Skjálfandafljót er í raun á virkjanalistanum.

Hvað sem líður umræðum um Skjálfandafljót er setið um það af þeim sem vilja virkja það og hafa stofnað til þess sérstakt félag. Ég er núna staddur á Akureyri og komst ekki strax inn í tengingu við fréttina en vísa til næsta bloggs á undan þessu um það efni.

Um Skjálfandafljót ríkir mikil fáfræði. Goðafoss er þekktur af því að hann er við hringveginn og sögufrægur en Aldeyjarfoss þekkja örfáir. Þess vegna er hann ekki settur á myndalista með fréttum þótt hann sé í mestri hættu og mun sérstæðari.

Leggjast gegn friðun alls Skjálfandafljóts

Athugasemdir

[Þorsteinn Briem, 11.12.2009 kl. 20:18]

Mér líst vel á þessi áform Þingeyjarsveitar:

"Í vinnudrögum aðalskipulags sé lagt til að fallið verði frá öllum virkjunaráformum í Skjálfandafljóti, þar á meðal áformum um Hrafnabjargavirkjun.

Hins vegar vilji sveitarfélagið áskilja sér rétt til að nýta vatn úr Skjálfandafljóti til vistvænnar starfsemi, eins og t.d. kælivatnstöku fyrir tölvugagnaver þar sem vatninu yrði skilað aftur í fljótið."

[Gunnar Th. Gunnarsson, 11.12.2009 kl. 22:36]

Aldeyjarfoss er virkileg fallegur, en að segja að hann sé sérstæðari en Goðafoss og/eða hafi meira verndunargildi, er tóm þvæla í þér, Ómar.

En það er auðvitað mín persónulega skoðun. Um smekk verður ekki deilt

[Ómar Ragnarsson, 12.12.2009 kl. 02:43]

Ég tek undir það með þér, Gunnar, að mat á fossum getur stundum verið smekksatriði.

Hefurðu komið að Aldeyjarfossi? Ef þú hefur ekki komið að honum er erfitt fyrir þig að fella dóm þinn.

Goðafoss er næsta venjulegur foss á heimsvísu, innan við 10 metra hár.

Umgerð Aldeyjarfoss, hin magnaða stuðlabergshvelfing, skipar honum í sérflokk á Íslandi því hann er miklu vatnsmeiri en Svartifoss í Skaftafelli og stuðlabergsfossarnir í Jökuldal og Laugará hjá Snæfelli.

[Haukur Kristinsson (IP-tala skráð) 12.12.2009 kl. 09:47]

Jú, Gunnar Th. Um smekk skal deila. Ef þú fullyrðir að Bubbi sé betri en Bach, eða Megas betri en Mozart, hjótum við að deila um það. Og nú spyr ég eins og Ómar; hefurðu komið að Aldeyjarfossi? Líklega ekki. Ég er Ómari hjartanlega sammála, Aldeyjarfoss er ekki eingöngu fallegur, heldurn gerir umgjörðin hann að nátturperlu, par excellence.

[Gunnar Th. Gunnarsson, 12.12.2009 kl. 14:29]

Að sjálfsögðu hef ég komið að Aldeyjarfossi, annars segði ég þetta ekki.

Það sem Goðafoss hefur fram yfir er e.t.v. fyrst og fremst sögu og menningarlegt gildi.

[Offari, 12.12.2009 kl. 14:54]

Mér finnst stuðlabergið við Aldeyjarfoss vera fallegt. Goðafoss finnst mér einn fallegasti foss landsins þótt hann sé bara venjulegur foss. Dettifoss og Gullfoss finnst mér hinsvegar ljótir og hrikalegir fossar.   Því hefði ég frekar viljað virkja Jökulsá á fjöllum en Skjálfandafljót.

En ég er samt ekki á móti virkjun skjálfandafljóts því ég er svo mikill stóriðjusinni að ég vill nýta hvern dropa áður en hann rennur til sjávar. Gufuaflið virðist ekki vera eins drjúgt og menn héldu. Við eigum enn eftir tölvert magn af óbeisluðu fallvatni eftir.  Eigum við bara að henda því í sjóinn?

[Smjerjarmur, 12.12.2009 kl. 18:30]

Offari,

Ég held að við þurfum ekkert að hafa fyrir því að henda neinu af þessu vatni í sjóinn, það fer sína leið.  Ég get ekki annað sagt en að mér þykja Gullfoss og Dettifoss tignarlegir í meira lagi, en er ekki alveg mótfallinn því að virkja þá að því tilskyldu að ásýnd þeirra verði sem mest óbreytt.  Báðir þessir fossar eru að breytast og það er ekki gott að segja hvernig sú þróun verður í tímans rás.  Ég tel ekki fráleitt að nálgast þann möguleika með opnu hugarfari að hluti af þessu vatnsafli verði virkjarður.  Við Niagarafossa á landamærum Kanada og Bandaríkjanna er vikjun og ég sé ekki annað en fegurð þessara fossa myndi njóta sín mjög vel ef ekki væri fyrir alla ferðamannaþvöguna sem þarna er. 

[Ómar Ragnarsson, 12.12.2009 kl. 20:33]

Eru þeir menn ekki dálítið langt á eftir tímanum sem sífellt eru að vitna í 50 til 100 ára gamlar fyrirmyndir um virkjanir?

Nú er verið að leggja heilsársveg að Dettifossi sem þýðir að hann verður alger bónus fyrir þá ferðamenn sem hægt verður að laða að Mývatni að vetrarlagi.

En hugmyndir um virkjun Dettifoss felast auðvitað í því að leyfa helmingi af vatni hans að renna um fossstæðið á mesta ferðamannatímanum á sumrin þegar rennslið er mest í ánni en taka vatnið af honum á öðrum árstímum.

Þar að auki verður ekki hægt að auglýsa hann sem aflmesta foss Evrópu ef farið verður með hann eins og Samson hinn sterka þegar hárið var skorið af honum.