ullarhnoðra, en hann bítur ekki, bara nartar lauflétt.

[Sigurður Þorsteinsson, 22.5.2009 kl. 20:29]

Ómar, þessi lestur var eins og að komast í heitan pott upp á hálendinu, þegar brýn þörf er komin fyrir bað.  Takk.