Umhugsunarefni.

Það vill svo til að ég er nýkominn úr tveimur ferðum ferðum til Ólafsfjarðar þar sem leiðin lá í gegnum Ólafsfjarðargöng. Á skemmtun þar nyrðra var heiðursgestur Valdimar Steingrímsson, sem forðum gat sér frægð fyrir að ryðja hinn stórhættulega veg um Ólafsfjarðarmúla.

Þótti mikil mildi að Valdimar slapp oftar en einu sinni naumlega úr hættulegum aðstæðum á þeim vegi.

 Þess vegna er það nöturlegt ef svipuð hætta getur skapast í mannvirkinu sem átti að bægja hættu frá á leiðinni til bæjarins.

Ég hefði ekki viljað verða undir hruni úr göngunum á minnsta bíl landsins þegar ég var á leið í gegnum göngin. Hefði ekki þurft að spyrja að leikslokum ef slíkt hefði gerst.

Þetta atvik hlýtur að kalla á reglubundnar rannsóknir á jarðgöngum landins,  einkum þeim eldri, líkt og tíðkast um lyftur í húsum. 

Læt fylgja með myndir af "Litla gul" í þessari ferð norður, þar sem hann fór í hjólför hins gamla "Litla guls" fyrir hartnær hálfri öld.  

Máttarvöldin voru svo vinsamleg að gefa mér og þeim litla hið versta ferðaveður á Öxnadalsheiði og síðasta áfanganum til Ólafsfjarðar, eins og til þess að líkja eftir akstursaðstæðum fyrir hálfri öld, sem voru auðvitað miklu verri á krókóttum og mjóum malarvegum en þau eru nú. 

(Þess skal getið að litla myndin hér fyrir neðan fór inn vegna tæknilegra mistaka sem ég réði ekki við) 

  

 

 

Hrun í Ólafsfjarðargöngum

Athugasemdir

[Offari, 8.10.2009 kl. 15:59]

Mér finnst litli gulur bara vera sætur og krúttlegur.  Annar er þetta hrun í Ólafsjarðargöngum mikið áhyggju efni. Eldri göng eins og Norðfjarðar og Strákagöng vor ekki byggð með sama styrk og yngri göng.

Þar vae rkki sprautað trefjasteypu á bergið líkt og gert er nú til dags. Ég held reyndar að öll akstursgöng landsins séu undir reglulegu eftirliti hjá vegagerðini og þetta hrun í Ólafsfjarðargöngum hafi því verið ófyrirsjáanlegt.

[Gunnar Th. Gunnarsson, 8.10.2009 kl. 16:11]

Oddsskarðsgöngin eru frá miðjum áttunda áratugnum. Þau eru í rúml. 600 m. hæð, einbreið, með blindhæð Norðfjarðarmegin. Ekki var hægt að finna óheppilegra berg til að fara í gegnum, því göngin liggja í gegnum gíg megineldstöðvar, svokallaðrar Reyðarfjarðareldstöðvar.

Smágrjót er stöðugt að hrynja úr lofti ganganna og reynt er að koma í veg fyrir skemmdir á ökutækjum sem leið eiga um göngin með hænsnaneti.

[Þorsteinn Briem, 8.10.2009 kl. 18:09]

Ekki norður illa gekk,
engin göt í kollinn fékk,
vanda álags verður tékk,
viljum hrun nú eftir smekk.

[Ómar Ragnarsson, 8.10.2009 kl. 19:59]

Alþjóð átti kost á því að sjá í fréttum Sjónvarpsins í kvöld hvernig bergið í veggjum Ólafsfjarðaganganna er. Það var áhrifamikil sjón.