Rétt orðaval, íslenskt "æði".

BBC notar rétt orð í umfjöllun sinni um virkjanaæðið á Íslandi og komandi sókn gagnavera í íslenska orku, "craze", "æði".

Hættan, sem vofir yfir íslensku þjóðinni er ekki fyrst og fremst fólgin í því að glíma við hrikalegar afleiðingarnar af síðasta æðinu hér heldur í því að fara úr einu æðinu yfir í annað. 

Komandi gagnavera-æði er að því leyti til skárra en álvera-æðið að einingarnar eru smærri, ekki þessi risaálver sem ein og sér krefjast allri fáanlegrar orku heilla landshluta.

Gagnaverin menga minna, gefa betri störf og hvert starf er miklu ódýrara en hjá orkubruðlandi álverunum.  

En hættan er í meginatriðum sú sama, - að þrýstingur og hótunarvald eigenda gagnaveranna leiði til sömu niðurstöðu og hjá álfurstunum: Annað hvort fáum við að stækka og auka orkuneysluna eða...

Skuggalegasta hættan er sú að með því að láta eignarhald auðlindanna í hendur útlendingum og láta álver í Helguvík og Bakka komast á koppinn muni gagnaverin hirða restina af virkjanlegri orku.

Niðurstaðan verði þá sú sem einn af færustu umhverfisblaðamönnum heims sagði við mig fyrir tíu árum í Íslandsheimsókn að verða mundi á Íslandi.

Hann sagði: "Eftir ótal viðtöl við ráðamenn ykkar spái ég því að á endanum munið þið rústa allri verðmætustu náttúru lands ykkar og virkja hverja einustu sprænu og hvern einasta hver."

Sem sagt: Torfajökull, Kerlingarfjöll, Askja, Kverkfjöll, Jökulsá á Fjöllum, Markarfljót, Langisjór o. s. frv.  

Mér fannst þetta full dökk spá þá, en síðan hefur ásóknin í orkuna og æðið, orðið sem BBC notar um íslensk orkumál,  stigmagnast svo hratt að þessi spá er orðin raunhæf. 

Nýtt gullæði á Íslandi?

Athugasemdir

[E (IP-tala skráð) 10.10.2009 kl. 14:16]

Ómar, þú ert æði!

[au, 10.10.2009 kl. 14:46]

Sæll Ómar. Ég er sammála þér. Það þarf að halda vel á spilunum og nýta auðlindir landsins þannig að hagur þjóðarinnar verði ávallt hafður í fyrirrúmi. Það má ekki ganga of geyst á auðlindirnar. Best væri að láta staðar numið og horfa í aðrar áttir varðandi atvinnusköpun. Dæmi: nýta á umhverfivænan hátt og stórauka t.d. græna ferðamennsku og menningar- og menntatengda ferðamennsku. Menningarþjóðfélag hrynur ef sköpunarkraftur einstaklinga er ekki nýttur. Það segir sagan okkur að minnsta kosti. Margir bíða eftir ákvarðanatökum ríkisvaldsins í dag og geta sig hvergi hreyft vegna seinagangs stjórnvalda við að leysa Icesave deiluna. Sköpunarmáttur þjóðar er mikilvægari en endalaus ágangur á auðlindir landsins. Virkjum menntun og sköpunarmátt þjóðarinnar í staðinn.

[Inside Bilderberg (IP-tala skráð) 10.10.2009 kl. 15:44]

"Sköpunarmáttur þjóðar er mikilvægari en endalaus ágangur á auðlindir landsins. Virkjum menntun og sköpunarmátt þjóðarinnar í staðinn. "

Nákvæmlega Ómar!

[Gunnar Th. Gunnarsson, 10.10.2009 kl. 17:03]

Ferðamennska getur aldrei orðið "græn", nema fólk komi til landsins á árabátum og ferðist um á reiðhjólum eða gangandi

[Finnur Bárðarson, 10.10.2009 kl. 17:42]

Er nokkuð að því að ferðast um á reiðhjólum eða ganga Gunnar. Annars er þetta snilld: "úr einu æði í annað æði " það verður ekki meira íslenskt.

[Magnús (IP-tala skráð) 10.10.2009 kl. 18:08]

Fróðleg lesning.

http://www.smugan.is/pistlar/adsendar-greinar/nr/2327

[Gunnar Th. Gunnarsson, 10.10.2009 kl. 18:14]

Það er ekkert að því Finnur.... bara svo helv lítið upp úr því að hafa fyrir okkur

[Steinþór (IP-tala skráð) 10.10.2009 kl. 21:29]

Orðið "craze" kemur aldrei fyrir í BBC greininni. Þar er hins vegar talað um "Cold rush" sem er sniðugur orðaleikur sem Mogginn þýðir sem gullæði. BBC blaðamaðurinn er hins vegar að leika sér að því að tölvuverin þurfi mikla kælingu.

[Ómar Ragnarsson, 10.10.2009 kl. 23:18]

Ég sá ekki BBC greinina heldur umsögn um hana. Gildir einu hvort um "rush" eða "craze" er að ræða.

"Gold rush" var notað um gullæðið í Kaliforníu sem réttilega var nefnt "æði" á íslensku.

[Gunnar Th. Gunnarsson, 10.10.2009 kl. 23:50]

Gullæðið í Kaliforníu var örugglega jákvætt fyrir fleiri en færri.

[Arnór Baldvinsson, 11.10.2009 kl. 00:39]

Sæll Ómar,

Talandi um gull, þá eru gullnámur gífurlega menguð svæði vegna þess mikillar notkunar á arseniki.  Fyrir stuttu heyrði ég fjallað um þetta á CBS Radio One og þar var talað um námu sem var yfirgefin af eigendunum eftir að Kanadastjórn skipaði að námaeigendur yrðu að sjá um hreinsun eftir að námagreftri lyki.  Þar er nú arsenik sem nægir til að drepa alla jarðarbúa 4-5 sinnum og nú er að koma í ljós veruleg hætta á að þetta komist í grunnvatn.  Hreinsunin er talin muni kosta um milljarð (Kanada) dollara.

Íslendingar hafa alltaf verið í einhverju æði.  Gamalt spakmæli segir að "kapp sé best með forsjá" en sú forsjá virðist algjörlega hafa týnst niður.  Hér einu sinni var það loðdýraeldi, svo fiskeldi.  Man eftir að ég keyrði um "óbyggðir" Reykjaness fyrir einum 15 árum með bróður mínum og við fundum nokkur yfirgefin fiskeldis fyirtæki þarna úti á nesinu.  Sumstaðar var enn renndandi vatn og ljós en allt augljóslega yfirgefið.  Svo kom banka og fjármagnsæðið og ég er alveg viss um að íslendingar finna eitthvert annað æði til að eyða peningum í, því ekki vantar kappið, forsjáin er því miður bara akkúrat engin.

Kveðja,