Íslands þúsund ár

14.7.2009 | 19:10

"Urðu fyrir bílveltu." Lenti veltan á þeim?

Ég gefst upp. Það virðist vonlaust verk að fá því framgengt að því sé lýst á stysta, einfaldasta og rökréttasta hátt þegar bílar velta.

Það er ekki tekið gilt að segja "bíll valt."

Aldrei framar mun nokkur bíll velta á Íslandi eða neinn lenda í bílveltu ef svo heldur fram sem horfir í málnotkun.

Málsóðar í fjölmiðlum ætla að hafa það af að gera bílveltuna að sérstökum hlut sem "verður" út um allt.

Með síbilju sinni "bílvelta varð" kemst ekkert annað að. Engir bílar velta lengur.

Nýjasta skrefið var stigið í fréttinni sem þessi pistill er tengdur við.

Sagt var: "Þrír erlendir ferðamenn urðu fyrir bílveltu" fyrir vestan.

Hingað til hefur það verið hluti af þeirri hættu sem stafar af farartækjum að menn geti orðið fyrir þeim, lent fyrir bíl eða lent undir bíl.

En nú verða menn líka að hafa augun hjá sér gagnvart alveg nýrri hættu: Grandalaus getur maður orðið fyrir bílveltu. Nú eru það ekki aðeins bílar sem koma aðvífandi á fullri ferð, sem maður getur orðið fyrir, heldur geta bílveltur komið á mikilli ferð og maður orðið fyrir þeim, hugsanlega orðið undir bílveltum.

Í bílaralli geta menn lent í því að velta bílum sínum. Mig óraði aldrei fyrir því að ég gæti sloppið svo vel í gamla daga að velta aldrei bíl, heldur verða bara fyrir bílveltum.

Raunar er hægt að líta á þetta frá öfugri hlið. Kannski er skárra að maður velti bílnum og hafi þá eitthvað með það að gera heldur en að verða fyrir bílveltum sem komandi æðandi að manni.

	Bílveltur á Snæfellsnesi og Dynjandisheiði
Ábyrgðarmaður færslu Tilkynna um óviðeigandi tengingu við frétt

Flokkur: Bloggar | Facebook

Athugasemdir

Til að bílvelta verði, þurfa einhverjir að velta bílum.

Þrjár konur voru í bílnum, sem valt á Snæfellsnesi, þær slösuðust ekki illa.

En hvernig ætli hafi farið fyrir þeim, sem veltu bílnum á Dynjandisheiði ?... og bjuggu til bílveltuna, sem fór á þrjá menn?

Það má velta þessu fyris sér, á marga vegu.

En mikið er þetta bjánalega skrifað ,,urðu fyrir bílveltu". Mér finnst eins og einhver, sem er ekki svo klár í Íslensku, sé að reyna að hljóma ,,gáfumannslega".

Börkur Hrólfsson, 14.7.2009 kl. 19:55