"Anybody´s fight"?

Ofangreind orð eru stundum notuð hjá enskumælandi þjóðum um það þegar viðureign eða bardagi verður þess eðlis að hvor aðili um sig á álíka mikla möguleika, jafnvel þótt fyrirfram hafi ekki virst svo. 

Er þá sagt, til dæmis um tvo hnefaleikara í hringnum: "It´s anybodys fight," þ. e. allt getur gerst.

Á þessari stundu er ómögulegt að sjá hvað afsögn Ögmundar Jónassonar muni þýða í raun og hvernig allt fari að lokum varðandi hið slæma Icesave-mál.

Ögmundur segist vera að kalla á svipaða þverpólitíska vinnu og unnin var á þingi í sumar en tók líka allmikinn tíma.

Ögmundur sagði í viðtali í hádeginu að þingið þyrfti að taka sér þann tíma sem til þyrfti til að ljúka næsta skrefi í þessum máli.

En hvað er það langur tími?

Um það virðist vera ágreiningur innan stjórnarflokkanna þar sem ýmsir aðrir stjórnarliðar sýnast þeirrar skoðunar að þessu máli verði að koma frá sem allra fyrst því að annars verði afleiðingarnar slíkar að eftir á muni menn iðrast þess að hafa ekki lokið því.

Hér ríkir þingræði og öll gögn þessa máls hvað snertir afleiðingar mismunandi meðferðar málsins og kosti í stöðunni, bæði til skemmri og lengri tíma litið, verða að llggja á borðinu, helst hjá öllum þingmönnum, en í það allra minnsta hjá þeim meirihluta þingmanna sem kunna að sameinast um næstu skref í því.

Staðan virðist ætla að verða æ flóknari, tvísýnni og erfiðari með hverjum deginum sem líður og æ fleiri möguleikar sem menn geta velt upp, allt frá því að stjórnin lafi í ágjöfinni og komi málinu áleiðis, - yfir í það að hér verði stjórnarkreppa eða hugsanleg myndun annarrar stjórnar, jafnvel þjóðstjórnar.   

Ögmundur segir af sér

Athugasemdir

[Offari, 30.9.2009 kl. 13:59]

Það sem aldrei hefur gerst áður getur alltaf gerst aftur.

[Agla (IP-tala skráð) 30.9.2009 kl. 19:58]

Þú segir í færslunni:

"Hér ríkir þingræði og öll gögn þessa máls hvað snertir afleiðingar mismunnadi meðferðar málsins og kosti í stöðunni, bæði til skemmri og lengri tíma litið, verða að liggja á borðinu, helst hjá öllum þingmönnum, en í það allra minnsta hjá þeim meirihluta þingmanna sem kunna að sameinast um næstu skref í því."

HVAÐA alþingismenn lýðveldisins tilheyra, að þínum dómi, "þeim meirihluta þingmanna  sem kunna að sameinast um næstu skref" og ættu því að njóta þeirra sérréttinda að sjá þessi mikilvægu gögn sem þú nefnir?

[Ómar Ragnarsson, 30.9.2009 kl. 21:15]

Ég er ekki að segja að ég telji að það eigi að vera þannig að bara meirihluti þingmanna fái að vita allt um málið.

Ef hins vegar það yrði þannig að fjármálaráðherra fengi fyrirfram umboð til að ljúka málinu með því fororði að allir skuldbinda sig til að samþykkja það sem út úr því kemur, yrði þetta orðið eitt af þessum dæmigerðu meirihlutamálum eftir flokkslínum þar sem þingið er bara afgreiðslustofnun.

Ef í ofanálag þetta yrði þannig að ekki einu sinni þingmennirnir í þessum meirihluta vissu um alla enda málsins, svo sem um einstök atriði afleiðinga þess að fá ekki afgreiðslu hjá AGS, þá yrði það slæmt fyrir raunverulegt þingræði, sem á að byggjast á því að allir, ALLIR þingmenn hafi ALLAR upplýsingar.