Ótíðindi að Magma eignist "ráðandi hlut."

Nú stefnir í það að Magma Energy eignist að minnsta kosti nógu stóran hlut í jarðvarmaorkunni í Suðurnesjum til að það falli undir skilgreininguna "ráðandi hlutur." Þetta eru ótíðindi því að jafnvel þótt opinberir aðilar eigi rúmlega helming er þessi erlendi hluti alltof hár.

Í ofanálag eru skilmálar þannig að Magma þarf að borga alveg ótrúlega lítið út og höfuðið síðan bitið af skömminni með því að láta tímalengdina 65+65=130 ár inn í samninginn.

Til samanburðar má geta þess að þegar Bandaríkjamenn vildu 1945 fá að gera samning til 99 ára um herstöðvar á Íslandi voru 99 ár  talin ígildi þess að samningurinn væri til eilífðar. 

Andspyrnan gegn þessu virðist máttlaus. Þótt auðvelt væri á fimmtán dögum að finna samsvarandi upphæð til að leggja í Sjóvá virtist tveggja mánaða tími ekki bera neinn árangur varðandi þetta mál.

Nú er ástæða til að hafa verulegar áhyggjur af því að talið um það að ná restinni af fyrirtækinu í opinbera eigu verði aðeins orðin tóm.  

Í sumar hefur mátt sjá þess merki að þeir sem andæfa stóriðju- og landsölustefnunni séu jafnvel fyrirfram búnir að búa sig undir uppgjöf sem felst í þeim Pílatusarþvotti að þeir hafi barist á móti þessu en orðið að láta í minni pokann.  

Og þetta er greinilega bara byrjunin. Forstjóri Landsvirkjunar hamraði á því í greinum í bæði Fréttablaðinu og Morgunblaðinu að nauðsynlegt væri að koma orkuauðlindinni úr almanna eigu.  

Samþykktu kauptilboð Magma

Athugasemdir

[AK-72, 1.9.2009 kl. 00:31]

Samkvæmt Dofra Hermanns þá metur Fjármálastjórn Reykjavíkurborgar það svo að þessi samningur muni kosta íbúa í Reykjavík 5-6 milljarða í tap. Skuldabréfið er þar að auki að einhverju leyti bundið við álverð.

[Baldvin Jónsson, 1.9.2009 kl. 01:45]

Já minn kæri Ómar, en hvar er andstaða Íslandshreyfingarinnar við málið?

[Sigurgeir Jónsson, 1.9.2009 kl. 04:09]

Ábyrgðin er ríkisstjórnarinnar og þeirra sem að henni standa, þeirra á meðal þín Ómar.

[Ragnar L Benediktsson, 1.9.2009 kl. 07:32]

Skelfilegt ef af verður. Skrifaði um þetta þegar Bjarni Ármann var upp á sitt besta í Geysir Green.sjá   ragnarb.blog.is

kveðjur til allra

[Ómar Ragnarsson, 1.9.2009 kl. 09:45]

Andstaða Íslandshreyfingarinnar við sölu á auðlindum landsmanna til útlendinga hefur birst í fleiri ályktunum um það efni frá hendi okkar en hjá nokkru öðru stjórnmálaafli hér á landi, í ótal bloggpistlum mínum og aðvörunarorðum mínum og annarra í viðtölum alveg fram á þetta ár.

Enn var þetta ítrekað eftir að hreyfingin var orðin aðili að Samfylkingunni og enginn ætti að velkjast í vafa um afstöðu okkar. Ályktanir okkar hafa hins vegar yfirleitt ekki fengið náð fyrir augum fjölmiðlanna.

Ég ætti því kannski að spyrja á móti hvar andstaða Borgarahreyfingarinnar við málið sé.

[Flosi Kristjánsson, 1.9.2009 kl. 09:53]

Erum við nokkuð að hugsa um þetta?

      http://www.cbsnews.com/stories/2004/06/01/eveningnews/main620626.shtml

      http://www.arnoldwatch.org/blogs/blogs_000333.php3

[ElleE (IP-tala skráð) 1.9.2009 kl. 11:13]

Eg hafði hugsað oft um þetta, Flosi.   Já, nú er landssalan hafin.   Voðalegt.

[Hulda Haraldsdóttir, 1.9.2009 kl. 12:43]

Við eigum öll að vera logandi hrædd því ég held að þetta sé rétt byrjunin á því sem við eigum eftir að sjá í þessa veru,  það er eins og við viljum láta misnota okkur eins og ódýrar hórur. Svei svei 

[Baldvin Jónsson, 3.9.2009 kl. 23:03]

Borgarahreyfingin er að bregðast við málinu loksins núna - erum búin að vera altekin af Icesave málinu fram að þessu. Borgarahreyfingin nálgast málið út frá spillingarlyktinni þar sem að hreyfingin er ekki með sérstaka áherslu á umhverfismál í stefnunni.

Umhverfislega er þó ljóst að þetta mál er stórhættulegt.

Hefur einhver til að mynda spurt sig að því hvaða mögulegu áhrif gríðarleg ofnotkun á þessu svæði gæti haft á til dæmis nýtinguna á Hellisheiði?

En Ómar, vil taka fram að ég er ekki að setja fram gagnrýni á þig persónulega í málinu. Hef dáðst að þér fyrir eljuna og geri enn. Finnst bara sorglegt með bakgrunn úr starfi Íslandshreyfingarinnar að hún sé ekki í þessum töluðu orðum að gera allt brjálað innan Samfylkingarinnar.