Hafið þið tekið eftir því...?

Hafið þið tekið eftir því að yfirleitt er það síðasti lykillinn sem maður fálmar eftir í lyklakippunni sem gengur að skránni og maður hugsar með sér: Af hverju athugaði ég ekki síðasta lykilinn fyrst?

Hafið þið tekið eftir því að þegar við missum brauðsneið í gólfið snýr smjörið eða áleggið alltaf niður?

Hafið þið tekið eftir því að þegar maður skilur eftir snúrur í poka eða tösku, þá eru þær oftast búnar að flækja sér í óleysanlega flækju, jafnvel binda á sig hnúta, þegar maður opnar töskuna?

Í gærkvöldi var ég á leið heim til mín og þurfti að fara framhjá sjö umferðarljósum. Hver einastu umferðarljós breyttus úr grænu í rautt þegar ég kom að þeim. Hafið þið tekið eftir því hvernig þetta gerist æ ofan í æ? Maður hangir á hverjum ljósunum á fætur öðru, sem eru að stjórna umferð sem er ekki til, að kvöldi eða um nótt. 

Hafið þið tekið eftir því hvað Murphys-lögmálið gildir oft, - að ef eitthvað geti farið úrskeiðis, muni það gerast og það fyrr en okkur grunar?

Hafið tekið eftir því hvað hlutir geta fest eða flækst hverjir í öðrum ótrúlega oft og á ótrúlegan hátt?

Hvernig fötin manns geta fest á furðulegan hátt og rifnað? 

Hafið þið tekið eftir því hvað maður getur verið öruggur um að við höfum öll tekið eftir þessu? 

En hafið þið tekið eftir einu, - svona í lokin? Hafið þið tekið eftir því hvað við tökum sjaldan eftir því þegar allt gengur vel, öfugt við upptalninguna hér að ofan?

Athugasemdir

[Rafn Haraldur Sigurðsson (IP-tala skráð) 1.9.2009 kl. 19:26]

Ég hef oft lent í þessu með umferðarljósin, lykilinn og brauðsneiðina og þegar þú minnist á að þegar að allt gengur vel þá tekur maður ekki eftir því, er sennilega vegna þess að manni finnst það eðlilegt að allt gangi vel. Það er tilbreytingarlaust, maður siglir lignan sjó, þar til að brotið ríður yfir og allt fer í klessu, þá munum við eftir því.

Skemmtilegar pælingar hjá þér.

kveðja Rafn.

[Offari, 1.9.2009 kl. 21:47]

Ég er með tvo lykla yfirleitt passar seinni lykillinn. En ef hvorugur passar fatta ég að ég er að reyna að opna vitlausan skáp.

[Gunnar Th. Gunnarsson, 1.9.2009 kl. 22:31]

Það slökknar lygilegt oft á ljósastaurum í þann mund er ég keyri fram hjá þeim.... ég hlýt að vera magnaður, en svo sagði kunningi minn mér að þetta gerðist líka hjá honum.

Tveir magnaðir