Gildi sérstöðunnar.

Ég hef þurft að aka oftar milli Suður- og Norðurlands á þessu ári en nokkru sinni síðan áður en ég fór að fljúga á eigin flugvélum. Þessar ferðir hafa verið vegna kvikmyndagerðar á Norður- og Austurlandi en á ódýrustu og minnstu bílum landsins er slíkur ferðamáti ódýrastur, þótt þær séu tímafrekar, miðað við að fljúga. 

Ég hef áð oft í gegnum tiðina í gamla Staðarskála af tveimur ástæðum. 1. Hann var öðruvísi en aðrar bensínstöðvar, hlaðinn sögu frumkvöðulsins Magnúsar, sem stækkaði hann og færði út kvíarnar hægt og bítandi.

2. Hin ástæðan var mjög einföld: Þar voru seldir ástarpungar.

Með tilkomu nýja Staðarskála hefur ástæða nr. 1 horfið. Sá skáli gæti verið hvar sem er í Evrópu. En ástæða nr. 2 er enn í Staðarskála. Þar eru enn seldir ástarpungar, sem ekki fást á öðrum bensínstöðvum.

Víðigerði er nær miðju leiðarinnar Reykjavík-Akureyri en Staðarskáli. Þegar ég kom þar við síðast sagði ég við afgreiðslufólkið að ég myndi koma oftar við þar ef þar væru seldir ástarpungar eða eitthvað annað, sem hefði svipaða sérstöðu.  

Litla kaffistofan er annar áningarstaður sem hefur sérstöðu. Ekki aðeins útlitið, aðstæðurnar og sagan, heldur líka heimabakaða brauðið og fleira sérstakt. 

Í kaffiteríunni hjá honum Baldvini í flugstöðinni á Akureyri eru seldar pönnukökur. Oft er það og Baldvin og fjölskylda hans eina ástæðan fyrir því að ég kem þar við. 

Niðurstaða: Oft er það sérstaðan sem ræður úrslitum á markaðnum, ekki það að vera með einhver ósköp af því sama og allir aðrir.

Dæmi um þetta úr bílaiðnaðinum var tímabilið frá 1950 til 1965 hjá Nash og síðan American Motors í Bandaríkjunum.

Í stað þess að reyna að keppa við risana þrjá á öllum sviðum var tekin upp sú stefna þessi ár að framleiða eitthvað sérstakt sem hinir stóru buðu ekki upp á. Bíllinn hét Rambler. Á þessum fimmtán árum hélt þetta þessum bílaverksmiðjum á floti á sama tíma og Studebaker, Packard, Willys og fleiri smærri verksmiðjur fóru á hausinn.

Á miðjum sjöunda áratugnum hurfu American Motors frá þessu og fóru að keppa við þá stóru á öllum sviðum. Það varð tapað stríð. 

Við Helga fórum eitt sinn í 14 daga kvikmyndargerðarferðalag um Noreg endilangan. Af 14 gististöðum í ferðinni munum við aðeins eftir tveimur.

Annar þeirra var fjallaskáli á Harðangursheiði og hinn var gamalt og fornfálegt sveitahótel í Suður-Kjós lengst norður í Finnmörku. Áttræð kona, hóteleigandinnn, lyktin og aðbúnaður allur gerði dvölina þar ógleymanlega.

Tólf gististaðir í þessari ferð runnu saman í eina hrúgu af hótelum sem öll voru með eins herbergjum, sjónvörpum o. s. frv.

Ísland hefur gríðarlega sérstöðu sem við höfum ekki enn nýtt okkur nema að mjög litlu leyti.

Náttúra Íslands er sambærileg við ástarpungana í Staðarskála nema að aðrar bensínstöðvar gætu farið að keppa við Staðarskála um ástarpunga, en ekkert land í heimi getur keppt við hinn eldvirka hluta Íslands ef rétt er á haldið.